Budanaŭ zapłacić štraf za vykarystańnie ruskaj movy padčas incydentu ŭ Barščahoŭcy pad Kijevam
Fakt parušeńnia moŭnaha zakanadaŭstva pryznany, adpaviednyja jurydyčnyja pracedury ŭžo raspačatyja.
Kiraŭnik Ofisa prezidenta Kirył Budanaŭ zapłacić štraf za vykarystańnie ruskaj movy padčas mierapryjemstvaŭ u Piatropaŭłaŭskaj Barščahoŭcy 2 listapada. Fakt parušeńnia moŭnaha zakanadaŭstva pryznany, adpaviednyja jurydyčnyja pracedury ŭžo raspačatyja. Pra heta napisała ŭ fejsbku ŭpaŭnavažanaja pa abaronie dziaržaŭnaj movy Alena Ivanoŭskaja.
«Fakt parušeńnia pryznany biez sprobaŭ znajści apraŭdańni abo ŭklučyć achoŭnuju reakcyju. Praduhledžany zakonam štraf budzie vypłačany va ŭstanoŭlenyja terminy. Pravavaja dziaržava tym i adroźnivajecca ad chaosu, što pamyłka fiksujecca, pryznajecca i vypraŭlajecca zakonnym šlacham, a nie praź linčavańnie ŭ sacyjalnych sietkach», — napisała jana.
Pamier štrafu składzie ad 3 400 da 6 800 hryŭniaŭ (75—150 dalaraŭ).
Nahadajem, što incydent u Pietrapaŭłaŭskaj Barščahoŭcy adbyŭsia 2 listapada. Tam adbylisia sutyčki kala pryvatnaha doma, dzie znachodzilisia vajskoŭcy Nacyjanalnaj hvardyi. Kiraŭnik Ofisa prezidenta Ukrainy Kirył Budanaŭ prybyŭ na miesca padziej i padčas razmovy z 14‑hadovym chłopcam karystaŭsia ruskaj movaj, što vyklikała krytyku ŭ sacyjalnych sietkach, nahadvaje «Ukrainskaja praŭda».
Potym vyśvietliłasia, što rasijskija śpiecsłužby karystalisia śpiecyfičnym ukrainskim biznesam časoŭ vajny.
Ciapier čytajuć
Zamiest pareštkaŭ Vitaŭta za ścianoj Vilenskaj katedry znajšli tolki kuču kamianioŭ. Ale ŭłady Litvy hatovyja vydatkavać na praciah pošukaŭ jašče 1,5 miljona jeŭra2929
Kamientary