Syn Siarhieja Bulby źbiraje hrošy ŭ Polščy, prydumaŭšy sabie bijahrafiju vieterana i palityčnaha ŭciekača

«Kościa — heta chłopiec ź Biełarusi, jaki byŭ vymušany pakinuć Ajčynu z palityčnych pryčyn, vyjechaŭ va Ukrainu, dzie sprabavaŭ pačać usio spačatku. Kali vybuchła vajna, nie vahaŭsia ni chviliny. Ustupiŭ u šerahi USU i staŭ na abaronu kraju, jaki daŭ jamu dom i druhi šaniec. Paźniej los vyšturchnuŭ Kościu da Polščy. Tut jon padaŭ prašeńnie ab mižnarodnaj achovie i staŭ pracavać na budoŭli, kab mieć mahčymaść samastojna siabie ŭtrymlivać», — tak havorycca ŭ apisańni zboru na karyść Kanstancina Kalinoŭskaha, syna Siarhieja Čysłava (Bulby).

Hrošy patrebny dla reabilitacyi paśla padzieńnia z vyšyni, a taksama dla jašče adnoj apieracyi na ruce.

Zbor pravodzicca ad imia «siabroŭ Kości», miedycynskija dakumienty ŭ paćviardžeńnie historyi nie prykładzienyja. Na biełaruskich kraŭdfandynhavych placoŭkach hety zbor nie raźmiaščaŭsia. Čamu?

Mahčyma, tamu što takoje hieraičnaje vykładańnie ŭ realnaści zusim nie hieraičnaj bijahrafii syna Čysłava mocna zasmucić biełaruskaha čytača i biełaruskich dobraachvotnikaŭ. Adzin ź ich akurat i skinuŭ zbor u «Našu Nivu», supravadziŭšy jaho cyničnym niecenzurnym kamientarom. 

Što ž tam nie tak? 

Vyśviatlajecca, na momant pačatku vajny Čysłaŭ-małodšy sapraŭdy znachodziŭsia na terytoryi Ukrainy i vykazaŭ žadańnie dałučycca da «Azova», na bazie jakoha potym uźnik Połk Kalinoŭskaha. Kazaŭ, što jon palityčny aktyvist ź Biełarusi. 

Jon znachodziŭsia na trenirovačnaj bazie roŭna da momantu, pakul pryjšła vypiska na jaho ad «Kibierpartyzanaŭ». Ź jaje stała viadoma, što Kanstancin Kalinoŭski sapraŭdy mieŭ prablemy z zakonam, ale zusim nie praz palityku. 

U 2015 hodzie minaki vyklikali chutkuju čałavieku la padjezda, jaki byŭ pad kajfam. U špitali chutkaj dapamohi ŭ jaho pry sabie znajšli narkotyki Alfa-RVR i vyklikali milicyju — Čysłava-małodšaha asudzili na 3 hady kałonii.

U 2020‑m ni pavodle administracyjnych, ni kryminalnych spraŭ Kalinoŭskaha, jak vynikaje z baz, nie zatrymlivali — jaho imia ŭ bazach «Kibierpartyzan» nie maje teha «Biesparadki», jaki staviŭsia ŭsim, kaho sudzili praz palityku. Pra jahony pieraśled nie paviedamlali i pravaabaroncy.

Adnak u mai 2021 hoda Kanstancina ŭsio ž zatrymali — znoŭ z narkotykami, ciapier ź miefiedronam. Znoŭ zaviali kryminalnuju spravu. Praŭda, pa joj Čysłaŭ-małodšy nie sieŭ, a, budučy fihurantam, niejak apynuŭsia va Ukrainie — hetyja cmianyja padrabiaznaści, a taksama prychoŭvańnie faktaŭ bijahrafii i pastavili kropku na bajavoj karjery.

Čysłavu admovili ŭ pryniaćci ŭ Połk Kalinoŭskaha. Jon nie ŭdzielničaŭ u bajavych dziejańniach. Nieŭzabavie jon źjechaŭ u Polšču i atrymaŭ zabaronu na ŭjezd va Ukrainu. 

Značna paźniej — užo ŭ žniŭni 2023-ha, u adnym z pamyjnych milicejskich telehram-kanałaŭ apublikavali videa z Kanstancinam. Imavierna, zapis byŭ zrobleny padčas taho samaha zatrymańnia ŭ mai 2021-ha. 

Na videa chłopiec u kajdankach, siedziačy ŭ kabiniecie ŭpraŭleńnia narkakantrolu, u vidavočna źmienienym stanie śviadomaści adkazvaje na pytańni apieratyŭnika: «užyvaŭ «sabaku», «heta Alfa PvP», «užyvaju injekcyjna», «nie skažu, što asabliva mitynhavaŭ u 2020-m».

Pry hetym ciapier Čysłaŭ praciahvaje raskazvać vydumanyja padrabiaznaści ŭ miedyja z metaj zboru.

Tak, «Radyjo Svaboda» jon raskazvaŭ, što vychodziŭ na pratesty ŭ 2020, byŭ zatrymany i try miesiacy prasiadzieŭ u SIZA, ale nijakich dakumientaŭ nie zachavaŭ. Jon davodzić, što nibyta źjechaŭ ź Biełarusi ŭ pačatku 2021 hoda (choć napraŭdu ŭ mai 2021 hoda byŭ zatrymany z narkotykami), a taksama što jon dva miesiacy byŭ u Pałku Kalinoŭskaha i syšoŭ praz kanflikt sa štabam. Vyhladaje, što ŭsio pieraličanaje — chłuśnia.

«Naša Niva» źviarnułasia da Čysłava-Kalinoŭskaha z prośbaj padrabiaźniej raskazać pra charaktar atrymanych traŭm, padać dakumienty, a taksama bolš raskazać pra ŭdzieł u bajavych dziejańniach i palityčnym žyćci.

Kanstancin ciahnuŭ z adkazami, a potym napisaŭ tak: «Kali źbiaru poŭnuju infarmacyju, tady i adpišusia. Sprabuju vyśvietlić kankretnuju pryčynu padačy mianie ŭ śpisy Interpoła ŭ 2023 hodzie i padać usiu infarmacyju».

Pavialičyć

Siarhiej Bulba (raniejšaje proźvišča — Čysłaŭ) — były vajskoviec, u 1990‑ia byŭ adnym ź lidaraŭ «Biełaha lehijona». Adkazvaŭ za achovu Viktara Hančara. U 2010‑ch žyŭ va Ukrainie, uznačalvaŭ šerah fondaŭ. Paśla pačatku vajny pierabraŭsia ŭ Polšču, stvaryŭ fondy i tam. Staŭ fihurantam skandału z «Biełaruskim moładzievym chabam».

• 1
• 4
• 7
• 66
• 0
• 3
• 17
• 0