Franka Viačorku vyklučyli z Moładzi BNF

«Za dziejańni, jakija hańbiać honar i hodnaść siabra Moładzi BNF». Z takoj farmuloŭkaj Viačorku, Krečku i Anisimava vyklučyli z šerahaŭ moładzievaha kryła Frontu. Anisimavu, akramia hetaha, pahražaje vyklučeńnie z partyi.

Uviečary 19 žniŭnia adbyłosia pasiadžeńnie Rady Moładzi BNF, na jakim prysutničali 8 siabroŭ Rady (usiaho ŭ radzie 15 čałaviek), paviedamlaje Radyjo Svaboda. Za vyklučeńnie z šerahaŭ arhanizacyi Viačorki, Krečki i Anisimava prahałasavali siem čałaviek, adzin hałasavaŭ suprać. Voś vytrymka z pratakołu pasiedžańnia:

«Punkt paradku dnia №2. Ab vyklučeńni sp. F.Viačorki, A. Krečki, A. Anisimava ź liku siabroŭ Moładzi BNF. Vystupiŭ: siabra Revizijnaj kamisii Moładzi BNF Aleś Kalita, jaki aznajomiŭ siabroŭ Rady Moładzi BNF, z rašeńniem Revizijnaj kamisii Moładzi BNF №1 ad 18.08.2010 h., jakoje rekamiendavała Radzie Moładzi BNF vyklučyć ź liku siabroŭ Moładzi BNF F. Viačorku, A. Anisimava, A. Krečku za dziejańni, jakija hańbiać honar i hodnaść siabra Moładzi BNF».

Nahadajem, što Franak Viačorka, Andrej Krečka, Anton Kojpiš i Uładzimier Malej 12 červienia 2010 h. byli vyklučanyja z šerahaŭ Partyi BNF.

A. Kalita: Intervju z Anisimavym stała apošniaj kroplaj

Siabra Revizijnaj kamisii Moładzi BNF Aleś Kalita prakamientavaŭ «NN» pryčyny vyklučeńnia z šerahaŭ arhanizacyi troch jaje siabroŭ. Pa jaho słovach, Viačorku, Krečku i Anisimava vyklučyli za parušeńnie etyki i dyscypliny. «Apošniaj kroplaj stała raspaŭsiudžanaje ŭ internecie intervju Franaka Viačorki z Alesiem Anisimavym», — kaža sp. Kalita. Pa jaho słovach, hutarka była vykananaja ŭ nadzvyčaj chamskim i niepavažlivym tonie. U intrevju Anismaŭ nibyta abraziŭ šerah svaich paplečnikaŭ, u pryvatnaści Antona Kalinoŭskaha. Heta nie adzinaja pryčyna vyklučeńnia z Moładzi BNF, padkreśliŭ siabra Revizijnaj kamisii. Jon dadaŭ taksama, što ŭ Mahiloŭskuju Radu BNF nakiravanaja prapanova razhledzieć pytańnie ab vyklučeńni Anisimava z šerahaŭ partyi.

Što datyčyć Andrusia Krečki, to jamu zakidajecca praciah niadobrasumlennaj dziejnaści. «Choć jon i byŭ adchileny ad pasady staršyni Moładzi BNF, sp. Krečka praciahvaje pradstaŭlacca im. Svaimi dziejańni jon pieraškadžaje pracy novaha kiraŭnictva», — adznačyŭ Aleś Kalita.

Apošnija padziei ŭ arhanizacyi nie paŭpłyvajuć na pieradvybarčuju kampaniju Moładzi BNF, zapeŭniŭ Kalita.

F. Viačorka: Mianie ździviła nie rašeńnie, a sakretnaść vakoł jaho

Užo były siabar Moładzi BNF Franak Viačorka ŭ svaim błohu na padzieju adhuknuŭsia nastupnym čynam: «Mianie ździviła nie rašeńnie, a sakretnaść, pry jakim adbyvałasia pasiedžańnie. Navat u savieckija časy pytańnie ab vyklučeńni kaho-kolviek adbyvałasia ŭ jaho prysutnaść.

Sumna nazirać, jak śpiecsłužby dabivajuć BNF. Nie, ja zusim nie liču, što ŭsie hetyja ludzi — ahienty KDB. Jany ščyra vierać u toje, što robiać dobruju spravu. Jak i čalcy kamisijaŭ, jakija padtasoŭvajuć vybary. Jak i sałdaty terminovaj słužby, źbivajučy dručkami demanstrantaŭ. Boh im sudździa».

• 0
• 0
• 0
• 0
• 0
• 0