Newsru.com: Pierad «kapitulacyjaj» Maskva dvojčy pryniziła Łukašenku

Pierad ustupleńniem u siłu damovy ab Mytnym sajuzie rasiejskaje TB naniesła biełaruskamu kiraŭniku dziaržavy padvojny ŭdar.

U efir telekanała NTV vyjšaŭ film «Chrosny baćka» z abvinavačvańniami ŭ adras biełaruskaha lidera — jon užo trapiŭ u Sietku. Adnačasova z vykryćciom «apošniaha dyktatara Eŭropy» vystupiŭ dziaržaŭny telekanał Russia Today.

Biełaruskaja delehacyja, jakaja prybyła ŭ Astanu, aburanaja padobnaj abrazaj. Niezadavolenaść vykazali i ŭ biełaruskaj ambasadzie ŭ Maskvie. U toj ža čas aficyjny Minsk nie śpiašajecca svarycca z Maskvoj praź film, aŭtary jakoha faktyčna abvinavacili Łukašenku ŭ arhanizacyi zabojstvaŭ svaich palityčnych praciŭnikaŭ.

Mnostva pytańniaŭ uźnikaje navat nie pa źmieście filma, a z nahody vybaru času dla jaho pakazu. Biełaruskaja delehacyja ŭspryniała heta jak naŭmysny cisk. «Niekatoryja rasijskija telekanały, jakija tolki naminalna źjaŭlajucca niezaležnymi, ale nasamreč usim viadoma, jak i kim jany kirujucca, faktyčna vylili cebary brudu na kiraŭnika dziaržavy i Biełaruś u sprobie akazać biesprecedentny infarmacyjny cisk», — zajaviła krynica ŭ delehacyi ahienctvu BiełTA.

Biełaruskija čynoŭniki i dypłamaty nie sumniajucca, što za hetym filmam staić vyšejšaje kiraŭnictva Rasiei.

Na dumku biełaruskaha boku, hety krok vielmi niepradumany z boku rasijskaj ułady, pakolki režysiory staviać u niazručnaje stanovišča, u pieršuju čarhu, svajho prezidenta Dźmitryja Miadźviedzieva. U ambasadzie Biełarusi ŭ Maskvie vykazali nadzieju, što hety film nie adlustroŭvaje aficyjnaj pazicyi Rasiei, skazaŭ pres-ataše Vital Śliŭka ŭ intervju radyjostancyi «Echo Moskvy».

«Vysoŭvać takija ździeklivyja abvinavačvańni ŭ adras kiraŭnika dziaržavy — niedapuščalna i złačynna. Heta domysły, jakija nie majuć pad saboj hleby, i nabor kamientaroŭ, jakija z kantekstu vykinuli. Sumna, što heta było pakazana ŭ prajm-tajm na fiederalnaj kanale», — padkreśliŭ Śliŭka.

Russia Today raptam uzhadaŭ pra «apošniaha dyktatara Eŭropy»

Zrešty, varta adznačyć, što ŭvieś svoj hnieŭ pradstaŭniki Biełarusi vylivali ŭ adras NTV, chacia hety kanał byŭ nie adzinym, chto abrynuŭsia z krytykaj na kiraŭnika susiedniaj siabroŭskaj dziaržavy. Telesiužet pad nazvaj «Apošni dyktatar Eŭropy» vyjšaŭ napiaredadni na telekanale Russia Today.

U im taksama vykryvajuć usie hrachi Łukašenki, na jakija ŭvieś hety čas Rasija čamuści zapluščvała vočy. Adnym ź lejtmatyvaŭ abiedźviuch rolikaŭ źjaŭlajecca toje, što biełaruski lider nibyta zdradziŭ svajmu bližejšamu sajuźniku i partnioru.

«Da apošniaha času adnosiny pamiž Maskvoj i Minskam byli siabroŭskimi. Adnak składvajecca ŭražańnie, što ŭ hałavie Łukašenki niešta pierakliniła… I ciapier jaho byłyja sajuźniki — numar adzin u śpisie jaho hałoŭnych vorahaŭ», — havorycca ŭ siužecie. U vinu stavicca «flirt z Zachadam» i ahresija ŭ bok Rasii.

