U Minsk prylacieŭ prezident Siryi Bašar Asad

Siońnia pačynajecca dvuchdzionny aficyjny vizit u Biełaruś prezidenta Siryi Bašara Asada. Jak paviedamili ŭ pasolstvie Siryi ŭ Biełarusi, delehacyja pavinna prybyć u Minsk kala 11.00. Adrazu paśla prylotu Bašar Asad praviadzie pieramovy z Alaksandram Łukašenkam.

Na druhuju pałovu dnia zapłanavanaja sustreča prezidenta Siryi z prem'jer-ministram Biełarusi Siarhiejem Sidorskim i staršynioj Pałaty pradstaŭnikoŭ Nacyjanalnaha schodu Uładzimiram Andrejčankam.

27 lipienia Bašar Asad płanuje naviedać Minski aŭtamabilny zavod.

Prezidenta Siryi supravadžaje vialikaja delehacyja dziełavych kołaŭ. U jaje skład uvajšli pradstaŭniki 117 kampanij. 27 lipienia Biełaruskaja handlova-pramysłovaja pałata praviadzie druhoje pasiadžeńnie Biełaruska-siryjskaha savieta dziełavoha supracoŭnictva, a taksama kantaktna-kaapieracyjnuju biržu pamiž biźniesmienami dźviuch krain. Meta pieramoŭ — pošuk dziełavych partnioraŭ i inviestaraŭ siarod siryjskich biźniesmienaŭ, abmierkavańnie prajektaŭ supracoŭnictva.

***

U sakaviku 1998 hoda adbyŭsia pieršy aficyjny vizit u Siryju Alaksandra Łukašenki. U listapadzie taho ž hoda ŭ Damasku adkryłasia pasolstva Respubliki Biełaruś. U śniežni 2003 hoda prezident Biełarusi znoŭ naviedaŭ Siryju. U śniežni 2007-ha ŭ Minsku adkryłasia pasolstva Siryi.

6–7 červienia hetaha hoda Siryju naviedaŭ ministr zamiežnych spraŭ Biełarusi Siarhiej Martynaŭ. Padčas jaho sustrečy z prezidentam Siryi adznačałasia, što da vizitu Bašara Asada ŭ Minsk budzie padrychtavany pieralik kankretnych dvuchbakovych prajektaŭ dla realizacyi ŭ roznych śfierach, uklučajučy mašynabudavańnie, sielskuju haspadarku, adukacyju, turyzm.

21–24 červienia Biełaruś naviedała parłamienckaja delehacyja Siryi na čale sa staršynioj Narodnaha schodu Siryjskaj Arabskaj Respubliki Machmudam al-Abrašam.

Na sustrečy ź im Alaksandr Łukašenka zajaviŭ, što Siryja pavinna stać dla Biełarusi hałoŭnym partnioram na Blizkim Uschodzie. «Praz vašu krainu my možam supracoŭničać z usimi dziaržavami hetaha niaprostaha rehijonu. Dumaju, što Siryja ad hetaha atrymaje tolki vyhadu», — skazaŭ prezident.

Łukašenka taksama zajaviŭ pra zacikaŭlenaść Biełarusi ŭ aktyŭnym raźvićci dziełavych suviaziaŭ ź Siryjaj i hatoŭnaści raźvivać u hetaj krainie sumiesnyja ekanamičnyja prajekty, u tym liku z udziełam trecich dziaržaŭ — naprykład, Vieniesueły.

«Biełaruska-siryjskaje supracoŭnictva budujecca na poŭnym daviery i imknieńni da samaha ciesnaha ŭzajemadziejańnia ŭ roznych halinach. My kanstruktyŭna vyrašajem pytańni ŭ ramkach takich mižnarodnych arhanizacyj, jak AAN i Ruch niedałučeńnia. Biełaruś i Siryja adnolkava nie prymajuć źniešniaha cisku i dyktatu, aktyŭna abaraniajuć svaju terytaryjalnuju cełasnaść i suvierenitet», — padkreśliŭ Łukašenka.

U ramkach vizitu parłamienckaj siryjskaj delehacyi byŭ padpisany dakumient ab stvareńni dvuchbakovaj mižparłamienckaj kamisii pa supracoŭnictvie. Jaje meta — ažyćciaŭlać padrychtoŭku prapanoŭ i rekamiendacyj dla parłamientaŭ i ŭradaŭ pa ŭsich kirunkach dvuchbakovaha supracoŭnictva, analizavać stan mižparłamienckich suviaziaŭ i vypracoŭvać rekamiendacyi pa ich palapšeńni.

Maryna Nosava, BiełaPAN.

• 0
• 0
• 0
• 0
• 0
• 0