Kala Biełaha doma zatrymali vieniesuelca sa zbrojaj. Hałasy nibyta zahadvali jamu zabić Trampa
Kala Biełaha doma ŭ Vašynhtonie supracoŭniki Sakretnaj słužby ZŠA zatrymali ŭzbrojenaha mihranta ź Vieniesueły. U jahonym pikapie, jaki, pavodle źviestak uładaŭ, byŭ skradzieny, znajšli niekalki vidaŭ ahniastrelnaj zbroi i dziasiatki patronaŭ, piša NBC News.
U Ministerstvie ŭnutranaj biaśpieki ZŠA zajavili, što mužčyna raskazaŭ pra hałasy ŭ hałavie, jakija nibyta zahadvali jamu pryjechać u Vašynhton i zabić prezidenta Donalda Trampa.
Jak paviedamlaje NBC News sa spasyłkaj na sudovyja materyjały, 26‑hadovy Roni Jordryks Huanipa Črynas spaŭ u pryparkavanym pikapie Ford F-150 na Kanstytucyjnaj avieniu. Uviečary 5 listapada da jaho padyšoŭ patrulny Sakretnaj słužby, jaki chacieŭ pierakanacca, što z mužčynam usio ŭ paradku.
Na pytańnie, ci jość u jaho zbroja, vieniesuelec kiŭnuŭ i pakazaŭ palcami žest, jaki nahadvaŭ pistalet. Praz Google Translate jon patłumačyŭ, što choča zdać zbroju ŭładam. Pavodle jaho słoŭ, jon mieŭ jaje pry sabie, bo niechta sprabavaŭ jaho zabić, i jamu daviałosia adabrać zbroju ŭ napadnikaŭ. Mužčyna śćviardžaŭ, što jana znachodzicca ŭ karyčnievaj sumcy.
Jon taksama paviedamiŭ, što nabyŭ zbroju prykładna miesiac tamu, žyvie ŭ mašynie, a pikap jamu pazyčyŭ načalnik. Adnak, pavodle telekanała Fox 5 DC, hety aŭtamabil byŭ skradzieny ŭ Paŭdniovaj Karalinie.
Pra hałasy, jakija nibyta zahadvali jamu zabić prezidenta, zatrymany, pavodle viersii Ministerstva ŭnutranaj biaśpieki, raskazaŭ supracoŭnikam Sakretnaj słužby padčas razmovy. Pry hetym u sudovych dakumientach takich jahonych słoŭ niama, źviartaje ŭvahu ABC News.
Padčas ahladu pikapa znajšli vintoŭku typu AR-15, pistalet-kulamiot MAC-10, pistalet Glock 43X i dziasiatki patronaŭ.
U sakaviku 2024 hoda Huanipa Črynas niezakonna pierasiok miažu ZŠA praz štat Techas i byŭ zatrymany pamiežnaj słužbaj. Adnak, jak śćviardžaje Ministerstva ŭnutranaj biaśpieki, administracyja Džo Bajdena paśla hetaha jaho adpuściła.
Zatrymanamu vystavili abvinavačańni ŭ kradziažy, atrymańni kradzienaj majomaści, niezakonnym vykarystańni aŭtamabila, našeńni pistaleta bieź licenzii, a taksama ŭ šerahu inšych złačynstvaŭ, źviazanych sa zbrojaj i bojeprypasami.
6 listapada sud akruhi Kałumbija pastanaviŭ pakinuć jaho pad vartaj biez prava vyzvaleńnia pad zakład. U paniadziełak mužčyna pavinien stać pierad fiederalnym sudom. Prakuratura pakul vyvučaje dokazy, paviedamiła krynica NBC News u pravaachoŭnych orhanach. Ci jość u zatrymanaha advakat, nieviadoma.
Dyrektar Sakretnaj słužby Šon Karan zajaviŭ, što hety vypadak śviedčyć pra niebiaśpiečnuju situacyju, bo da Biełaha doma praciahvajuć prybyvać uzbrojenyja ludzi. Pavodle jaho słoŭ, supracoŭniki słužby padrychtavanyja da padobnych zdareńniaŭ i ŭpeŭnienyja ŭ svaich dziejańniach, adnak ich niepakoić rost kolkaści pahroz.
Karan paabiacaŭ, što Sakretnaja słužba budzie bolš aktyŭna vyjaŭlać ludziej, jakija mohuć pahražać asobam pad achovaj, kab spyniać ich jašče da taho, jak jany dabiarucca da Vašynhtona. Kiraŭnik Ministerstva ŭnutranaj biaśpieki Markuejn Malin padziakavaŭ supracoŭnikam słužby i adznačyŭ, što mihranta zatrymali da taho, jak jon paśpieŭ kamuści naškodzić.
Heta nie pieršy padobny vypadak za apošnija miesiacy. U krasaviku ŭzbrojeny Koŭł Tomas Alen, jak miarkujecca, sprabavaŭ prarvacca na viačeru Asacyjacyi karespandentaŭ Biełaha doma ŭ hateli Washington Hilton.
U mai 21‑hadovy Nasir Biest adkryŭ ahoń kala kantrolna-prapusknoha punkta Biełaha doma i byŭ zastreleny supracoŭnikami achovy. Akramia taho, u 2024 hodzie na Donalda Trampa dvojčy rabili zamachi: padčas pieradvybarčaha mitynhu ŭ Batlery i na terytoryi jahonaha holf-kłuba ŭ Fłarydzie.
Ciapier čytajuć
Zamiest pareštkaŭ Vitaŭta za ścianoj Vilenskaj katedry znajšli tolki kuču kamianioŭ. Ale ŭłady Litvy hatovyja vydatkavać na praciah pošukaŭ jašče 1,5 miljona jeŭra3232
Kamientary