«Čornaja paznaka» dla Łukašenki

Miž tym rasijskaja hramadskaść była ździŭlenaja pakazanym na NTV filmam nikolki nie mienš biełaruskaj. ŚMI ŭ RF vykazvajuć svaje zdahadki adnosna pryčyn źjaŭleńnia padobnych telerepartažaŭ. Badaj, hałoŭnym źjaŭlajecca mierkavańnie, što taki «čorny pijar» źviazany z budučymi vybarami prezidenta Biełarusi i źjaŭlajecca svajho rodu namiokam na toje, što Rasija, jakaja ŭvieś hety čas padtrymlivała Łukašenku, bolš hetaha rabić nie budzie.

«Ci to mytny sajuz, jaki byccam źbiralisia padpisać, užo nie patrebny? Ci to raźlik na skandał u Astanie — baćka naŭrad ci zmaŭčyć. Pa adkrytych kanałach u Biełarusi kino, viadoma, nie pakazali, ale jość i mižnarodnaja hramadskaść. Ci heta załp — prystrełka pierad budučymi ŭ susiedniaj krainie vybarami?», — piša Hanna Kačkajeva ŭ svaim błohu na radyjo «Svaboda».

Z takim mierkavańniem vystupiŭ žurnalist Pavał Šaramiet u intervju «Biełaruskamu partyzanu», nazvaŭšy hety film «čornaj plamaj» ad rasijskich uładaŭ Łukašenku: «Viedajučy sistemu pryniaćcia rašeńnia na rasijskich telekanałach,

ja absalutna ŭpeŭnieny, što heta była čornaja paznaka Alaksandru Łukašenku.

Pry hetym, u cełym, hledačy filma sychodziacca na dumcy, što aŭtary sabrali ŭsie viadomyja fakty pra cisk u Biełarusi, skampanavali ich u adzin videašerah i abvinavacili Łukašenku ledź ci nie va ŭsich śmiarotnych hrachach, nie prapuściŭšy i jaho asabistaje žyćcio. «Ja adčuŭ šok. Mianie ciažka zapadozryć ŭ lubovi da Łukašenki, ale toje, što ja ŭbačyŭ, pierasiahnuła ŭsie maje čakańni ad filma. Aŭtary nie pakinuli ad reputacyi biełaruskaha prezidenta kamienia na kamieni», — zajaviŭ Pavał Šaramiet, aŭtar dvuch dakumientalnych filmaŭ pra źnikłych u Biełarusi ludziej «Dzikaje palavańnie» i «Dzikaje palavańnie. Praciah».

Łukašenka, što zastaŭsia biez kazyroŭ, musiŭ padpisać damovu ab Mytnym sajuzie

Nahadajem, što siońnia Kodeks Mytnaha sajuza pamiž tryma krainami ŭstupiŭ u siłu. Pieršy vice-premjer RF Ihar Šuvałaŭ zajaviŭ, što adzinaja ekanamičnaja prastora pavinna zapracavać z 1 studzienia 2012 hoda. Myty na naftu i naftapradukty buduć źniatyja dla Biełarusi paśla padpisańnia i ratyfikacyi Minskam usiaho pakieta dakumientaŭ ab stvareńni Adzinaj ekanamičnaj prastory.

«U jaho nie zastałosia nijakich kazyroŭ na rukach, hulnia stała pradkazalna nabližacca da kanca», — zajaviŭ kiraŭnik analityčnaha centra «Stratehija» Leanid Zaika.

Miž tym Rasija, miarkujučy pa ŭsim, taksama nie źbirajecca spyniacca na dasiahnutym i nastup na Łukašenku pačynajecca jašče i ŭ charčovaj pramysłovaści, adznačaje «Svabodnaja presa».

Raśsielhasnahlad vyrašyŭ praviarać biełaruskaje miasa na najaŭnaść u im radyjoaktyŭnych elemientaŭ.

• 0
• 0
• 0
• 0
• 0
• 0
• 0
• 0