Siarhieja Pradzieda zatrymali na Kastryčnickaj płoščy za niesankcyjanavany pikiet.
11 kastryčnika hiei i leśbijanki ŭsiaho śvietu adznačajuć dzień «Kaminh aŭtu» (ad anhł. coming out -- dzień dobraachvotnaha raskryćcia svajoj sieksualnaj aryjentacyi). U Minsku z hetaj nahody prajšła akcyja. Napiaredadni aktyvisty ŁHBT-ruchu padali zajaŭku na praviadzieńnie publičnaha mierapryjemstva, ale Minharvykankam aficyjna admoviŭ im.
«Dla mianie heta užo piataja admova ź piaci zajavaŭ, — raskazvaje adzin z zajaŭnikaŭ akcyi, Siarhiej Pradzied. -- Artykuły Kanstytucyi, mižnarodnych paktaŭ i zakonaŭ nie majuć nijakaj vahi dla hetaj dziaržavy».
U akcyi ŭziali ŭdzieł dziesiać čałaviek. Jany prajšli ź viasiołkavaj simvolikaj ad stancyi mietro "Kupałaŭskaja" da Niamihi i nazad. Siarhiej Pradzied zastaŭsia stajać na Kastryčnickaj płoščy z vypiskami z Kanstytucyi art. 35 pra svabodu schodaŭ, a taksama z papierami pra admovu Minharvykankamu. Na druhim płakacie ŭ Siarhieja było napisana: «Dzie?» (u sensie, «dzie hetaja svaboda?») Jon raspaviadaŭ minakam pra situacyju z pravami čałavieka ŭ Biełarusi. Praz chvilin tryccać padyšli dva amapaŭcy, paprasili raspavieści pra pryčynu pikietu.
Chłopca zatrymali i advieźli ŭ RUUS. Na Pradzieda byŭ składzieny pratakoł i pierapisanyja rečy, siarod jakich paśviedčańnie inicyjatyŭnaj hrupy Niaklajeva i ŭlotki «Skažy «nie» śmiarotnamu pakarańniu». Pradzied raskazvaje, što hetyja papiery vyklikali šerah pytańniaŭ. Chłopiec admoviŭsia adkazvać i paprasiŭ advakata, adnak u hetym jamu admovili.
Paśla dopytu Siarhieja Pradzieda advieźli na Akreścina, dzie jon pravioŭ noč u čakańni suda. U aŭtorak sud Centralnaha rajona Minska pakaraŭ ŁHBT-aktyvista štrafam u pamiery 20 bazavych vieličyniaŭ (700 tys. rubloŭ), pa artykule 23.34 č.3 KaAP.
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii13
Kamientary