Dzie «Fłaminha» i nakolki jana efiektyŭnaja? Źjaviŭsia analiz usich viadomych atak našumiełymi ŭkrainskimi rakietami

Minuła ŭžo bolš za vosiem miesiacaŭ z momantu źjaŭleńnia pieršaha fota i charaktarystyk ukrainskaj kryłataj rakiety FP-5 «Fłaminha». Jana maje zajaŭlenuju dalokaść źniščeńnia da 3000 km i masu bajavoj častki — da 1100 kh.

Hety vyrab kampanii Fire Point vyklikaje ŭ ludziej jak skiepsis, tak i zachapleńnie. Z adnaho boku, viadoma pra vialikija mahutnaści vytvorčaści i adnosna nizkuju canu, z druhoha — pra «prostyja» technałahičnyja rašeńni i kanceptualnyja niedachopy, jakija mohuć upłyvać na efiektyŭnaść źniščeńnia.

Taksama doŭhi čas absalutna ničoha nie było viadoma pra jaje realnaje prymianieńnie ŭ bai. Tamu klučavoje pytańnie: ci zastajecca FP-5 «Fłaminha» ekśpierymientalnaj zbrojaj abo ŭžo pieratvarajecca ŭ paŭnavartasny instrumient źniščeńnia?

Pavialičyć

Jak ličyli?

Z adkrytych krynic viadoma ahułam pra šeść vieryfikavanych atak rakietami «Fłaminha».

Hałoŭny kanstruktar Fire Point Dzianis Štylerman u svaim Ch čas ad času publikuje videa zapuskaŭ rakiet FP-5. Hetyja publikacyi supadajuć z aficyjnymi spravazdačami Sił abarony pra vypadki prymianieńnia «Fłaminha» i adpaviednymi publikacyjami/fota na rasijskich infarmacyjnych resursach.

Samoj tolki infarmacyi pra zapuski mała, bo rakieta pavinna nie tolki dalacieć da abjekta, ale i trapić u jaho. Dla analizu dakładnaści rakiet «Oboronka» supastaviła spravazdačy vajskoŭcaŭ sa spadarožnikavymi zdymkami, jakija dazvalajuć adnosna dakładna vyznačyć vynik udaru.

Usiaho za ŭvieś čas u kadr trapili 23 zapuščanyja kryłatyja rakiety «Fłaminha». Ukrainskija OSINT-analityki identyfikavali, što da celi ź ich dalacieła 6, ale trapili ŭ patrebny abjekt tolki 2. Jašče adno traplańnie zastajecca sprečnym.

Pavialičyć

Dalej budzie razbor kožnaha ŭdaru. Ale pierad hetym važna adznačyć, što ŭsia pryviedzienaja infarmacyja — heta vynik apracoŭki danych tolki z adkrytych krynic. Realnaja kolkaść zapuskaŭ abo traplańniaŭ moža być bolšaj, a praporcyja zapuščanych rakiet da paražeńniaŭ — istotna adroźnivacca.

Debiut. Udar pa pamiežnaj bazie FSB u Krymie

Upieršyniu na šyrokuju publiku «Fłaminha» pakazaŭ siabie ŭ akupavanym horadzie Armiansk, na pamiežnaj zastavie FSB za 120 kiłamietraŭ ad linii sutyknieńnia. Tudy 31 žniŭnia pacelili Siły abarony Ukrainy. Ź jak minimum troch zapuščanych rakiet dakładna da abjekta dalacieła adna — jana pramachnułasia i ŭpała ŭ vadu pablizu bazy. Na zdymku vidać paškodžańnie budynka, ale jakim mienavita srodkam byŭ naniesieny ŭdar i ci adpaviadaje heta zajaŭlenaj mahutnaści «Fłaminha», dakładna skazać ciažka.

Z ulikam usiaho hetaha, heta byŭ pieršy vypadak, kali rakieta FP-5 naohuł dalacieła da rasijskaj celi i pakazała, što jana isnuje.

Pavialičyć

Druhi ŭdar. Sproba ataki na CEC u horadzie Aroł

13 listapada 2025 hoda Siły abarony Ukrainy pasprabavali parazić CEC u horadzie Aroł za bolš čym 170 km ad miažy. Było zapuščana jak minimum 4 rakiety, adnak na spadarožnikavych zdymkach kala abjekta śviežych śladoŭ paškodžańniaŭ abo padzieńnia rakiety nie znojdziena.

Vidavočna, što rakiety byli źbityja rasijskaj SPA. Adno źbićcio «Fłaminha», vierahodna, trapiła na videa, jakoje apublikavali ŭ OSINT-supołcy Exilenova+.

Pavialičyć

Treci ŭdar. Ataka na artyleryjski arsienał pablizu horada Katłubań. Pieršaje traplańnie

Arsienał Hałoŭnaha rakietna-artyleryjskaha ŭpraŭleńnia Rasii (HRAU) u Katłubani Vałhahradskaj vobłaści maje važnaje značeńnie dla rasijskaha vojska. Na abjekcie ŭźviedzienyja ŭmacavanyja bunkiery dla zachoŭvańnia bojeprypasaŭ, jakija faktyčna niedasiažnyja dla zvyčajnych BPŁA. Mienavita tamu dla źniščeńnia takich celaŭ prymianili kryłatuju rakietu FP-5 «Fłaminha».

