Kitajskija miljardery stanoviacca baćkami dziasiatkaŭ dziaciej u ZŠA dziakujučy surahatnym maci. Adzin ź ich zajaviŭ pra 100 dziaciej

Supracoŭniki suda ŭ Łos-Andželesie, razhladajučy standartnyja zajavy na ŭstanaŭleńnie baćkoŭstva ŭ vypadkach surahatnaha maciarynstva, vyjavili anamaliju: adno i toje ž imia milhała ŭ dakumientach znoŭ i znoŭ.

Jak piša The Wall Street Journal, vyśvietliłasia, što adzin kitajski miljarder padaŭ zajavy na ŭstanaŭleńnie baćkoŭstva adrazu dla čaćviarych dziaciej ad roznych surahatnych maci, jakija jašče navat nie naradzilisia. Bolš za toje, dadatkovaja pravierka suda pakazała, što jon užo staŭ abo voś-voś stanie baćkam jašče jak minimum vaśmiarych.

100 dziaciej i mara pra dynastyju

Hetym miljarderam byŭ Siuj Bo, kiraŭnik bujnoj kitajskaj kampanii-raspracoŭščyka videahulniaŭ Duoyi Network. Jon žyvie ŭ Kitai i viadzie davoli zamkniony ład žyćcia. Na słuchańni letam 2023 hoda biznesoviec prysutničaŭ praź videasuviaź. Praź pierakładčyka jon zajaviŭ sudździ, što płanuje mieć kala 20 dziaciej, narodžanych u ZŠA, — pieravažna chłopčykaŭ, bo ličyć ich «lepšymi za dziaŭčynak», — kab jany adnojčy ŭznačalili jaho biznes-impieryju.

Pavodle źviestak WSJ, niekatorych ź jaho dziaciej užo vychoŭvali niani ŭ horadzie Irvajn, niepadalok ad Łos-Andželesa, pakul afarmlalisia dakumienty dla ich vyjezdu ŭ Kitaj. Sam Siuj Bo pryznaŭsia sudździ, što jašče nie bačyŭ hetych dziaciej asabista, bo byŭ zaniaty pracaj.

Sudździa adchiliła jahonaje chadatajnictva, paličyŭšy, što apisanaje Siujem staŭleńnie da dziaciej zusim nie padobna na sapraŭdnaje baćkoŭstva. Hetaje rašeńnie pakinuła dziaciej, za naradžeńnie jakich užo było zapłačana, u pravavoj niavyznačanaści.

Siuj Bo — čałaviek, jaki nadzvyčaj aktyŭny ŭ internecie, ale ŭ realnym žyćci zastajecca amal niabačnym: jon redka razmaŭlaje z žurnalistami i nie fatahrafavaŭsia na publicy amal dziesiać hadoŭ.

Žurnalisty znajšli zajavu jaho kampanii, u jakoj śćviardžajecca, što mužčyna maje «krychu bolš za 100» dziaciej, narodžanych u ZŠA praz surahatnaje maciarynstva.

Jak piša WSJ, z akaŭntaŭ, źviazanych ź Siujem, hučali łozunhi kštałtu «bolš dziaciej — mienš prablem», fantazii pra stvareńnie ŭłasnaj «dynastyi» i navat fantazii pra toje, što jahonyja dzieci mahli b kali-niebudź ustupić u šluby ź dziećmi Iłana Maska.

Pavialičyć

«Dzicia pad kluč» za $200 tysiač

Vydańnie adznačaje, što Siuj Bo — tolki samy jarki prykład maštabnaha trenda ŭ ZŠA, dzie surahatnaje maciarynstva ŭ mnohich štatach amal nie rehulujecca na fiederalnym uzroŭni, a sudovyja pracedury, źviazanyja z ustanaŭleńniem baćkoŭstva, časta prachodziać u zakrytym režymie i navat nie zaŭsiody fiksujucca ŭ publičnych sudovych rejestrach. Heta istotna abmiažoŭvaje kantrol industryi.

Zamožnyja kitajcy, vykarystoŭvajučy prabieły ŭ zakanadaŭstvie i 14‑iu papraŭku da Kanstytucyi ZŠA (jakaja harantuje hramadzianstva ŭsim narodžanym u krainie), stvarajuć vielizarnyja siamji. Košt adnaho dziciaci moža dasiahać 200 000 dalaraŭ.

Dla absłuhoŭvańnia popytu z boku zamožnych zamiežnikaŭ u ZŠA sfarmavałasia cełaja ekasistema: ahienctvy, jurydyčnyja firmy, kliniki i servisy niań, jakija hatovy zabrać novanarodžanych z radzilni. Baćki mohuć pierasyłać bijamateryjał za miažu i atrymać dzicia «z dastaŭkaj».

Jašče adzin prykład, jaki padaje WSJ, — kiraŭnik adukacyjnaj kampanii Van Chueju. Mužčyna naniaŭ amierykanskich madelaŭ i žančyn z navukovymi stupieniami ŭ jakaści donaraŭ jajcakletak, kab atrymać 10 dačok. Jaho meta — vyraścić ich i adnojčy vydać zamuž za suśvietnych lidaraŭ.

