Pucin znoŭ pajšoŭ u narod. Žurnalisty zaŭvažyli tut zakanamiernaść

Uładzimir Pucin padčas naviedvańnia Sankt-Pieciarburha vyjšaŭ da ludziej. Jon vykarystaŭ hety pryjom užo druhi raz za paŭtara miesiaca. Tak časta jon vychodziŭ da naroda ŭ kryzisnyja dla siabie momanty — uletku 2023 hoda (paśla miaciažu Jaŭhiena Pryhožyna) i ŭ pieryjad z kanca zimy pa kaniec leta 2024 hoda, kali byŭ zabity Alaksiej Navalny, adbyŭsia terakt u «Krokus Sici Chole» i pačałosia ŭvarvańnie USU ŭ Kurskuju vobłaść, zaŭvažyła «Ahienctva».

Prezident RF vyjšaŭ da natoŭpu paśla naviedvańnia Admirałciejstva ŭ Sankt-Pieciarburhu, paviedamlajecca ŭ telehram-kanale kramloŭskaha puła. Pucin spyniŭ kartež i bieź pinžaka vyjšaŭ da ludziej, jakija čakali jaho, raskazali ŭ efiry «Rasija 1».

Suviaź była imklivaj. Prezident RF prabyŭ pa-za aŭtamabilem ahułam kala 40 siekund, śviedčyć videa, apublikavanaje karespandentam kramloŭskaha puła Paŭłam Zarubinym.

Apošni raz Pucin vychodziŭ da ludziej na vulicy ŭ červieni padčas vizitu ŭ Kazań. A da hetaha — hod tamu, u lipieni 2025 hoda, padčas vizitu ŭ Sankt-Pieciarburh (taksama padčas Dnia VMF).

Cikava, što hetym razam videa sustrečy Pucina z narodam apublikavali tolki praź dźvie hadziny paśla padziei. Pieršyja paviedamleńni źjavilisia a 20:33, a rolik u Telegram źjaviŭsia tolki a 22:33. U vyniku jon zastaŭsia praktyčna niezaŭvažanym mnohimi ŚMI.

Kali Pucin pačynaje časta vychodzić da ludziej

Paśla pačatku vajny Pucin upieršyniu vyjšaŭ da naroda ŭ vieraśni 2022 hoda padčas naviedvańnia Kalininhrada.

19 sakavika 2023 hoda jon razmaŭlaŭ z žycharami Maryupala padčas načnoha naviedvańnia horada.

Ale pa-sapraŭdnamu častymi sustrečy Pucina z narodam na vulicach stali paśla miaciažu Pryhožyna. U červieni 2023 hoda ŭsiaho praź niekalki dzion paśla miaciažu jon vyjšaŭ da ludziej u Derbiencie, praź miesiac — u Kranštacie, jašče praź miesiac — u Kurskaj vobłaści, a 1 vieraśnia — u Ćviarskoj vobłaści.

U 2024 hodzie jon upieršyniu parazmaŭlaŭ sa zvyčajnymi ludźmi praz šeść dzion paśla zabojstva Alaksieja Navalnaha. 22 lutaha pa darozie z Tatarstana Pucin spyniŭsia kala adnoj ź viosak u Čuvašyi i vyjšaŭ da ludziej, jakija niekalki hadzin čakali kartež. 5 sakavika jon znoŭ vychodziŭ da naroda — ciapier užo ŭ Staŭrapali.

Jašče adzin raz Pucin parazmaŭlaŭ ź ludźmi na vulicy (hetym razam u Taržku) 27 sakavika — praź piać dzion paśla teraktu ŭ «Krokus Sici Chole».

Trojčy prezident RF vychodziŭ da ludziej na praciahu leta 2024 hoda. Jon razmaŭlaŭ z rasijanami 18, 26 červienia i 20 žniŭnia. Druhi vychad Pucina 26 červienia adbyŭsia paśla padvojnaha teraktu ŭ Dahiestanie, jaki staŭ najbujniejšym u respublicy za 12 hadoŭ. A ŭ žniŭni jon razmaŭlaŭ z narodam praz dva tydni paśla ŭvarvańnia USU ŭ Kurskuju vobłaść.

Vychady da naroda hetym letam adbyvajucca na fonie bujnych kryzisaŭ, źviazanych z vajnoj va Ukrainie, — ekałahičnaj katastrofy ŭ Čornym mory, łahistyčnaj błakady Kryma, paliŭnaha kryzisu, udaraŭ pa Wildberries. Na hetym fonie rejtynhi ŭłady, u tym liku Pucina, padajuć.

• 2
• 1
• 30
• 5
• 1
• 1
• 1
• 0