Skandał u Litvie: Paciunas zabity svaimi? Sakratar MZS – rasiejski špijon?

U Litvie skandał: specsłužby zatrymali redaktara žoŭtaj hazety "Laisvas Laikrastis" i skanfiskavali nakład hetaha tydniovika. Aficyjnaje abvinavačvańnie: razhałošvańnie dziaržaŭnaj tajamnicy. U skanfiskavanym numary było dva skandalnyja artykuły: adzin abvinavačvaŭ u karupcyi eks-premjera Brazaŭskasa i eks-šefa Sojmu Paŭłaŭskasa, a druhi ŭskładaŭ vinu za śmierć dyplamata Paciunasa ŭ Bieraści na litoŭskija specsłužby.

Umiašaŭsia prezydent Adamkus. Jon paličyŭ aryšt zamacham na svabodu słova, i redaktar Dryžus vyjšaŭ na svabodu. Pravaabaroncy i žurnalisty vitali taki krok Adamkusa.

Specsłužby kažuć: usio heta rasiejskaja pravakacyja. Pomsta za dziejańni litoŭskich specsłužbaŭ suprać Viktara Ŭspaskich, litoŭskaha biznesoŭca i palityka, ciesna paviazanaha z Maskvoj. Za finansavyja machinacyi jon byŭ adchileny ad pasady i ciapier chavajecca ŭ Maskvie. A publikacyi "Laisvas Laikrastis" – heta častka čornaha pijaru, jaki maje pasiejać niedavier da dziaržaŭnych instytutaŭ Litvy.

Adnak mnohija naziralniki miarkujuć, što akcyja specsłužbaŭ była sprobaju adciahnuć uvahu ad śmierci Vitaŭtasa Paciunasa, jaki vypaŭ z akna hatelu "Inturyst" u Bieraści. Pavodle niekatorych naziralnikaŭ, vinavatych treba šukać nie ŭ biełaruskim KDB, jak adrazu byli manilisia, a ŭ litoŭskaj słužbie VSD. Maŭlaŭ, Paciunasa vysłali ŭ Biełaruś, bo jon sprabavać sarvać realizacyju niekatorych prajektaŭ, źviazanych handlem hazam z Rasiejaj i transpartavańniem tavaraŭ pa čyhuncy ŭ Kłajpedzki port. Jak piša hazeta "Ekstra", najbolšy litoŭski pasiarednik u handli hazam – heta Rymantas Stonis, adnačasova blizki siabar Albinasa Januški, sakratara litoŭskaha MZS. Jak vydajecca hazecie, mienavita Januška dabiŭsia pieravodu Paciunasa ŭ Biełaruś. "Ekstra", analizujučy dziejnaść Januški, ćvierdzić, što jon – rezydent rasiejskich specsłužbaŭ u Litvie.

U abaronu Januški vystupili ŭžo mnohija palityki j kiraŭniki specsłužbaŭ. Jany adznačajuć, što Januška zaŭždy paśladoŭna adstojvaŭ prazachodni kurs Litvy i asablivuju ŭvahu nadavaŭ demakratyzacyi krainaŭ byłoha SSSR. VSD daje zrazumieć, što abvinavačvańni na adras Januški – heta toj samy rasiejski čorny pijar.

Varta adznačyć, što Januška byŭ častym hościem na spatkańniach z udziełam aktyvistaŭ biełaruskaha demakratyčnaha ruchu ŭ Vilni. Paźniej ź im byŭ źviazany inšy skandał, u jakim medyi tak da kanca nie razabralisia, kali rasiejski telekanał pieradaŭ zapis byccam by telefonnaj razmovy miž peŭnym “Albinasam”, vysokim čynoŭnikam litoŭskaha MZS, i ŭpłyvovym hruzinskim palitykam Tarhamadze, u jakim Alaksandar Milinkievič krytykavaŭsia za pamiarkoŭnaść i, faktyčna, za niežadańnie arhanizoŭvać revalucyju i hučali pahrozy na jahony adras. Praŭdzivaść taje razmovy litoŭskija aficyjnyja asoby abviarhali, ale ŭ lubym razie toj epizod paharšaŭ vobraz Vilni jak u vačach biełarusaŭ, tak i Zachadu.

Treba skazać, što "Laisvas Laikrastis" – heta tydniovik, što specyjalizujecca na žurnalisckich śledztvach, asabliva što datyčyć karupcyi ŭ vyšejšych ešelonach uładaŭ. Jon nie ŭnikaje publikacyi niepaćvierdžanaj infarmacyi dy plotak. Padčas Paksashiejtu ŭ 2003 hodzie jon vystupaŭ u abaronu prezydenta, jakoha parlament adchiliŭ ad pasady za suviazi z rasiejskimi specsłužbami.

• 0
• 0
• 0
• 0
• 0
• 0
• 0
• 0