U jakich umovach žyvie Kim Čen Yn i što nosiać jaho žonka, siastra i dačka
Paŭnočnakarejski lidar Kim Čen Yn pačaŭ maštabnuju rekanstrukcyju svaich raskošnych rezidencyj. Spadarožnikavyja zdymki pakazvajuć abnaŭleńnie jak minimum dzieviaci luksavych kompleksaŭ dyktatara. Što jašče vidać z kosmasu i što traplała na aficyjnyja videa?
Pavodle analizu daśledčaha servisu NK Pro, jaki śpiecyjalizujecca na vyvučeńni KNDR, kiraŭnik krainy vałodaje bolš čym dziasiatkam raskošnych rezidencyj. Jak piša The Wall Street Journal, budaŭničyja raboty jak minimum na dzieviaci ź ich pačalisia ŭ kancy maja — pačatku červienia.
Siarod abjektaŭ — pryvatny kompleks na ŭźbiarežžy ŭ Vansanie, dzie Kim Čen Yn zvyčajna pravodzić letnija miesiacy. Pavodle WSJ, mienavita tam padčas jaho adpačynku švartujecca jachta koštam kala 7 miljonaŭ dalaraŭ. Raboty taksama viaducca ŭ rezidencyi ŭ Pchieńjanie, zaharadnym kompleksie kala voziera i vielizarnym siamiejnym majontku, na terytoryi jakoha, jak śćviardžajuć analityki, znachodziacca navat placoŭki dla vyprabavalnych puskaŭ balistyčnych rakiet.
Na dumku ekśpiertaŭ, ciapierašniaja rekanstrukcyja stała mahčymaj dziakujučy prytoku finansavych i materyjalnych resursaŭ, jakija Pchieńjan atrymlivaje ŭ vyniku pahłybleńnia supracoŭnictva z Rasijaj i Kitajem.
Pra hetyja ramontnyja raboty dziaržaŭnyja ŚMI KNDR nie paviedamlajuć. Jak adznačaje vydańnie, adkrytaja demanstracyja raskošnaha ładu žyćcia supiarečyła b aficyjnaj prapahandzie, pavodle jakoj Kim nibyta padzialaje ciažkaści sa svaim narodam.
Pakolki dostup da jaho rezidencyj praktyčna niemahčymy, asnoŭnuju infarmacyju pra raskošny ład žyćcia paŭnočnakarejskaha dyktatara daśledčyki atrymlivajuć sa spadarožnikavych zdymkaŭ. Jak adznačaje WSJ, na ich možna razhledzieć supieriachty, konnyja maniežy i basiejny alimpijskaha pamieru.
Adnym ź niešmatlikich paćviardžeńniaŭ takoha ładu žyćcia źjaŭlajucca aficyjnyja fotazdymki. Letaś ministr zamiežnych spraŭ Rasii Siarhiej Łaŭroŭ naviedaŭ Kima na jaho dvuchpałubnaj jachcie daŭžynioj 29 mietraŭ. A były amierykanski baskietbalist Denis Rodman, jaki sustrakaŭsia z paŭnočnakarejskim lidaram u 2013 hodzie, paśla paraŭnaŭ adpačynak na jaho jachcie z padarožžam na Havai abo Ibicu.
Jak adznačaje The Wall Street Journal, raskoša ŭ KNDR słužyć nie tolki asabistamu kamfortu kiraŭnika krainy, ale i dapamahaje padtrymlivać łajalnaść kiraŭničaj elity. Jašče baćka ciapierašniaha lidara, Kim Čen Ir, uznaharodžvaŭ svaich nabližanych darahim ałkaholem, šviejcarskimi hadzińnikami i inšymi kaštoŭnymi padarunkami.
Jaho syn praciahnuŭ hetuju praktyku ŭ jašče bolšych maštabach.
Niahledziačy na mižnarodnyja sankcyi, jakija zabaraniajuć pastaŭki ŭ KNDR darahich tavaraŭ — ad hadzińnikaŭ Rolex da aŭtamabilaŭ Mercedes-Maybach, — Kim Čen Yn i členy jaho siamji praciahvajuć karystacca vyrabami viadomych suśvietnych brendaŭ.
WSJ źviarnuła ŭvahu, što padčas vizitu ŭ Piekin u vieraśni paŭnočnakarejskaha lidara bačyli sa šviejcarskim hadzińnikam. Pavodle źviestak paŭdniovakarejskaj vyviedki, jašče ŭ 2015 hodzie Kim i jaho žonka pastavili ŭ svaich rezidencyjach saŭny niamieckaj vytvorčaści.
Siastra kiraŭnika KNDR Kim Jo Čžon nosić sumki Dior koštam bolš za 7 tysiač dalaraŭ. Jaho dačka Kim Čžu E źjaŭlałasia ŭ puchaviku hetaha ž brenda padčas zapusku mižkantynientalnaj balistyčnaj rakiety, a žonka Kima padčas naviedvańnia adnaho z zavodaŭ była zaŭvažana z sumkaj Gucci.
Kamientary