Chto žyvie ŭ łukašenkaŭskim ekśpierymientalnym pasiołku pobač z prapahandystam Turam?
Niedaloka ad Minska budujecca katedžny pasiołak Novaja Akolica, jaki Łukašenka asabista prainśpiektavaŭ i dazvoliŭ uzvodzić tam «pa-haspadarsku». Vydańnie «Lusterka» daviedałasia, kamu dastalisia ŭ im učastki. Siarod navasiołaŭ — prapahandyst, načalnik minskaj DAI i supracoŭnik staličnaha kryminalnaha vyšuku.
«Idzi i buduj pa-haspadarsku»
Asablivaść Novaj Akolicy ŭ tym, što damy tam budujuć 12 roznych dziaržpradpryjemstvaŭ. Pabudovy adroźnivajucca pamiž saboj: jość draŭlanyja, cahlanyja, hazasilikatnyja. U publikacyjach heta miesca nazyvali «hrandyjoznym budaŭnictvam» pavodle «ambicyjnaha płana»: usiaho tam źbirajucca ŭźvieści bolš za 200 małapaviarchovych damoŭ na terytoryi amal u 50 hiektaraŭ.
U 2023 hodzie budoŭlu naviedvaŭ Alaksandr Łukašenka. Jon śćviardžaŭ, što asabista inicyjavaŭ prajekt i dazvoliŭ vice-premjeru Anatolu Sivaku dziejničać pavodle svajho mierkavańnia: «I ja jamu skazaŭ: idzi i buduj pa-haspadarsku, tak, jak ty paličyš patrebnym».
Palityku tady raskazali, što ŭ Novaj Akolicy zabudoŭščyki sprabavali zrabić budoŭlu tańniejšaj i paskoryć budaŭnictva pryvatnych damoŭ, nazyvajučy canu ŭ 2400 rubloŭ za kvadratny mietr. Praŭda, zaminali «biurakratyčnyja pieraškody», praź jakija vynikovy košt doma atrymlivaŭsia vyšejšym. Łukašenku prapanavali «ŭnieści źmieny ŭ najaŭnyja narmatyŭnyja pravavyja akty, kab prybrać hetyja niedachopy», — toj, vidać z usiaho, pahadziŭsia.
Palityk dzialiŭsia, jak prykłaŭ ruku da prajekta: asabista paprasiŭ zrabić padjaznyja darohi ź bietonu, a nie z asfaltu. Jašče adna «inavacyja»: na vulicach unutry zabudovy praduhledžany adnabakovy ruch, a hruzavy i techničny transpart moža jeździć tolki pa ŭskrainie terytoryi. Pa fota z pasiołka možna razhledzieć, što pamiž damami niama aharodžaŭ, taksama nie vidać haražoŭ i naviesaŭ dla aŭto.
Prapahandyst, kiraŭnik DAI i načalnik kryminalnaha vyšuku
Ciapier častka katedžaŭ u Novaj Akolicy ŭžo hatovaja. «Lusterka» atrymała ad krynicy dakumienty pra ich uładalnikaŭ, a pry dapamozie inicyjatyvy «Kibierpartyzany» sabrała pra ich źviestki.
Jašče ŭ lutym 2025 hoda dom u Novaj Akolicy nabyŭ prapahandyst ANT Ihar Tur, jaki paźniej z teleekrana tłumačyŭ biełarusam, jak pravilna pracavać, kab zarablać. Interjery jahonaha katedža tak časta źjaŭlalisia ŭ sacsietkach, što žurnalisty «Našaj Nivy» zmahli pa fota navat vyličyć jaho dakładny adras.
Niepadalok ad supracoŭnika dziaržTB pasialilisia vysokija čyny minskaj milicyi: naprykład, načalnik adździeła vyšukovaj raboty Upraŭleńnia kryminalnaha vyšuku Andrej Piatrovič i Siarhiej Babič, jaki ŭznačalvaje staličnuju DAI. Adnapaviarchovymi damami tam abzavialisia i milicyjaniery z rajcentraŭ Minskaj vobłaści — Kapyla, Vałožyna i Łahojska.
Ułasnyja mietry ŭ Novaj Akolicy atrymaŭ Andrej Prysmycki, jaki ŭ minułym uznačalvaŭ štab Departamienta achovy MUS (čym jon zajmajecca zaraz, nieviadoma). U ananimnym tyktok-akaŭncie Andrej časam dzielicca krajavidami žyćcia ŭ pasiołku: uborkaj śniehu pierad domam, samalotami, što pralatajuć nad učastkam, i šašłykami ŭ dvary.
