Dla raku padstraŭnikavaj załozy, adnoj z samych ciažkich ankałahičnych chvarob, upieršyniu za doŭhi čas atrymany vyniki, jakija mohuć źmianić padychody da terapii. Ekśpierymientalny preparat daraksonrasib (daraxonrasib) padvoiŭ siaredniuju praciahłaść žyćcia ŭdzielnikaŭ kliničnaha daśledavańnia.
Padstraŭnikavaja załoza vykonvaje ŭ arhaniźmie čałavieka žyćciova važnyja funkcyi: jana vypracoŭvaje fiermienty dla rasščapleńnia ježy i insulin, nieabchodny dla rehulavańnia ŭzroŭniu cukru ŭ kryvi. Adnak mienavita hety orhan źjaŭlajecca miescam uźniknieńnia zachvorvańnia, jakoje statystyčna ličycca samym niebiaśpiečnym siarod usich vidaŭ raku.
Na siońnia pakazčyki vyžyvalnaści pacyjentaŭ z dyjahnazam raku padstraŭnikavaj załozy zastajucca nizkimi. Mienš za 15% ź ich pražyvajuć piać hadoŭ paśla pastanoŭki dyjahnazu. Kali ž na momant vyjaŭleńnia chvaroby jana ŭžo dała mietastazy ŭ inšyja orhany, piacihadovaja vyžyvalnaść nie dasiahaje i 4%.
Praź niešmatlikija i nievidavočnyja simptomy chvarobu časta dyjahnastujuć na poźnich stadyjach, i na praciahu niekalkich dziesiacihodździaŭ u jaje lačeńni nie nazirałasia nijakaha prahresu. Ale ŭ hetym hodzie, jak paviedamlaje Forskning.no, na najbujniejšaj suśvietnaj ankałahičnaj kanfierencyi ŭ ZŠA byli pradstaŭleny vyniki kliničnych vyprabavańniaŭ, jakija śpiecyjalisty nazyvajuć surjoznym krokam napierad u lačeńni hetaj adnoj z samych składanych formaŭ ankałohii.
U mižnarodnaje daśledavańni, jakoje pravodziłasia ŭ šaści dziasiatkach kliničnych centraŭ u ZŠA, Francyi, Hiermanii, Italii, Ispanii i Japonii, udzielničali kala 500 pacyjentaŭ u jakich rak padstraŭnikavaj załozy ŭžo raspaŭsiudziŭsia na inšyja orhany. Usie jany raniej prajšli standartnaje lačeńnie. Chvorych vypadkovym čynam padzialili na dźvie hrupy: adna praciahvała atrymlivać chimijaterapiju, druhaja prymała ekśpierymientalny preparat daraksonrasib (daraxonrasib) u tabletkach.
Efiektyŭnaść lačeńnia daśledčyki aceńvali pavodle miedyjannaj vyžyvalnaści — pakazčyka, jaki ŭ ankałohii ličycca bolš infarmatyŭnym za siaredniuju praciahłaść žyćcia, bo mienš zaležyć ad asobnych nietypovych vypadkaŭ — vielmi karotkaha abo vielmi praciahłaha žyćcia. U pacyjentaŭ, jakija atrymlivali chimijaterapiju, jana skłała 6,6—6,7 miesiaca, a ŭ tych, chto prymaŭ daraksonrasib, — 13,2 miesiaca.
Daśledavańnie pakazała nie tolki bolšuju efiektyŭnaść novaha preparatu, ale i lepšuju pieranosnaść. Z-za pabočnych efiektaŭ lačeńnie daraksonrasibam byli vymušanyja spynić tolki 1,2% pacyjentaŭ, u toj čas jak u hrupie chimijaterapii heta zrabili 11,2% udzielnikaŭ.
Pryncyp dziejańnia
Jak tłumačać śpiecyjalisty, novy preparat dziejničaje na białok siamiejstva RAS, jaki rehuluje rost i dzialeńnie kletak. U 90% pacyjentaŭ z rakam padstraŭnikavaj załozy mutacyja zakranaje hien KRAS, u vyniku čaho adpaviedny białok pastajanna zastajecca aktyŭnym i stymuluje rost puchliny. Daraksonrasib błakuje hety patałahičny sihnał i «vyklučaje» białok.
Śpiecyjalisty miarkujuć, što taki tarhietny padychod dazvalaje dasiahnuć značnaha kantrolu nad chvarobaj, navat kali efiekt pakul zastajecca abmiežavanym u časie.
Pakul novy preparat nie atrymaŭ rehistracyi ni ŭ ZŠA, ni ŭ Jeŭrapiejskim sajuzie. Tym nie mienš, u Złučanych Štatach užo zapuskajucca prahramy pašyranaha dostupu, jakija dazvalajuć pacyjentam u krytyčnym stanie atrymlivać jaho pa-za kliničnymi vyprabavańniami.
U Jeŭropie preparat pakul dastupny tolki ŭ ramkach navukovych prajektaŭ. Najbližejšym časam zapłanavany novyja kliničnyja daśledavańni, u jakich voźmuć udzieł pacyjenty z upieršyniu vyjaŭlenym rakam. Navukoŭcy płanujuć paraŭnać efiektyŭnaść monaterapii novym preparatam i jaho kambinacyi z chimijaterapijaj. Dakładnyja terminy ŭkaranieńnia lekaŭ u šyrokuju praktyku pakul nie vyznačany, pakolki patrabujecca bolš źviestak ab ich dziejańni na roznych etapach chvaroby.
Daśledčyki miarkujuć, što patencyjał daraksonrasibu nie abmiažoŭvajecca tolki rakam padstraŭnikavaj załozy. Pakolki mutacyi KRAS źjaŭlajucca ruchavikom mnohich ankałahičnych pracesaŭ, daśledčyki vyvučajuć mahčymaść prymianieńnia daraksonrasibu pry inšych dyjahnazach, u pryvatnaści, pry raku lohkich. Heta daje nadzieju na stvareńnie bolš efiektyŭnych pratakołaŭ lekavańnia dla šyrokaha koła pacyjentaŭ u budučyni.
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary