Najbolš vierahodnaja pryčyna pažaru na MZVT — praviadzieńnie ŭ susiednim cechu zvaračnych rabot
Najbolš vierahodnaj pryčynaj pažaru 11 maja na Minskim zavodzie vyličalnaj techniki (MZVT) stała praviadzieńnie zvaračnych rabot u cechu, raźmieščanym pobač sa składam, dzie adbyłosia ŭzharańnie. Pra heta paviedamiŭ žurnalistam vykanaŭca abaviazkaŭ načalnika Minskaha haradskoha ŭpraŭleńnia MNS Rusłan Lichamanaŭ. Razam z tym, padkreśliŭ jon, razhladajucca i inšyja viersii ŭźniknieńnia pažaru.
Pavodle słoŭ Lichamanava, stvorana hrupa pa akazańni psichałahičnaj i inšaj dapamohi paciarpiełym. »U adpaviednaści z zakanadaŭstvam ratavalniki prachodziać abaviazkovaje strachavańnie, ale im budzie akazana i inšaja materyjalnaja dapamoha», — skazaŭ jon.
Namieśnik ministra pa nadzvyčajnych situacyjach Alaksandr Šamko paviedamiŭ, što sihnał ab pažary na MZVT pastupiŭ u 9.05, pieršyja ratavalniki prybyli na miesca zdareńnia ŭžo praz try chviliny. Situacyja była ciažkaj — ahoń vyjšaŭ na dach i moh pierakinucca na inšyja budynki, skazaŭ namieśnik ministra.
Pavodle słoŭ Šamko, padčas abrušeńnia dachu, jakoje adbyłosia ŭ 9.55, dva supracoŭniki MNS znachodzilisia niepasredna na im, astatnija — na pruhu pieršaha paviercha budynka kala ačahu ŭzharańnia. Pad zavałami apynulisia siem ratavalnikaŭ. Byli pryniaty ekstrannyja miery pa evakuacyi paciarpiełych, zajaviŭ namieśnik ministra. U vyniku troch udałosia vyratavać — jany atrymali traŭmy roznaj stupieni ciažkaści. Čatyry ratavalniki zahinuli, jašče adzin — źviarnuŭsia pa miedycynskuju dapamohu z prykmietami atručeńnia praduktami hareńnia.
Kamientary