U škołach uviaduć abnoŭlenuju prahramu pa infarmatycy z akcentam na ŠI
Z 1 vieraśnia ŭ vučniaŭ VI—IX kłasaŭ biełaruskich škoł pačnie dziejničać abnoŭlenaja vučebnaja prahrama pa infarmatycy. Adpaviednyja źmieny praduhledžanyja pastanovaj Ministerstva adukacyi № 32 ad 22 lipienia 2026 hoda.
Hałoŭnym novaŭviadzieńniem stanie intehracyja technałohij štučnaha intelektu ŭ navučalny praces. Vučni buduć nie tolki znajomicca z mahčymaściami sučasnych ŠI-servisaŭ, ale i vučycca pravilna i biaśpiečna ich vykarystoŭvać.
Prahrama raźličanaja na 139 akademičnych hadzin — pa adnoj hadzinie na tydzień u kožnym z čatyroch kłasaŭ. Jana achoplivaje šeść asnoŭnych napramkaŭ, u tym liku ałharytmizacyju, prahramavańnie, kampjutarnaje madelavańnie i pracu ź infarmacyjnymi technałohijami.
Asnoŭny akcent budzie zrobleny na praktyčnych navykach. Školniki buduć prymianiać ličbavyja viedy pry vyrašeńni zadač pa matematycy, fizicy, bijałohii i hieahrafii, što pavinna spryjać raźvićciu funkcyjanalnaj piśmiennaści.
Asobny raździeł pryśviečany vykarystańniu štučnaha intelektu. Vučni navučacca składać efiektyŭnyja zapyty da ŠI-sistem, praviarać dakładnaść atrymanaj infarmacyi, pracavać z tekstami, aŭdyja– i videamateryjałami, a taksama analizavać vyniki, jakija prapanujuć ličbavyja instrumienty.
U prahramu taksama ŭklučanyja asnovy kibierbiaśpieki. Školniki buduć vyvučać praviły abarony piersanalnych danych, sposaby raspaznańnia internet-machlarstva i dypfejkaŭ, normy sietkavaha etykietu, adkaznaje vykarystańnie štučnaha intelektu i zachavańnie aŭtarskich pravoŭ.
Akramia hetaha, vučniaŭ paznajomiać ź biełaruskimi adukacyjnymi IT-resursami.
U Ministerstvie adukacyi adznačyli, što paśla zasvajeńnia novaj prahramy školniki atrymajuć sučasnyja navyki analizu infarmacyi, pracy z vobłačnymi servisami, stvareńnia multymiedyjnaha kantentu, a taksama buduć raźvivać ałharytmičnaje myśleńnie, nieabchodnaje dla dalejšaha navučańnia i prafiesijnaj dziejnaści.
Kamientary