12 lutaha na arsienał HRAU było vypuščana jak minimum 6 kryłatych rakiet na adlehłaść bolš za 500 km ad linii sutyknieńnia. Z šaści dalacieła tolki adna, trapiŭšy ŭ bunkier płoščaj 1200 m². U vyniku pačałasia detanacyja bojeprypasaŭ, pamiaškańnie było źniščana.

Pavialičyć

Heta stała pieršym zafiksavanym traplańniem «Fłaminha» i pieršym udaram na takuju hłybiniu padobnymi rakietami.

Čaćviorty. Udar pa palihonie «Kapuścin Jar», miesca dysłakacyi «Arešnika». Promach

Na praciahu studzienia 2026 hoda Siły abarony Ukrainy atakavali palihon «Kapuścin Jar» u Astrachanskaj vobłaści, a mienavita — placoŭku №105, ź jakoj zapuskajuć rakiety kompleksu «Arešnik». 27 studzienia pa abjekcie było zapuščana jak minimum čatyry rakiety. Ź ich dalacieła tolki adna. Ale jana była albo źbitaja na padlocie, albo nie trapiła i ŭpała pablizu aharodžy placoŭki. Kratar ad jaje vidać na spadarožnikavym zdymku.

Pavialičyć

Praŭda, paražeńnie abjekta ŭ hety pieryjad usio ž adbyłosia. Jak pišuć analityki supołki «KibierBorošno», heta byli ŭkrainskija bieśpiłotniki, a nie rakiety.

Piaty. Udar pa zavodzie pa vytvorčaści «Iskanderaŭ» u horadzie Votkinsk va Udmurcii. Traplańnie «ŭ jabłyčka»

Ciapier — miesca, dzie «Fłaminha» pakazaŭ siabie najlepšym čynam. Paražeńnie vielmi važnaha zavoda rasijskaha abaronnaha kompleksu na adlehłaści bolš za 1300 km ad miažy.

AT «Votkinski zavod» śpiecyjalizujecca na vytvorčaści balistyčnych rakiet, u pryvatnaści MBR typu RS-24 «Jars» i ruchavikoŭ dla apieratyŭna-taktyčnych rakiet kompleksaŭ «Iskander».

Adna z troch vypuščanych rakiet trapiła ŭ cech №22 u halvana-štampovačnym 19‑m korpusie, paviedamlajuć śpiecyjalisty supołki «KibierBorošno».

«Paražeńnie padobnaha cecha moža mieć krytyčny ŭpłyŭ na vytvorčy cykł, pakolki mienavita tut farmirujecca bazavaja kanstrukcyja karpusoŭ vyrabaŭ i vykonvajecca ich technałahičnaja padrychtoŭka da finalnych etapaŭ zborki», — pišuć analityki.

Pavialičyć

Usie detali adnosna nastupstvaŭ niaviadomyja, ale heta vyhladaje jak surjozny ŭdar pa pradpryjemstvie.

Šosty. Promach pa budynkach zavoda «Pramsintez» u horadzie Čapajeŭsk

28 sakavika 2026 hoda Siły abarony Ukrainy zapuścili jak minimum 3 rakiety na zavod «Pramsintez» u Čapajeŭsku Samarskaj vobłaści. Heta pradpryjemstva śpiecyjalizujecca na vytvorčaści kampanientaŭ vybuchovych rečyvaŭ, jakija vykarystoŭvajucca dla zaradu bojeprypasaŭ.

Padčas hetaj ataki ŭkrainskija rakiety trapili na videa, jakija apublikavali ŭ supołcy Exilenova+. Z troch rakiet da abjekta dalacieła dźvie, adnak abiedźvie nie trapili ŭ patrebny budynak, upaŭšy pobač z cechami. Vierahodna, rakiety albo byli źbityja ŭ apošni momant, albo začapilisia za hromaadvodnuju viežu pobač. Udar pa Čapajeŭsku moh by być paśpiachovym.

Jak bačym z najaŭnych danych, FP-5 «Fłaminha» dahetul zastajecca chutčej ekśpierymientalnaj zbrojaj, čym pastajannym srodkam paražeńnia. Časta srodki dalatajuć da abjektaŭ, ale nie traplajuć u patrebnaje miesca.

Prablemy z dakładnaściu pryznajuć i ŭ samoj kampanii.

«U «Fłaminha» prablemy z dakładnaściu ŭ značnaj stupieni źviazanyja z tym, što paloty vykonvajucca na vielmi nizkich vyšyniach», — skazaŭ hałoŭny kanstruktar Dzianis Štylerman u intervju Dźmitryju Hardonu.

Składana rabić vysnovy pra efiektyŭnaść usioj prahramy, pakolki z adkrytych krynic viadoma tolki pra 23 paćvierdžanyja puski, u toj čas jak jašče vosieńniu Štylerman u intervju vydańniu «Dzierkało tidžnia» zajaŭlaŭ pra vytvorčaść 2—3 rakiet u sutki.

Heta aznačaje, što vyniki pieravažnaj bolšaści puskaŭ zastajucca nieviadomymi šyrokaj publicy.

• 6
• 0
• 0
• 1
• 0
• 0
• 0
• 0