Biełaruska nie moža vyjechać z Polščy praz redki sposab lehalizacyi. Kab heta vypravić, treba mianiać zakon

Usio tamu, što ŭ Polščy žančyna lehalizavanaja davoli redkim dla biełarusaŭ sposabam — praz «kartu pobytu» jak žonka hramadzianina ES, ale nie hramadzianina Polščy. U vyniku ŭ Polščy žančyna znachodzicca lehalna, a voś vyjechać za jaje miežy nie moža. Vyvučyŭšy hety vypadak, namieśnik polskaha ambudsmiena pa pravach čałavieka prapanavaŭ źmianić zakon, kab likvidavać prahał u sistemie.

Polšča davoli łajalna stavicca da hramadzian Biełarusi, u jakich skončyŭsia pašpart. Pakolki pa palityčnych pryčynach mnohija ź ich nie mohuć viarnucca na radzimu i aformić novaje paśviedčańnie asoby, dla biełarusaŭ praduhledžany sproščany paradak atrymańnia polskaha prajaznoha dakumienta — časovaj zamieny pašparta. Dla hetaha dastatkova mieć DNŽ (dazvoł na žycharstva, u tym liku časovy), vydadzieny na luboj padstavie.

Adznačym, što pad DNŽ u hetym vypadku majucca na ŭvazie karty pobytu: časovy pobyt, stały pobyt, karta doŭhaterminovaha rezidenta ES, a taksama karty, atrymanyja na padstavie mižnarodnaj abarony. Hetyja sposaby lehalizacyi rehłamientavanyja zakonam ab zamiežnikach. Jak praviła, biełarusy vykarystoŭvajuć adzin z hetych miechanizmaŭ.

Adnak u Polščy jość asobny dakumient — karta pobytu člena siamji hramadzianina ES. Jaje vydača traplaje pad inšy zakon — ad 14 lipienia 2006 hoda, jaki rehuluje znachodžańnie ŭ Polščy hramadzian inšych krain ES i členaŭ ich siemjaŭ. Naprykład, biełaruska, jakaja vyjdzie zamuž za hramadzianina Francyi, jaki žyvie ŭ Polščy, zmoža aformić takuju kartu, kali ŭ jaje niama hramadzianstva ES i muž i žonka majuć namier žyć u Polščy bolš za try miesiacy.

U adroźnieńnie ad zvyčajnych dla biełarusaŭ kart pobytu, karta pobytu člena siamji hramadzianina ES nie adnosicca do dakumientaŭ, na padstavie jakich možna atrymać polski prajazny dakumient zamiežnika.

Navat polskija karani nie dapamahli

Biełaruska, vypadak jakoj pryvodzić namieśnik ambudsmiena pa pravach čałavieka Stanisłaŭ Traciuk, sutyknułasia mienavita z hetaj supiarečnaściu. Pa palityčnych pryčynach jana nie moža atrymać novy pašpart u Biełarusi, a polski prajazny dakumient joj jak žoncy hramadzianina ES vydavać nie mohuć.

U žančyny polskija karani, dziakujučy jakim jana atrymała kartu palaka, ale navat heta nie źmianiaje situacyju. Bo ŭ Polščy jana lehalizavanaja nie na padstavie karty stałaha pobytu, jakuju atrymlivajuć pa karaniach, a jak žonka hramadzianina ES, ale nie hramadzianina Polščy.

Atrymlivajecca, u Polščy žančyna znachodzicca lehalna, ale bieź dziejnaha prajaznoha dakumienta vyjechać za miežy krainy nie moža.

«Heta pryvodzić da sistemnaha prahału ŭ pravie, nastupstvam jakoha źjaŭlajecca faktyčnaje «źniavoleńnie» zamiežnika ŭ adnym mihracyjnym režymie biez mahčymaści skarystacca instrumientami abarony, praduhledžanymi dla hramadzian trecich dziaržaŭ, i biez mahčymaści pakinuć terytoryju Polščy, niahledziačy na najaŭnaść statusu člena siamji hramadzianina ES», — piša Traciuk u liście na imia ministra ŭnutranych spraŭ i administracyi Polščy Marcina Kiarvińskaha.

