ZŠA ŭpieršyniu pierakidvajuć supraćkarabielnyja rakiety na japonski vostraŭ pablizu Tajvania

Na vostravie ŭpieršyniu razhornuć mabilny supraćkarabielny rakietny kompleks NMESIS i sistemu supraćpavietranaj abarony małoj dalokaści MADIS. Ich płanujuć vykarystać padčas supolnych amierykanska-japonskich vučeńniaŭ Keen Sword, jakija projduć z 19 da 29 kastryčnika. Pra padrychtoŭku manieŭraŭ u pačatku miesiaca paviedamiła Ministerstva abarony Japonii.

Pierakidańnie ŭzbrajeńniaŭ adlustroŭvaje źmieny ŭ stratehii amierykanskaj marskoj piachoty. Raniej jaje taktyka ŭ značnaj stupieni hruntavałasia na vysadcy desantu, ale ciapier u miežach prahramy madernizacyi Force Design usio bolšuju rolu adyhryvajuć nievialikija mabilnyja rakietnyja padraździaleńni, bieśpiłotniki i raźviedka. Pry hetym marskaja piachota admaŭlajecca ad častki ciažkaj techniki, u tym liku tankaŭ.

Zadača novych padraździaleńniaŭ — zrabić prylehłyja marskija akvatoryi niebiaśpiečnymi dla varožych karabloŭ, asabliva ŭ vypadku vajennaha kanfliktu vakoł Tajvania.

Jonahuni — samy paŭdniova-zachodni vostraŭ japonskaha astraŭnoha łancuha Nansej. Jon znachodzicca kala važnaha marskoha kalidora na padychodach da Tajvania, pamiž paŭdniova-zachodnimi astravami Japonii, Uschodnie-Kitajskim i Filipinskim morami. Pavodle acenki aŭtaraŭ artykuła, u vypadku vajny vakoł Tajvania hety rajon moža stać adnym z klučavych teatraŭ bajavych dziejańniaŭ.

Stratehičnaje značeńnie vostrava razumiejuć i ŭ Tokia, i ŭ Piekinie. Jašče ŭ 2016 hodzie Japonija raźmiaściła tam radyjołakacyjny naziralny post, a Kitaj pavialičvaje aktyŭnaść svaich karabloŭ u navakolnych vodach. Padčas kitajskich vajennych manieŭraŭ u 2022 hodzie, pavodle najaŭnych źviestak, adna z balistyčnych rakiet upała prykładna za 80 kiłamietraŭ ad vyspy.

«Choć vostraŭ nievialiki, jaho hieahrafičnaje stanovišča nadaje jamu vielizarnaje vajskovaje značeńnie», — adznačaje The National Interest.

Kompleks NMESIS składajecca ź bieśpiłotnych mašyn ROGUE-Fires, abstalavanych puskavymi ŭstanoŭkami dla dźviuch supraćkarabielnych rakiet NSM. Rakiety raspracavała narviežskaja kampanija Kongsberg, a ŭ ich vytvorčaści i intehracyi ŭ ZŠA ŭdzielničaje abaronny kancern RTX, viadomy taksama jak Raytheon.

Rakiety NSM laciać na dahukavoj chutkaści, trymajučysia blizka da pavierchni vady. Zajaŭlenaja dalokaść ich palotu składaje kala 185 kiłamietraŭ, choć realnyja charaktarystyki zaležać ad madyfikacyi i ŭmoŭ vykarystańnia. Ź Jonahuni jany zmohuć pahražać karablam u akvatoryi na paŭnočny ŭschod ad Tajvania, ale nie zmohuć kantralavać uvieś praliŭ pamiž vostravam i macierykovym Kitajem.

Sistema MADIS pryznačanaja dla abarony marskich piechacincaŭ ad bieśpiłotnikaŭ, viertalotaŭ i nizka latajučych samalotaŭ. Dla hetaha jana vykarystoŭvaje datčyki i ŭzbrajeńnie, ustalavanyja na mašynach. Pavodle aŭtaraŭ artykuła, takaja abarona asabliva važnaja dla izalavanych rakietnych padraździaleńniaŭ, jakija mohuć stać mišeńniu kitajskich udaraŭ. Bolš bujnyja sistemy supraćpavietranaj abarony mohuć nie paśpieć svoječasova pryjści im na dapamohu.

U 2025 hodzie amierykanskaja marskaja piachota ŭžo razhortvała kompleks NMESIS na japonskaj vyśpie Isihaki, jakaja znachodzicca dalej ad Tajvania. Pakul havorka nie idzie pra pastajannaje raźmiaščeńnie amierykanskich rakiet na Jonahuni. Adnak vučeńni prademanstrujuć, nakolki chutka takoje ŭzbrajeńnie možna pierakinuć u rehijon u vypadku kryzisu. 

Na čas manieŭraŭ ZŠA i Japonija adkryjuć supolny kaardynacyjny centr na bazie japonskich Sił samaabarony.

Sama Japonija taksama płanuje raźmiaścić na Jonahuni zienitnyja rakiety siaredniaj dalokaści. U listapadzie 2025 hoda Ministerstva zamiežnych spraŭ Kitaja nazvała hetyja płany «naŭmysnaj sprobaj stvaryć napružanaść u rehijonie i spravakavać vajskovaje supraćstajańnie».

• 0
• 0
• 0
• 0
• 0
• 0
• 0
• 0