Žurnalist Ihar Iljaš sustrakaje za kratami druhi dzień narodzinaŭ. U jaho mocna pahoršyłasia zdaroŭje

Palitviazień, žurnalist Ihar Iljaš 18 lipienia adznačaje dzień naradžeńnia — jamu spoŭniłasia 38 hadoŭ. Jon užo druhi raz sustrakaje dzień naradžeńnia ŭ niavoli, piša Radyjo Svaboda.

Ihara Iljaša ŭtrymlivajuć u babrujskaj kałonii № 2 z kanca 2025 hoda. Što viadoma pra ŭmovy ŭtrymańnia i zdaroŭje palitviaźnia?

Žonka Ihara Iljaša, žurnalistka Kaciaryna Andrejeva, raskazała Svabodzie, što nie maje ź im ni pierapiski, ni telefonnych razmoŭ, ale padtrymlivaje kantakt z krynicami, jakija ličyć daśviedčanymi ŭ spravach muža.

Pavodle hetych krynic, paśla etapavańnia ŭ kałoniju zdaroŭje Ihara Iljaša pahoršyłasia.

«Jon u ahulnaj składanaści ŭžo adbyŭ u ŠIZA (štrafnym izalatary) kala 60 dzion. Adrazu paśla prybyćcia ŭ kałoniju, padčas karancinu, dvojčy traplaŭ u ŠIZA na 15 dzion, a paśla jaho jašče jak minimum dvojčy adpraŭlali tudy. U babrujskaj kałonii, jak mnie raskazali, kamiery ŠIZA maleńkija i znachodziacca ŭ paŭpadvalnym pamiaškańni. Tam vielmi vysokaja vilhotnaść, a miesca dla ruchu amal niama. Paśla vychadu z ŠIZA Ihar adrazu pačaŭ skardzicca na acioki — u jaho apuchali nohi i ruki. Potym jaho nakiravali pracavać na pierapracoŭku humy, naprykład šyn.

Heta taksama vielmi drenna adbiłasia na zdaroŭi: jon pačaŭ adčuvać prablemy z kaardynacyjaj ruchaŭ, asabliva pravaj ruki. A kali apošni raz vyjšaŭ z ŠIZA, ludzi bačyli, što jon kulhaje. I, akramia taho, praz ŠIZA ŭ jaho rezka pahoršyŭsia zrok», — raskazała Kaciaryna Andrejeva.

Jašče adnym niehatyŭnym nastupstvam dla zdaroŭja Ihara Iljaša jana nazvała toje, što jon mocna schudnieŭ.

Kaciaryna tłumačyć heta «mizernym charčavańniem u kałonii» i tym, što Ihar, jak čałaviek, pryznany «ekstremistam», moža kuplać pradukty ŭ turemnaj kramie tolki na dźvie bazavyja vieličyni i tolki tady, kali nie znachodzicca ŭ ŠYZA.

Taksama Ihar pazbaŭleny mahčymaści atrymlivać praduktovyja pieradačy z voli, adznačyła Kaciaryna Andrejeva.

Što datyčycca maralnaha stanu muža, to tut Kaciaryna Andrejeva niepakoicca mienš.

«Jaho zdaroŭje — heta toje, što mianie chvaluje pastajanna, a z usim astatnim, ja viedaju, jon spravicca.

Maralny stan u jaho dobry. Jon šmat čytaje knih, u tym liku znachodzić svaju lubimuju histaryčnuju litaraturu. Viedaju, što pachod u biblijateku dla jaho važniejšy za pachod u turemnuju kramu», — raskazała Kaciaryna Andrejeva.

«Nie tolki moj Ihar, a ŭsie palitviaźni va ŭsich kałonijach čakajuć novaha etapu pierahavoraŭ i taho, što jašče bolš ludziej vyjduć na volu. Ihar nie hublaje aptymizmu, jon vieryć, što heta chutka skončycca. Dumaju, jamu taksama dapamahaje toje, što my štodnia razam u dumkach, što ja jaho čakaju. Heta nadaje jamu siły, jak i mnie nadavała siły dumka pra toje, što jon mianie padtrymlivaje i čakaje», — skazała Svabodzie žonka Ihara Iljaša, byłaja palitźniavolenaja Kaciaryna Andrejeva.

• 0
• 0
• 0
• 0
• 0
• 0
• 0
• 0