Pahladzieli, jakuju sumu treba rychtavać biełarusu, jaki choča pierakanacca ŭ tym, što haduje svajo dzicia.
DNK-testy ŭ Biełarusi robiać jak dziaržaŭnyja ŭstanovy, tak i pryvatnyja.
Naprykład, u pryvatnym Malekularnym hienietyčnym centry «DTŁ» samy biudžetny varyjant kaštuje 249 rubloŭ — heta pry ŭmovie taho, što vynik pryjdziecca čakać try dni. Za dadatkovaha ŭdzielnika (naprykład, kali jość dva kandydaty na baćkoŭstva) pryjdziecca dapłacić 149 rubloŭ.
I jašče stolki ž, kali ž uzor dla DNK-testu niestandartny. Standartnym ličycca tolki mazok z rota (heta kali sa zvarotnaha boku ščaki vodziać vatnaj pałačkaj). Usie astatnija — niestandartnyja. Varyjanty jość roznyja: ad vałasoŭ i paznohciaŭ da vušnoj siery i pažavanaj žujki.
Ekspres-test zrobiać za 500 rubloŭ (tam vyniki abiacajuć užo praz 8 hadzin).
Kali test robicca dla suda, jon budzie kaštavać 400 rubloŭ. Darečy, zrabić test na baćkoŭstva možna i padčas ciažarnaści — kaštuje heta amal 2400 rubloŭ. Vyniki abiacajuć praz 10‑15 dzion.
Paviedamlajecca, što nad testami paralelna pracujuć dźvie roznyja hrupy ekśpiertaŭ, kab paźbiehnuć mahčymaj pamyłki.
Centr hienietyčnaj dyjahnostyki «Apirejt» DNK-testy na baćkoŭstva robić za 335 rubloŭ (vyniki abiacajuć praz 3‑8 pracoŭnych dzion).
Kali kazać pra niestandartnyja ŭzory dla DNK-testu, siudy možna prynieści vałasy (3‑5 štuk, abaviazkova z cybulinami) ci paznohci (3‑5 štuk). U hetym vypadku za pasłuhu voźmuć 530 rubloŭ.
Za DNK-ekśpiertyzu dla suda prosiać 695 rubloŭ (i robiać ciaham 8‑14 pracoŭnych dzion paśla atrymańnia ŭzoraŭ).
Darodavaje vyznačeńnie baćkoŭstva tut nie robiać pryncypova (i nie rajać ludziam uvohule źviartacca pa takuju pasłuhu). Na sajcie paznačana: isnuje vialikaja imaviernaść taho, što vynik budzie pamyłkovym.
Tamu lepš dačakacca naradžeńnia dzicia, kab nie marnavać hrošy na darahi test, jaki moža chłusić.
Plusy pryvatnych łabaratoryj u tym, što jany dajuć mahčymaść zrabić test, nie infarmujučy druhi bok, — i, imavierna, paźbiehnuć kanfliktu ŭ pary.
DNK-testy robić i Instytut hienietyki i cytałohii Nacyjanalnaj akademii navuk Biełarusi. Tut paraŭnać dva ŭzory kaštuje 309 rubloŭ. Kožny dadatkovy ŭzor — jašče plus 150 rubloŭ. Vyniki buduć nie paźniej čym praź siem pracoŭnych dzion.
Jašče adzin varyjant pravieryć svajactva ŭ dziaržaŭnaj ustanovie — Dziaržaŭny kamitet sudovych ekśpiertyz. Ale tut nie atrymajecca zrabić test cichieńka, nie afišujučy detali — nieabchodna budzie prynieści ŭsie dakumienty.
Tut paraŭnoŭvać buduć uzory kryvi (śliny, saskobaŭ kletak).
Rascenki takija: DNK-test pa rašeńni suda dla troch čałaviek (mama, dzicia, mierkavany baćka) — 836 rubloŭ 57 kapiejek; pa ŭłasnym žadańni hramadzianina Biełarusi dla troch čałaviek — 865 rubloŭ 21 kapiejka, zamiežnyja hramadzianie dla troch čałaviek — 1266 rubloŭ 20 kapiejek.
Kali dzicia paŭnaletniaje, možna rabić test tolki dla dvuch čałaviek — heta budzie kaštavać 722 rubli 17 kapiejek.
Dla paraŭnańnia pahladzieli, kolki kaštujuć DNK-testy ŭ krainach-susiedkach Biełarusi. Naprykład, u Rasii toj ža Malekularna hienietyčny centr «DTŁ» za analiz «dla siabie» biare ad 5 tysiač rasijskich rubloŭ (pryblizna 190 biełaruskich rubloŭ).
U Polšy DNK-test možna zrabić ad 700 złotych (pryblizna 535 rubloŭ). U Litvie samy tanny test (kali čałaviek sam źbiare ŭzor bijamateryjału i dašle ŭ łabaratoryju) kaštuje 169 jeŭra (pryblizna 555 rubloŭ).
Ciapier čytajuć
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club8
Kamientary