U Łatvii źnieśli dom Michaiła Zadornava

Novyja ŭładalniki zrujnavali budynak da padmurka, a na jaho miescy pabudavali sučasny dvuchpaviarchovy katedž. Novyja ŭładalniki nie zachacieli zachoŭvać budynak, źviazany z komikam, jaki staŭ viadomy svaimi vykazvańniami suprać Ukrainy i padtrymkaj rasijskaj ahresii, piša Delfi.lv.

Zadornaŭ nabyŭ dom u Jurmale ŭ 1990 hodzie i pravodziŭ tam šmat času — prymaŭ žurnalistaŭ, siabroŭ i pradstaŭnikoŭ rasijskaha šou-biznesu. U domie było 10 pakojaŭ, u tym liku try spalni, dva vannyja pakoi i kamin.

Paśla śmierci Zadornava ŭ 2017 hodzie dom pierajšoŭ va ŭłasnaść jaho pieršaj žonki Viełty. Spačatku jana zdavała jaho ŭ arendu, a paźniej pradała.

Novyja ŭładalniki adrazu źviarnulisia ŭ haradskuju dumu i paprasili dazvołu zrujnavać budynak. Prajekt novaha doma ŭzhadniła Nacyjanalnaje ŭpraŭleńnie kulturnaj spadčyny Łatvii, pakolki ziamielny ŭčastak znachodzicca ŭ zonie pomnika horadabudaŭnictva dziaržaŭnaha značeńnia. Vidavočna, usie nieabchodnyja dazvoły byli atrymanyja. Ciapier na miescy staroha doma staić sučasnaja kamianica koštam kala 3 młn jeŭra.

Da 2014 hoda Zadornaŭ byŭ adnym z samych papularnych rasijskich komikaŭ i vystupaŭ taksama va Ukrainie, adnak paśla revalucyi Majdana jaho rytoryka rezka źmianiłasia.

Satyryk pačaŭ sistematyčna vyśmiejvać ukraincaŭ, Jeŭramajdan, ukrainskija ŭłady i imknieńnie krainy da intehracyi ź Jeŭropaj. Jon śćviardžaŭ, što Ukraina ŭvojdzie ŭ historyju jak kraina, jakaja «vyrašyła, što bolš nie choča žyć u biednaści, tamu stała žyć jašče horš».

Jon vyśmiejvaŭ imknieńnie Ukrainy ŭstupić u Jeŭrapiejski sajuz i pastajanna paŭtaraŭ prapahandysckija naratyvy pra padziei na Danbasie.

Asabliva burnuju reakcyju słovy humarysta vyklikali paśla taho, jak u lipieni 2014 hoda nad Danbasam byŭ źbity Boeing 777 avijakampanii Malaysia Airlines. Zadornaŭ cynična pažartavaŭ, što samalot paciarpieŭ katastrofu, bo byŭ «ciažejšy za pavietra». Faktyčna heta było ździekam z trahiedyi, jakaja zabrała žyćci 298 čałaviek.

Akramia taho, Zadornaŭ padtrymaŭ niezakonnuju anieksiju Kryma i padpisaŭ list, u jakim vykazvałasia padtrymka prezidentu Rasii. Paśla hetaha jamu zabaranili ŭjezd va Ukrainu.

Michaił Zadornaŭ naradziŭsia ŭ Jurmale ŭ 1948 hodzie, dzie ŭ toj čas paśla pierajezdu z Dalokaha Uschodu pasialiŭsia jaho baćka, piśmieńnik Mikałaj Zadornaŭ. Skončyŭ u Ryzie škołu i dva kursy Ryžskaha palitechničnaha instytuta, paśla čaho pierajechaŭ u Maskvu. Pachavany Michaił Zadornaŭ u Ryzie na Lasnych mohiłkach pobač z mahiłaj baćki.

• 25
• 1
• 5
• 4
• 0
• 1
• 0
• 0