Błohiera Zołkina, jaki braŭ skandalnaje intervju ŭ Babaryki, mabilizavali
Ukrainski błohier Uładzimir Zołkin, jaki staŭ viadomym dziakujučy intervju z rasijskimi vajskoŭcami, mabilizavaŭsia va Uzbrojenyja siły Ukrainy. Pra heta jon sam raskazaŭ vydańniu «Dietiektor miedia».
U vojska Zołkin pajšoŭ jašče ŭ krasaviku. Jon prajšoŭ bazavuju ahulnavajskovuju padrychtoŭku, a ciapier słužyć u 91‑m asobnym supraćtankavym bataljonie va ŭzvodzie radyjoelektronnaj raźviedki. Jaho pasada — apieratar. Ciapier błohier znachodzicca ŭ Dnieprapiatroŭskaj vobłaści.
Fotazdymak u vajskovaj formie Zołkin apublikavaŭ tolki ciapier. Pavodle jaho słoŭ, raniej jon nie chacieŭ raskryvać fakt słužby, pakul nie vyjechaŭ na bajavyja pazicyi. Svaju mabilizacyju błohier prakamientavaŭ słovami: «Treba mabilizavacca ŭsim».
Napiaredadni jon u iraničnaj formie namiaknuŭ na słužbu ŭ vojsku, raźmiaściŭšy ŭ sacsietkach fota ŭ formie USU.
Raniej vakoł Zołkina ŭźnikali pytańni, źviazanyja ź jaho vajskovym ulikam. U sakaviku deputat Viarchoŭnaj Rady Jarasłaŭ Žaleźniak paviedamlaŭ, što błohiera źniali z ahulnaha vajskovaha ŭliku i aformili jamu braniravańnie ad Hałoŭnaha ŭpraŭleńnia raźviedki. Ministerstva abarony Ukrainy paćviardžała, što Zołkin byŭ pieraviedzieny na śpiecyjalny ŭlik adnoj sa śpiecsłužbaŭ, adnak nie ŭdakładniała, jakoj mienavita.
Paźniej, pavodle infarmacyi Žaleźniaka, braniravańnie było skasavana. Akramia taho, Biuro ekanamičnaj biaśpieki Ukrainy paviedamiła pra dva kryminalnyja razhlady ŭ dačynieńni da Zołkina — pavodle artykułaŭ ab lehalizacyi majomaści, atrymanaj złačynnym šlacham, i ŭchileńni ad vypłaty padatkaŭ. Pry hetym padazreńnie błohieru aficyjna nie vystaŭlałasia.
Uładzimir Zołkin staŭ šyroka viadomy jak va Ukrainie, tak i pa-za jaje miežami tady, kali paśla pačatku poŭnamašmabnaj vajny z Rasijaj staŭ pravodzić intervju z rasijskimi vajennapałonnymi. Kali ŭ śniežni minułaha hoda častka biełaruskich palitviaźniaŭ była vyzvalenaja z vydvareńniem praz Ukrainu, Zołkin skarystaŭsia ź situacyi, kab uziać intervju ŭ Viktara Babaryki. Toje intervju vyklikała vialiki rezanans, bo padčas jaho Babaryka nie zdoleŭ uciamna adkazać na pytańnie, čyj Krym.
Kamientary
dy i skandalnaha tam ničoha nie było