ZŠA evakujujuć dypłamataŭ i pieramiaščajuć vojski na Blizkim Uschodzie. Tramp razhladaje novyja ŭdary pa Iranie
ZŠA skaračajuć piersanał dypłamatyčnych misij i pieramiaščajuć vajskoŭcaŭ na bazach Blizkaha Uschodu. Padobnyja miery prymali pierad pačatkam vajny ź Iranam u lutym.
Jak paviedamlaje NBC News sa spasyłkaj na krynicy, u apošnija dni Pientahon biez publičnych abviestak pieramiaščaje vajskoŭcaŭ z šerahu baz u rehijonie. Heta zakranaje abjekty ŭ Iardanii, Katary i Kuviejcie. Kudy mienavita pieravodziać ludziej i kolki ich — nie paviedamlajecca.
Adnačasova Dziarždepartamient zahadaŭ skaracić kolkaść supracoŭnikaŭ niekalkich dypłamatyčnych pradstaŭnictvaŭ. Z Saudaŭskaj Aravii pavinny vyjechać supracoŭniki, čyja prysutnaść nie źjaŭlajecca nieabchodnaj, i členy siemjaŭ. Ambasada praciahnie pracu skaročanym składam.
Hetyja pieramiaščeńni adbyvajucca na fonie abmierkavańnia novaj apieracyi suprać Irana. Pavodle NBC, vajskovaje kiraŭnictva nazyvaje Trampu mahčymyja varyjanty ŭdaraŭ. Adna ź idej — karotkaja kampanija, jakaja razam z ekanamičnym ciskam prymusiła b Tehieran pajści na pieramovy i adkryć Armuzski praliŭ.
Krynica ABC News adznačyła, što ciapierašniaje pieramiaščeńnie vajskoŭcaŭ padobnaje da taho, jakoje adbyvałasia pierad pačatkam vajny ŭ lutym.
Adnak evakuacyju dypłamataŭ nielha adnaznačna ličyć padrychtoŭkaj da ŭdaru pa Iranie. Pavodle amierykanskich čynoŭnikaŭ, na jakich spasyłajecca ABC, vyjezd piersanału z Saudaŭskaj Aravii źviazany z pahrozaj z boku chusitaŭ. Hetaja hrupoŭka, jakuju padtrymlivaje Iran, atakuje saudaŭskija vajskovyja i naftavyja abjekty, a taksama cyvilnyja aeraporty.
Mienšyja skaračeńni piersanału inšych ambasadaŭ čynoŭniki taksama źviazvajuć z pahrozaj chusitaŭ i inšymi abstavinami, jakija, pavodle ich, nie datyčacca mahčymaj novaj apieracyi suprać Irana.
Centralnaje kamandavańnie ZŠA admoviłasia raskryvać padrabiaznaści pieramiaščeńnia vojskaŭ, spasłaŭšysia na biaśpieku apieracyj.
Pavodle NBC, u atačeńni Trampa niama adzinstva nakont novych udaraŭ: Pit Chiehsiet vystupaje za adnaŭleńnie apieracyj, inšyja čynoŭniki aścierahajucca pačynać kampaniju bieź jasnaha razumieńnia, jak jaje zaviaršyć.
Jašče 8 kastryčnika Tramp publična abiacaŭ nie atakavać Iran da pramiežkavych vybaraŭ u Kanhres, pryznačanych na 3 listapada. Ciapier, pavodle krynic NBC, abmiarkoŭvajucca varyjanty dziejańniaŭ jak da vybaraŭ, tak i paśla ich.
Ciapier čytajuć
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im14
Kamientary
Heta bliskučaja ideja
Nie raz pakazaŭšaja svaju žyćciazdolnaść.