Kali ŭ dziciaci skalijoz…

Siońnia skalijoz źjaŭlajecca samaj raspaŭsiudžanaj artapiedyčnaj prablemaj siarod dziaciej. Jak adznačaje zahadčyca adździaleńnia hihijeny dziaciej i padletkaŭ Respublikanskaha centra hihijeny, epidemijałohii i hramadskaha zdaroŭja Ała Małachava, štohod padčas prafiłaktyčnych ahladaŭ upieršyniu rehistrujecca parušeńnie postaci ŭ 22.000 školnikaŭ, a roznyja stupieni skalijozu — u 10.000 dziaciej. Pryčym skalijoz — taja chvaroba, jakoj nielha pierachvareć u dziacinstvie adnojčy i nazaŭsiody. Jana moža pakinuć paśla siabie takija nastupstvy, jak rańniaje znošvańnie pazvanočnika, jaki budzie stareć i vychodzić sa stroju

Uličvajučy aktualnaść prablemy, sanitarna-epidemijałahičnaja słužba respubliki akcentuje asablivuju ŭvahu na pytańni zabiaśpiečanaści školnych ustanoŭ zručnaj vučnioŭskaj meblaj. Tak, u pačatkovych kłasach rekamiendavana vykarystoŭvać pieravažna školnyja party, a nie stały i kresły. Rabota za apošnimi nie dyscyplinuje dzicia, i jano siadzić jak choča, nie škadujučy svajho pazvanočnika. Jašče prapanoŭvajecca zabiaśpiečyć kłasy kantorkami pa typu trybuny dla vystupleńnia sa stalnicaj. Za joj dzicia moža pisać navat stojačy i rabić heta rekamiendujecca na praciahu 15–20 minut.

Jak samim vyznačyć najaŭnaść skalijozu

Paprasicie dzicia stać da vas śpinaj i rassłabicca (niachaj jano prymie zvyčnuju dla jaho pozu pastavy). Pierš za ŭsio vy pavinny źviarnuć uvahu na nastupnyja asnoŭnyja prykmiety skalijozu:

adno plačo krychu vyšej za druhoje;

vypiraje roh adnoj z łapatak;

roznaja adlehłaść ad prycisnutaj da boka ruki da talii;

pry nachileńni napierad bačnaja kryvizna pazvanočnika.

Kali vy znajšli chacia b adnu z hetych prykmiet, terminova viadzicie dzicia na pryjom da rajonnaha artapieda abo chirurha.

Asnoŭnaja zadača pry lačeńni skalijozu ŭ dziaciej — dabicca źnižeńnia praźmiernaj nahruzki na pazvanočnik pry adnačasovym umacavańni myšcaŭ śpiny i ŭsiaho tułava, što ŭ spałučeńni z rostam dziciaci dazvolić vypravić skryŭleńnie (kankretnuju mietodyku lačeńnia mienavita dla vašaha dziciaci daść urač-artapied).

Na što treba źviarnuć uvahu samim baćkam

Zabiaśpiečcie dziciaci ablehčany režym dla jaho pazvanočnika.

Kupicie artapiedyčny matrac, kali niama takoj mahčymaści, niachaj śpić prosta na ćviordym łožku z płoskim vatnym matracam na roŭnym ščycie ź nievialikaj paduškaj. U škołu dzicia pavinna chadzić z rancam, a nie z sumkaj u adnoj rucie. Padbiarycie jamu stoł i kresła dla zaniatkaŭ doma (jany pavinny adpaviadać rostu dziciaci, być zručnymi i fizijałahičnymi).

Raźvivajcie ŭ dziciaci ŭnutranuju samadyscyplinu.

Jano pavinna pastajanna samo sačyć za svajoj postaćciu (kali idzie, staić, siadzić, adpačyvaje). Dzicia pavinna štodzień zajmacca lačebnaj fizkulturaj (kompleks praktykavańniaŭ padbiaruć u fizkulturnym dyspansery, pažadana, kab dzicia adzajmałasia tam choć by niekalki tydniaŭ, zasvoiła praktykavańni i pryvykła da nieabchodnaści pastajannych nahruzak).

Prajdzicie kurs lačeńnia ŭ śpiecyjalizavanym sanatoryi.

Praktyčna niemahčyma zabiaśpiečyć dziciaci ŭ chatnich umovach patrebny režym dla vykanańnia kompleksu lačebnych pracedur (artapiedyčnyja ŭkładki, masaž, fizijaterapija, ŁFK…) Tamu vielmi pažadana pravieści kurs lačeńnia ŭ sanatoryi-internacie, dla taho, kab zafiksavać raźvićcio skalijozu i dać impuls dla nastupnaha samastojnaha lačeńnia.

Zastaŭcie dzicia palubić sport.

Sumnyja i adnastajnyja praktykavańni lačebnaj fizkultury časta nie daspadoby školnikam. Časam značna praściej i efiektyŭniej pryciahnuć dzicia da sportu; zachaplalnaha, jarkaha, jaki dadaść jamu aŭtarytetu ŭ vačach ravieśnikaŭ. Isnuje davoli vialikaja kolkaść vidaŭ sportu, rekamiendavanych dla lačeńnia skalijozaŭ i inšych chvarob pazvanočnika, u asnoŭnym heta cykličnyja vidy sportu z «simietryčnaj» nahruzkaj. Tolki treba imi sapraŭdy zajmacca. (pažadana z trenieram), a nie «adbyvać numar». Płavańnie — samy lepšy vid sportu pry skalijozie i pry lubym skryŭleńni pazvanočnika. Vada naturalnym čynam razhružaje pazvanočnik, a nahruzki pavyšajuć moc i tryvałaść myšcaŭ śpiny, adnačasova raźvivajučy i trenirujučy sardečna-sasudzistuju i dychalnuju sistemu.

Nie zabyvajciesia pra ahulnaŭmacavalnyja mierapryjemstvy.

Zdarovaje charčavańnie — niemałavažnaja detal. Białki, tłuščy, vuhlavody, vitaminy i minierały — usio heta ŭ patrebnych praporcyjach i ŭ patrebnaj kolkaści pavinna być u racyjonie dziciaci.

Kantrasny duš — karysnaja tanizujučaja pracedura dla myšcaŭ i sasudaŭ usiaho arhanizma.

Kureńnie — vielmi škodnaja zvyčka ŭvohule, a dla chvorych skalijozam dziaciej asabliva: nikacin prymušaje zvužacca sasudy i kapilary, paharšajučy krovazabieśpiačeńnie ŭ tym liku i myšačna-źviazačnaha aparatu, a smoły zamarudžvajuć funkcyi dychańnia, jakija i tak mohuć być značna parušanyja.

Nie rabicie nieabdumanych krokaŭ.

U apošni čas naša miedycyna ŭsio bolš kamiercyjalizujecca i źjaŭlajecca mnostva «śpiecyjalistaŭ», hatovych lačyć skalijoz roznymi mietadami — ad manualnaj terapii da kursa śpiecyjalnych injekcyj u myšcy śpiny. Budźcie vielmi aściarožnymi ŭ vybary padobnych schiem lačeńnia. Naprykład, manualnaja terapija ŭvohule vielmi adkazny i traŭmaniebiaśpiečny mietad, a ŭ rukach šarłatana ci prosta niaŭmiełaha ŭrača zdolnaja pryvieści da trahiedyi. Akramia taho bolšaść artapiedaŭ ličać, što manualnaja terapija prosta škodnaja pry skalijozie.

• 0
• 0
• 0
• 0
• 0
• 0
• 0
• 0