Miarkujučy pa dakumientach, navasioły atrymlivali žyllo roznymi šlachami. Niekatoryja arandujuć ziamlu za 30—40 rubloŭ, inšym jana dastałasia ŭ «pažyćciovaje spadčynnaje vałodańnie» pa rašeńni miascovych uładaŭ.
Jak minimum čaćviora słužačych — u tym liku Babič i Prysmycki — aformili na katedžy ipateku pry dapamozie struktur MUS. Sumy — ad 230 da 338 tysiač rubloŭ, vypłačvać ich treba na praciahu 15 hadoŭ. Pry hetym dvum siłavikam ź Minskaj vobłaści adnapaviarchoviki dastalisia biazvypłatna. Prapahandyst Ihar Tur, miarkujučy pa dakumientach, kupiŭ svoj dom biez rasterminoŭki.
«Śpiecnaz Karpiankova» i dypłamaty
U «staroj» častcy vioski Akolica raźmiaščajecca vajskovy haradok vajskovaj čaści 3310. Jana adnosicca da ŭnutranych vojskaŭ MUS, imi ciapier kamanduje namieśnik kiraŭnika MUS Mikałaj Karpiankoŭ. Na bazie hetaj čaści ŭ 2023 hodzie źjaviŭsia atrad śpiecyjalnaha pryznačeńnia «Tarnada», u zadačy jakoha ŭklučyli biaśpieku «vyšejšych słužbovych asob», achovu dziaržmiažy i padtrymku pry zatrymańni złačyncaŭ. Viasnoj 2026 hoda ŭsiu čaść vyrašyli pieraŭtvaryć u bryhadu śpiecyjalnaha pryznačeńnia.
Mienavita v/č 3310 atrymała ŭ arendu 18 učastkaŭ u ekśpierymientalnaj Novaj Akolicy. Vierahodna, u katedžach raźmiaścilisia słužboŭcy čaści. Damovu zaklučyli jašče ŭ 2024 hodzie na sto hadoŭ napierad, arendnaja płata za ŭsio skłała 667 rubloŭ u hod.
Pa niekalki ŭčastkaŭ vydzielili i inšym siłavym padraździaleńniam: HUUS Minharvykankama, UUS Minabłvykankama, Departamientu finansaŭ i tyłu MUS, Departamientu achovy, Departamientu vykanańnia pakarańniaŭ. Umovy padobnyja: arenda na sto hadoŭ, hadavaja płata — ad 34 da 40 rubloŭ za ŭčastak.
Viasnoj 2026 hoda jašče piać učastkaŭ pieradali ŭ pastajannaje karystańnie «Dypservisu» — heta dziaržaŭnaja arhanizacyja, jakaja absłuhoŭvaje dypłamatyčny korpus i aficyjnyja delehacyi. Jana ŭvachodzić u strukturu Kiraŭnictva spravami Łukašenki, zdaje ŭ arendu administracyjnyja płoščy i žyllo, a taksama vałodaje kramami biaspošlinnaha handlu.
Ci mohuć pasialicca ŭ Novaj Akolicy zvyčajnyja ludzi? Vierahodna, tak, ale pakul ich niama. Dva damy razam z učastkami vystaŭlali na aŭkcyjon u lipieni 2025 hoda. Pačatkovaja cana za bolš prastorny dom skłała 365 tysiač rubloŭ (na toj momant — 123 tysiačy dalaraŭ), za bolš ścipły varyjant — 284,9 tysiačy rubloŭ (95 tysiač dalaraŭ). Padobna na toje, što tady ich nichto nie kupiŭ: abjekty praciahvajuć ličycca za Upraŭleńniem kapitalnaha budaŭnictva Minabłvykankama.
Ihar Tur z žonkaj pasialiŭsia ŭ łukašenkaŭskim ekśpierymientalnym pasiołku. Kab mietr jamu abyšoŭsia tańniej, usie kamunikacyi apłacili ź biudžetu
Ihar Tur patraciŭ minimum 30 tysiač na premijalnuju kuchniu FOTA
U Akolicy pad Minskam na zahad Łukašenki pačynajuć budavać katedžny pasiołak dla vajskoŭcaŭ
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać
Ciapier čytajuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam7
Kamientary
U čym prablema z kamientarom?