Jon adznačyŭ, što zakanadaŭca ŭžo raniej pryznaŭ vyklučnaść situacyi hramadzian Biełarusi, dazvoliŭšy im atrymlivać polski prajazny dakumient, kali adsutničaje mahčymaść atrymać pašpart krainy pachodžańnia. Tamu niezrazumieła, čamu hetaja abarona nie raspaŭsiudžvajecca na hramadzian Biełarusi, jakija zaklučyli šlub z hramadzianinam ES i lehalizavali svajo znachodžańnie ŭ Polščy jak členy siamji hramadzianina ES.

Što možna zrabić

Traciuk adznačaje, što prahał, jaki ŭtvaryŭsia ŭ sistemie, moža parušać prava na pavahu da pryvatnaha i siamiejnaha žyćcia, pryncyp davieru hramadzian i zamiežnikaŭ da dziaržavy i ŭvodzić «nieabhruntavanyja adroźnieńni ŭ stanoviščy zamiežnikaŭ u zaležnaści ad farmalnaha mihracyjnaha režymu».

«Adsutnaść luboha prajaznoha dakumienta robić niemahčymym narmalnaje funkcyjanavańnie ŭ pravavym abarocie, stvaraje ciažkaści dla siamiejnaha žyćcia, a ŭ krajnich vypadkach moža pryvieści da stanu faktyčnaj adsutnaści hramadzianstva (apatrydyzmu)», — ličyć Traciuk.

U suviazi z hetym namieśnik ambudsmiena paprasiŭ ministra Marcina Kiarvińskaha razhledzieć mahčymaść vystavić zakanadaŭčuju inicyjatyvu, jakaja dazvoliła b atrymlivać polski prajazny dakumient na padstavie karty pobytu člena siamji hramadzianina ES. Abo ž praduhledzieć mahčymaść dla źmieny ŭ asablivych vypadkach mihracyjnaha režymu, to-bok lehalizacyi na asnovie kartaŭ pobytu, pieraličanych u zakonie ab zamiežnikach. Da takich asablivych vypadkaŭ moža adnosicca pastajannaja niemahčymaść karystacca konsulskaj abaronaj dziaržavy pachodžańnia.

Nie pieršy vypadak

Choć situacyja, u jakoj apynułasia biełaruska, davoli redkaja, jaje nielha nazvać vyklučnaj. U studzieni ŭžo była havorka pra padobny kiejs. Niekalki hadoŭ tamu Maryna (imiony źmienienyja) emihravała ź Biełarusi ŭ Litvu. Tam dziaŭčyna paznajomiłasia ź Vitaŭtasam, hramadzianinam hetaj krainy, i vyjšła za jaho zamuž. Potym jany pierajechali ŭ Polšču, dzie Maryna atrymała kartu pobytu na piać hadoŭ jak žonka hramadzianina ES.

U 2027 hodzie zakančvajecca termin dziejańnia biełaruskaha pašparta Maryny, a viarnucca ŭ Biełaruś pa novy jana nie moža praz ryzyku pieraśledu. Siamja stała zadumvacca, što rabić dalej. I taksama sutyknułasia z tym, što karta pobytu ŭ pieraliku dakumientaŭ, jakija dajuć prava na polski prajazny dakumient, nie zhadanaja.

«Jurysty pavinšavali mianie z atrymańniem karty i skazali iści rabić narmalny DNŽ», — raskazała Maryna.

Jana płanavała atrymać u Polščy pracoŭny DNŽ, a potym užo ź im — prajazny dakumient zamiežnika. Ale sumniavałasia, jak buduć spałučacca dva roznyja mihracyjnyja statusy.

• 1
• 1
• 1
• 2
• 0
• 0
• 1
• 0