Telefanavaŭ nieviadomy i nazyvaŭsia śledčym

U HUUS Minharvykankama raspačata šeść kryminalnych spraŭ u dačynieńni da 21-hadovaha hramadzianina Litvy, jaki padazrajecca ŭ sieryi machlarstvaŭ.

Zamiežny hramadzianin zatrymany.

Jak paviedamili ŭ adździele infarmacyi i hramadskich suviaziaŭ HUUS, schiema złačynstva va ŭsich vypadkach była adnoj i toj ža. Na haradski numar telefanavaŭ nieviadomy i nazyvaŭsia śledčym. Vykarystoŭvajučy roznyja psichałahičnyja pryjomy, złačynca vypytvaŭ u abanienta pra jaho blizkich svajakoŭ (syna, unuka). U zaležnaści ad adkazaŭ vybudoŭvałasia dalejšaja hutarka,

sens jakoj zvodziŭsia da taho, što svajak źbiŭ (kali heta aŭtaamatar) ci pabiŭ (kali havorka idzie pra piešachoda) čałavieka i ciapier zatrymany milicyjaj. Akaličnaści padziej vielmi nieadnaznačnyja i mohuć tłumačycca jak na karyść svajaka, tak i na karyść paciarpiełaha.

Dla «vyrašeńnia pytańnia» nieabchodna niekatoraja suma. Dla pierakanaŭčaści na fonie hutarki hučaŭ niby hołas svajaka, jaki prasiŭ dapamahčy.

U milicyi adznačajuć, što psichałahičnaja apracoŭka abanienta była praciahłaj i ŭmiełaj. Padčas paŭhadzinnaj hutarki dasiahałasia damoŭlenaść nie tolki pra kankretnyja sumy, ale i pra sposab pieradačy hrošaj. Pryčym «śledčy» dziejničaŭ vielmi apieratyŭna, jaho pamočnik prychodziŭ za hrašyma jašče padčas praviadzieńnia telefonnych pieramoŭ. I tolki paśla taho, jak vielmi značnyja sumy byli pieradadzieny ŭ ruki pamočnika i toj sychodziŭ, hutarka spyniałasia. Paciarpiełyja paźniej pačynali telefanavać svajakami, jakija nibyta trapili ŭ biadu, i vyśviatlali, što stali achviaraj afierystaŭ.

Tolki 14 kastryčnika, jak ustanavili milicyjaniery, zatrymany ŭdzielničaŭ jak minimum u šaści padobnych machinacyjach.

Pavodle infarmacyi HUUS, litoviec «pracavaŭ» nie adzin. Jamu dapamahali nie tolki na terytoryi Minska (ustanoŭlena, što adzin z saŭdzielnikaŭ złačynstvaŭ paśpieŭ pierasiačy biełaruska-litoŭskuju miažu praź niekalki hadzin paśla zatrymańnia inšaziemca). Taksama viadoma, što telefanavańni na haradskija numary minčan pastupali z-za miažy. Z ulikam taho, što ŭ trubcy čulisia hałasy niekalkich čałaviek, havorka idzie ab hrupie ašukancaŭ.

Heta nie pieršyja złačynstvy takoha rodu.

Sieryja anałahičnych machlarstvaŭ była zafiksavana rabotnikami pravaachoŭnych orhanaŭ u pačatku kastryčnika. Charakterna, što va ŭsich vypadkach achviarami afierystaŭ byli ludzi starečaha ŭzrostu.

• 0
• 0
• 0
• 0
• 0
• 0
• 0
• 0