Turcyja prapanavała Rasii i Ukrainie raźvieści maršruty cyvilnych sudnaŭ u Čornym mory, kab spynić ataki na handlovyja karabli. Adpaviedny prajekt miemaranduma ministr zamiežnych spraŭ Turcyi Chakan Fidan pieradaŭ Maskvie i Kijevu. Pakul nivodzin z bakoŭ nie daŭ vyraznaha adkazu, piša tureckaja hazieta Milliyet.
Pavodle prapanovy Ankary, ukrainskija sudny pavinny ruchacca ŭ bok Basfora ŭzdoŭž uźbiarežžaŭ Rumynii i Bałharyi, a rasijskija — uzdoŭž bierahoŭ Hruzii i Turcyi. Dakumient taksama praduhledžvaje admovu ad udaraŭ pa sudnach i abaronu cyvilnaha sudnachodstva — pavodle pryncypaŭ, padobnych da tych, što dziejničali ŭ miežach zbožžavaj damoŭlenaści.
Turcyja pieradała prajekt bakam jašče ŭ vieraśni. Niezadoŭha da hetaha Chakan Fidan zaklikaŭ abviaścić maratoryj na ataki pa karablach. Ukraina karystajecca maršrutam uzdoŭž Rumynii i Bałharyi z 2023 hoda, paśla vychadu Rasii sa zbožžavaj damoŭlenaści. Novaja prapanova praduhledžvaje stvareńnie paŭdniovaha i ŭschodniaha kalidoraŭ.
«My chočam vykarystoŭvać terytaryjalnyja vody susiednich krain, u tym liku Turcyi, a taksama Hruzii, kali jana pahodzicca», — patłumačyŭ turecki dypłamat.
Kansultacyi nakont dakumienta praciahvajucca. Kijeŭ maje peŭnyja ahavorki adnosna hruzaŭ padvojnaha pryznačeńnia, naprykład žaleznaj rudy.
Pavodle padlikaŭ tureckaj haziety Milliyet, z pačatku hoda ŭ Čornym mory atakavali 70 sudnaŭ, 51 ź jakich źviazanyja z Turcyjaj. Tolki za apošnija dni paciarpieli šeść karabloŭ, try ź ich naležali tureckim uładalnikam. U vyniku napadaŭ zahinuli 11 čałaviek.
La bierahoŭ Rumynii paśla ŭdaru bieśpiłotnika zatanuŭ turecki suchahruz Royad Mammadov. Jaho kapitan zahinuŭ.
Jašče dva sudny atakavali ŭ vyklučnaj ekanamičnaj zonie Bałharyi. Premjer-ministr krainy Rumien Radzieŭ paviedamiŭ, što suchahruz Alfa Watan pad ściaham Toha, jaki nakiroŭvaŭsia ŭ rumynski port Sulina, zatanuŭ prykładna za 112 kiłamietraŭ ad horada Biała. Usie dziesiać členaŭ ekipaža zahinuli.
6 kastryčnika byŭ atakavany karabiel Able pad ściaham Pałau, jaki pieravoziŭ zbožža. Usich 18 členaŭ ekipaža ŭdałosia vyratavać. Siarod ich było 11 hramadzian Turcyi i siem hramadzian Indyi. Rumien Radzieŭ nie nazvaŭ tych, chto staić za napadami, ale zajaviŭ, što takija dziejańni ŭ bałharskaj ekanamičnaj zonie «absalutna nieprymalnyja».
Zbožžavaja damoŭlenaść, zaklučanaja pry pasiarednictvie Turcyi i AAN, dziejničała ź lipienia 2022 hoda da lipienia 2023 hoda. Pavodle Kanviencyi Mantro, Ankara nie maje prava zakryvać pralivy dla handlovych sudnaŭ, pakul sama nie ŭdzielničaje ŭ vajnie, nahadvaje Milliyet.
Rubia zajaviŭ pra tupik u vajnie pamiž Rasijaj i Ukrainaj i adsutnaść pierśpiektyŭ mirnaha ŭrehulavańnia
Sudna, jakoje zaharełasia pad Sočy — tankier rasijskaha cieniavoha fłotu
Kala ŭźbiarežža Bałharyi drony atakavali dva handlovyja sudny, adno zatanuła
Rasija ŭdaryła dronami pa tureckim sudnie z kukuruzaj
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5757
Kamientary