Zialenski anansavaŭ reformu USU: zarobki piechacincaŭ vyrastuć da 9 tysiač dalaraŭ
Prezident Ukrainy Uładzimir Zialenski daručyŭ uradu i vajskovamu kamandavańniu značna pavialičyć hrašovaje zabieśpiačeńnie vajskoŭcaŭ. Reforma armii aficyjna startuje ŭžo ŭ hetym červieni.
— Pastaviŭ zadaču istotna pavialičyć hrašovaje zabieśpiačeńnie z ulikam pryncypu spraviadlivaści, a mienavita — bajavyja zadačy na pieradavoj, realny bajavy i kiraŭničy dośvied, efiektyŭnaść vajskoŭca pavinny harantavać pavieličeńnie vypłat, — zajaviŭ Zialenski.
Zhodna z ahučanaj formułaj, minimalny zarobak dla tyłavych pasadaŭ składzie nie mienš za 30 tysiač hryŭniaŭ (kala 700 dalaraŭ).
Dla tych, chto znachodzicca na bajavych pazicyjach, sumy buduć u razy vyšejšyja. Asablivaja ŭvaha nadajecca kamandnamu składu — bajavym siaržantam i aficeram, uzrovień vypłat jakim taksama budzie adčuvalna pavyšany.
Prezident Ukrainy asobna vyłučyŭ rolu piechacincaŭ, dla jakich buduć uviedzieny śpiecyjalnyja kantrakty, a pamier vypłat dla ich składzie ad 5,5 tysiač da 9 tysiač dalaraŭ.
Taksama Zialenski abviaściŭ paetapnuju demabilizacyju ŭžo ŭ 2026 hodzie.
— Ja daručyŭ umacavać kantraktnuju sistemu va USU takim čynam, kab, pašyrajučy kantraktny kampanient, my mahli zabiaśpiečyć peŭnyja terminy słužby i mahčymaść — pačynajučy z hetaha hoda — pastupovaha vyzvaleńnia ad słužby raniej mabilizavanych na padstavie vyraznych časavych kryteryjaŭ, — skazaŭ jon.
Kamientary