ZŠA mohuć paćvierdzić źniščeńnie kala traciny rakietnaha arsienału Irana

Čatyry surazmoŭcy ahienctva adznačyli, što status prykładna jašče traciny mienš zrazumieły, adnak bambardavańni, vierahodna, paškodzili, źniščyli abo pachavali hetyja rakiety ŭ padziemnych tunelach i bunkierach.

Adna z krynic raskazała, što raźvieddanyja adnosna mahčymaściaŭ Irana vykarystoŭvać bieśpiłotniki anałahičnyja. Surazmoŭca kaža, što isnuje peŭnaja ŭpeŭnienaść u źniščeńni kala traciny ź ich.

Reuters zaŭvažaje, što acenka, pra jakuju raniej nie paviedamlałasia, pakazvaje, što choć bolšaść iranskich rakiet abo źniščanyja, abo niedastupnyja, Tehieran usio jašče maje značny arsienał. Mahčyma, jon zmoža adnavić niekatoryja ciapier pachavanyja abo paškodžanyja rakiety paśla spynieńnia bajavych dziejańniaŭ.

Ahienctva adznačaje, što hetyja raźviedvalnyja danyja supiarečać publičnym zajavam prezidenta ZŠA Donalda Trampa pra toje, što ŭ Irana «zastałosia vielmi mała rakiet».

U adkaz na zapyt ab kamientaryi pradstaŭnik Pientahona zajaviŭ, što kolkaść atak iranskich rakiet i bieśpiłotnikaŭ skaraciłasia prykładna na 90% z pačatku vajny. Centralnaje kamandavańnie Uzbrojenych sił ZŠA «taksama paškodziła abo źniščyła bolš za 66% iranskich rakietnych, bieśpiłotnych i vajskova-marskich vytvorčych mahutnaściej i vierfiaŭ», dadaŭ čynoŭnik.

Adna krynica raskazała, što častka prablemy zaklučajecca ŭ vyznačeńni taho, kolki ŭsiaho iranskich rakiet zachoŭvałasia ŭ padziemnych bunkierach krainy da pačatku vajny.

Izrailskija vajskovyja čynoŭniki śćviardžajuć, što da kanfliktu Tehieran mieŭ 2500 balistyčnych rakiet, zdolnych dasiahnuć Izraila. Pavodle słoŭ vysokapastaŭlenaha izrailskaha vajskoŭca, bolš za 335 rakietnych puskavych ustanovak było «niejtralizavana». Heta składaje 70% puskavych mahutnaściaŭ Irana.

Izrailskija aficyjnyja asoby publična nie kažuć, kolki nasamreč rakiet, pavodle ich acenak, usio jašče maje Iran. Adnak u pryvatnych razmovach jany pryznajuć, što likvidavać apošnija 30% patencyjału Tehierana budzie ciažej.

Adnačasova z vajennymi dziejańniami praciahvajucca dypłamatyčnyja sproby spynić kanflikt. 25 sakavika ZŠA praz Pakistan nakiravali Iranu płan z 15 punktaŭ pa spynieńni vajny na Blizkim Uschodzie. Iran u svaju čarhu prapanuje ŭmovy spynieńnia ahniu z patrabavańniem vajennych reparacyj i zachavańniem suvierenitetu nad Armuzskim pralivam.

27 sakavika paviedamlałasia, što Pientahon razhladaje mahčymaść nakiravańnia da 10 tysiač amierykanskich vajskoŭcaŭ na Blizki Uschod na fonie napružanaści ź Iranam.

• 0
• 1
• 0
• 2
• 0
• 0
• 0
• 0