Pavialičyć

Amierykanskija ahienctvy surahatnaha maciarynstva pryznajucca, što časam zapyty klijentaŭ šakujuć. Adzin z uładalnikaŭ ahienctva ŭ Kalifornii raskazaŭ, što dapamahaŭ vykanać «zamovu» na 100 dziaciej, jakuju raźmierkavali pamiž niekalkimi firmami.

Z padobnym spažyvieckim staŭleńniem sutykajucca i jurysty, jakija vymušany tłumačyć bahatym klijentam roźnicu pamiž radzilniaj i kramaj.

«Ja skazała: «Nie, my nie supiermarkiet, kab pradavać optam»», — cytuje hazieta jurystku Amandu Trokśler, da jakoj źviarnułasia klijentka z prośbaj ab «źnižcy» za padbor adrazu 8‑10 surahatnych maci adnačasova.

Pradstaŭniki industryi pryznajuć i inšuju prablemu: kantrol nastolki słaby, što adsačyć, kolki paralelnych zamoŭ viadzie adzin i toj ža zakazčyk u roznych ahienctvach, amal niemahčyma.

Uładalnica adnaho z kalifarnijskich ahienctvaŭ raspaviała žurnalistam pra samotnaha baćku, jaki ŭpotaj zamoviŭ čatyroch dziaciej u roznych firmach. Kali jamu paviedamili pra chutkaje naradžeńnie čarhovaha niemaŭlaci, jon zapanikavaŭ: «My ŭžo i tak kłapocimsia pra dvaich!» Adnak, jak adznačyła ŭładalnica ahienctva, u adroźnieńnie ad kupli ŭ kramie, tut «šlachu nazad niama» — kali ty pieradumaŭ, «admianić» dzicia niemahčyma.

Palityčny rezanans

Natan Čžan, zasnavalnik sietki klinik IVF USA, jakaja pracuje ŭ ZŠA i Mieksicy i absłuhoŭvaje zamožnych kitajcaŭ, rastłumačyŭ vydańniu evalucyju rynku surahatnaha maciarynstva. Raniej jaho klijentami byli pieravažna baćki, jakija sprabavali abyści kitajskuju palityku «adno dzicia». Reč u tym, što dzieci, viernutyja ŭ Kitaj jak hramadzianie ZŠA, jurydyčna nie padpadali pad sistemu štrafaŭ i abmiežavańniaŭ KNR.

Palityka «adno dzicia» była admienienaja ŭ 2015 hodzie, ale popyt nie źnik — jon transfarmavaŭsia. Zusim niadaŭna źjaviłasia novaja katehoryja klijentaŭ — tak zvanyja «šalona bahatyja».

«Iłan Mask ciapier stanovicca ŭzoram dla pierajmańnia», — skazaŭ Čžan. Usio bolšaja kolkaść takich klijentaŭ, pa jaho słovach, zakazvajuć dziasiatki, a to i sotni dziaciej, narodžanych u ZŠA. Ich meta ŭžo nie prosta mieć naščadkaŭ, a «stvaryć niepachisnuju siamiejnuju dynastyju».

Hety biznes pryciahvaje ŭvahu ŭładaŭ abiedźviuch krain, choć reakcyja Piekina nieadnaznačnaja. Farmalna surahatnaje maciarynstva ŭ Kitai zabaroniena. Adnak, jak piša WSJ, urad zvyčajna zapluščvaje vočy na hramadzian, jakija źviartajucca pa takija pasłuhi za miažoj, i navat dazvalaje zamiežnym ahienctvam cicha rekłamavać siabie ŭnutry krainy.

Tym nie mienš, kali takija historyi stanoviacca publičnymi, heta vyklikaje skandały i žorstkuju reakcyju, bo hramadstva ličyć praktyku ekspłuatacyjaj. WSJ nahadvaje pra skandał ź ministram zamiežnych spraŭ Kitaja Cyń Hanam, jaki źnik paśla taho, jak vyśvietliłasia, što ŭ jaho była intryžka ź viadomaj televiadučaj, jakaja naradziła dzicia praz surahatnuju maci ŭ ZŠA.

U ZŠA taksama raście zaniepakojenaść. Sienatar-respublikaniec Ryk Skot unios zakonaprajekt ab zabaronie surahatnaha maciarynstva dla hramadzian niekatorych zamiežnych krain, uklučajučy Kitaj.

Jon spasłaŭsia na fiederalnaje rasśledavańnie ŭ Łos-Andželesie, u miežach jakoha ŭ pary kitajskaha pachodžańnia vyjavili bolš za dva dziasiatki dziaciej, amal usie ź jakich byli narodžanyja praz surahatnych maci za apošnija hady. Supracoŭniki FBR i Ministerstva ŭnutranaj biaśpieki ŭžo apytali niekatorych surahatnych maci, jakija pracavali z kitajskimi klijentami, adnak mety hetych dziejańniaŭ aficyjna nie tłumačylisia.

Tym nie mienš, niahledziačy na ryzyki, inviestary robiać staŭku na rost hetaha rynku, układvajučy hrošy ŭ sietki klinik pa lačeńni biaspłodździa, aryjentavanyja na azijackich baćkoŭ.

• 3
• 2
• 3
• 8
• 3
• 0
• 6
• 0