Novaje daśledavańnie pakazvaje, jak palityčnyja naviny ŭpłyvajuć na pracazdolnaść

Daśledavańnie hrupy amierykanskich navukoŭcaŭ pad kiraŭnictvam Iana Chjuza (Ian M. Hughes) było apublikavanaje ŭ časopisie Computers in Human Behavior.

Na praciahu dzieviaci tydniaŭ padčas prezidenckich prajmieryz 2024 hoda ŭ ZŠA aŭtary sačyli za pavodzinami 308 rabotnikaŭ. Udzielniki štotydzień adznačali, jak časta jany spažyvali niehatyŭnuju ci pazityŭnuju palityčnuju infarmacyju praz sacyjalnyja sietki, telebačańnie, padkasty i haziety. Heta dazvoliła navukoŭcam prasačyć, jak karotkačasovyja adchileńni ad zvyčajnaha ŭzroŭniu čytańnia navin, kantentu, nie datyčnaha da pracy, adbivajucca na štodzionnym emacyjnym stanie i pracoŭnych budniach.

Vyśvietliłasia, što tydni, kali ludzi spažyvali bolš niehatyŭnych palityčnych navin, čym zvyčajna, pryvodzili da rostu tryvožnaści. U takija pieryjady supracoŭniki imknulisia źbierahčy svaje emacyjnyja resursy i istotna źnižali ŭklučanaść u pracu. Akramia taho, tryvožnaść prymušała ludziej bolš staranna filtravać svaju movu i sačyć za kožnym słovam, kab paźbiehnuć patencyjnych kanfliktaŭ i dadatkovaha stresu.

U toj ža čas pazityŭny palityčny kantent demanstruje advarotny efiekt: čytańnie navin, jakija niasuć stanoŭčyja emocyi, vyklikaje pačućcio nadziei.

Nadzieja stanovicca psichałahičnym resursam, jaki stymuluje ludziej inviestavać svaju enierhiju ŭ pracu, padvyšaje ŭklučanaść i zaachvočvaje čaściej dapamahać svaim kaleham z pracoŭnymi zadačami. Pryčym efiekt nadziei i pazityŭnych navin akazaŭsia bolš ustojlivym i doŭhaterminovym, čym karotkačasovyja ŭsploski tryvohi ad niehatyvu.

Aŭtary daśledavańnia hruntavalisia na teoryi zachavańnia resursaŭ i patłumačyli, što emacyjny stres ad palityki za miežami pracy nie źnikaje, kali čałaviek prychodzić na pracoŭnaje miesca. Choć spažyvańnie admoŭnych i stanoŭčych navin u siarednim nie adroźnivałasia pa abjomie i pastupova źnižałasia ciaham pieryjadu daśledavańnia, mienavita piersanalnyja tydniovyja ŭsploski niehatyvu najbolš vyniščajuć čałaviečyja resursy.

Navukoŭcy padkreślivajuć, što praca va ŭmovach palityčnaj napružanaści vymahaje ad supolnaściaŭ i pracadaŭcaŭ uvahi da mientalnaha zdaroŭja, ale biez sprob kantralavać ci zabaraniać toje, što čytajuć rabotniki.

Kab niejtralizavać upłyŭ niehatyŭnych navin, ekśpierty rajać bałansavać spažyvańnie infarmacyi pazityŭnym kantentam, dbać pra paŭnavartasny adpačynak i son, a taksama šukać aporu i adčuvańnie kantrolu ŭ vałanciorstvie ci hramadskich aktyŭnaściach.

• 1
• 1
• 0
• 0
• 0
• 1
• 0
• 0