Na niadzielu i paniadziełak u krainie abvieščany čyrvony, samy vysoki, uzrovień niebiaśpieki z-za śpioki. Pa Bresckaj vobłaści čakajecca da +39°C, u Minsku da +35°C.
U telehram-kanale «Miedycyna Minska» dajecca niekalki paradaŭ.
Asnova racyjonu — vada: picie zvyčajnuju niehazavanuju abo minieralnuju vadu, navat kali nie adčuvajecie smahi.
Tempieratura napojaŭ: vadkaść pavinna być pakajovaj tempieratury abo źlohku astudžanaj. Ledzianaja vada pavolniej zasvojvajecca i ŭzmacniaje potavydzialeńnie.
Karysnyja alternatyvy: mors, raźviedzienyja soki, kiefir abo haračy zialony čaj.
Strohija tabu: admoŭciesia ad ałkaholu (jon mocna abiazvodžvaje), napojaŭ z vysokim utrymańniem kafieinu i sałodkich hazirovak.
Lohkaje mieniu: pierajdzicie na śviežuju harodninu, sadavinu i chałodnyja supy. Haračaja, tłustaja i białkovaja ježa stvaraje dadatkovuju ciepłavuju nahruzku na arhanizm.
Pravilnaje adzieńnie: nasicie svabodnyja rečy śvietłych koleraŭ z naturalnych tkanin (bavoŭna, lon) i abaviazkova apranajcie hałaŭny ŭbor.
Biaśpiečnaje astudžeńnie: nastrojcie kandycyjanier na 23—25 hradusaŭ. Zanadta nizkaja tempieratura (nižej 18 hradusaŭ) pahražaje prastudnymi zachvorvańniami i spazmam sasudaŭ pry vychadzie na vulicu.
Dapamoha biez kandycyjaniera: prymajcie prachałodny duš abo kładzicie vilhotny ručnik na šyju. Nakirujcie vientylatar na jomistaść z chałodnaj vadoj abo lodam.
Praviły kupańnia: zachodźcie ŭ vadajomy pastupova. Rezki skačok u chałodnuju vadu paśla śpioki moža spravakavać niebiaśpiečny spazm sasudaŭ abo spynieńnie dychańnia.
Ludziam z chvarobami serca i hipiertanijaj: rehularna vymiarajcie arteryjalny cisk i stroha vykonvajcie hrafik pryjomu lekaŭ. Pa ŭzhadnieńni z kardyjołaham moža spatrebicca pryjom preparataŭ z kalijem i mahnijem.
U pažyłych ludziej i dziaciej: miechanizmy termarehulacyi pracujuć słabiej.
Asabliva niebiaśpiečnyja «trapičnyja nočy» (kali tempieratura nočču nie apuskajecca nižej za +20 °C), bo arhanizm nie paśpiavaje adnavicca padčas snu.
Ludzi ź lišniaj vahoj i dyjabietam: vam patrebny bolš časty adpačynak u cieni i žorstki kantrol uzroŭniu cukru i abjomu vypitaj vady.
Simptomy ciepłavoha ŭdaru (kali patrebna dapamoha):
— nieadkładna pierajdzicie ŭ cień abo prachałodnaje pamiaškańnie i vykličcie 103:
— mocny hałaŭny bol i paciamnieńnie ŭ vačach.
— młosnaść, vanity, raptoŭnaja słabaść.
— pačaščany puls i pačyrvanieńnie skury.
— hałavakružeńnie abo strata prytomnaści.
Kamientary
Usio ŭžo daŭno vynajdziena. Ale mnie bolš padabajucca praktyki biehiemota, voś pasprabujcie, nie paškadujecie...