Niebiaśpieka analhinu: daśledavańni praciahvajucca

U adnoj z rasijskich publikacyj tamtejšy śpiecyjalist admoŭna vykazaŭsia adnosna analhinu. Maŭlaŭ, nie prymajcie jaho nikoli. Znaŭca śćviardžaje, što ŭ bolšaści raźvitych krain hety preparat daŭno nie vykarystoŭvajuć, a ŭ našych šyrotach va ŭsim vinavataja farmaceŭtyčnaja mafija. Hałoŭny śpiecyjalist Ministerstva achovy zdaroŭja Biełarusi pa kliničnaj farmakałohii, dacent kafiedry kliničnaj farmakałohii Biełaruskaha dziaržaŭnaha miedycynskaha ŭniviersiteta Łarysa Haŭrylenka pahadziłasia adkazać na niekalki aktualnych u hetym sensie pytańniaŭ.

— Ci sapraŭdy ŭ raźvitych krainach nie pradajuć analhin?

— Dziejučym rečyvam analhinu źjaŭlajecca mietamizoł natryju. U roznych krainach vykarystoŭvajuć roznyja varyjanty nazvy aktyŭnaha rečyva — mietamizoł, mietamizoł natryju, dypiron. Mietamizoł byŭ sintezavany niamieckim chimikam Ludviham Knoram u 1920 hodzie, i z 1922 hoda jaho vytvorčaść raspačała farmaceŭtyčnaja kampanija Hojeshst. Analhizujučaje i haračkapanižalnaje dziejańni mietamizołu dakazanyja ŭ šmatlikich daśledavańniach i nie vyklikajuć sumnieńniaŭ.Pradmietam sprečak źjaŭlajecca biaśpieka preparatu, i pierš za ŭsio raźvićcio na fonie pryjomu ahranułacytozu, z-za čaho mietamizoł zabaronieny abo jaho prymianieńnie abmiežavanaje ŭ niekatorych krainach: Vialikabrytanii z 1965 hoda, Šviecyi z 1974-ha, Narviehii z 1976-ha, ZŠA z 1977-ha, Danii z 1979-ha, a taksama ŭ Aŭstralii, Italii, Saudaŭskaj Aravii, Abjadnanych Arabskich Emiratach, Izraili, Iranie i inš.

U niekatorych krainach mietamizoł i preparaty ź jaho ŭtrymańniem poŭnaściu kanfiskavanyja z abarotu, u inšych — zabaronienyja dla vykarystańnia dziećmi i padletkami, u trecich — dazvoleny tolki ŭ peŭnych situacyjach, naprykład, dla karotkačasovaha prymianieńnia pry nieefiektyŭnaści inšych srodkaŭ. U krainach Uschodniaj Jeŭropy i Łacinskaj Amieryki mietamizoł pa-raniejšamu pradajecca biez recepta i ličycca biaśpiečnym analhietykam. Adnak dahetul častata raźvićcia ahranułacytozu pry pryjomie mietamizołu kančatkova nie ŭstanoŭlenaja. Byli praviedzieny mižnarodnyja daśledavańni pa ahranułacytozie i apłastyčnaj aniemii ŭ 80-90-ja hady, vyniki jakich dahetul abmiarkoŭvajucca, a ŭ suviazi z šeraham mietadyčnych chibaŭ nie źjaŭlajucca dosyć pierakanaŭčymi. Važnym pytańniem acenki metazhodnaści prymianieńnia mietamizołu źjaŭlajecca jaho biaśpieka ŭ paraŭnańni z alternatyŭnymi preparatami, naprykład, dykłafienakam, paracetamołam, adnak i tut niama adzinaha mierkavańnia śpiecyjalistaŭ, a vyniki mietaanalizaŭ supiarečlivyja. Tak, u mietaanalizie daśledavańniaŭ pa biaśpiecy nienarkatyčnych analhietykaŭ za pieryjad z 1975 pa 1995 hod ustanoŭlena, što sumarnaja ryzyka raźvićcia latalnych zychodaŭ, źviazanych z ahranułacytozam, apłastyčnaj aniemijaj, anafiłaktyčnym šokam, jazvavym paražeńniem straŭnika i dvanaccacipiersnaj kiški pry prymianieńni mietamizołu ŭ 24 razy mienšaja, čym pry vykarystańni dykłafienaku i supastaŭlalny z ryzykaj dla paracetamołu. Adnak i acenka paracetamołu, jak biaśpiečnaha preparata, dalokaja ad idealnaj.

Takim čynam, źviestki pra biaśpieku mietamizołu pa-raniejšamu nie dazvalajuć pryjści da kančatkovaj vysnovy pra jaho vykarystańnie. Kliničnyja daśledavańni jak efiektyŭnaści, tak i biaśpieki mietamizołu, u tym liku ŭ paraŭnańni z płaceba i inšymi nienarkatyčnymi analhietyčnymi srodkami, praciahvajucca.

— Pry jakich stanach, zachvorvańniach pakazany preparat?

— Mietamizoł — mižnarodnaja niepatentavanaja nazva — źjaŭlajecca vytvorčaj pirazałonu. Akazvaje haračkapanižalnaje, analhietyčnaje i słabaje supraćzapalenčaje dziejańnie. Pakazańniami da prymianieńnia źjaŭlajucca bolevy sindrom roznaha hieniezu — nyrkavaja i žoŭcievaja kolika, nieŭrałhii, mijałhii, pry traŭmach, apiokach, paśla apieracyj, pry hałaŭnym, zubnym boli; lichamankavy sindrom — infiekcyjna-zapalenčyja zachvorvańni, posttransfuzijnyja ŭskładnieńni.

Prymianiajuć jak u jakaści monakampanientnaha srodku, tak i ŭ składzie kambinavanych lekavych srodkaŭ — naprykład, u kambinacyi sa spazmalityčnymi, miascovaaniestezujučymi, antacydnymi, trankvilizujučymi srodkami. Voś niekatoryja handlovyja nazvy preparataŭ, jakija ŭtrymlivajuć u jakaści asnoŭnaha dziejučaha kampanienta mietamizoł: analhin, analhin-darnica, analhin chinin, analhin-KMP, antyhrypin-anvi, barałhin M, brunałhin, bienalhin, dypiron, aptalhin-teva, pientałhin, siedał-M, siedalhin-niea, spazmałhon, tempałhin.

— Jakija isnujuć procipakazańni?

— Procipakazańniami da ŭžyvańnia źjaŭlajucca hipieradčuvalnaść, pryhniacieńnie krovatvareńnia — ahranułacytoz, cytastatyčnaja abo infiekcyjnaja niejtrapienija, nyrkavaja i piačonkavaja niedastatkovaść, spadčynnaja hiemalityčnaja aniemija, źviazanaja z deficytam hlukoza-6-fasfatdehidrahienazy, branchijalnaja astma, inducyravanaja pryjomam aceciłsalicyłavaj kisłaty (aśpirynam), aniemija, lejkapienija, ciažarnaść, asabliva ŭ pieršym trymiestry i ŭ apošnija 6 tydniaŭ, u čas łaktacyi.

Pry lačeńni dziaciej da 5 hadoŭ i chvorych, jakija atrymlivajuć cytastatyki, pryjom mietamizołu pavinien pravodzicca tolki pad kantrolem doktara. Niepieranosnaść sustrakajecca redka, adnak pahroza raźvićcia anafiłaktyčnaha šoku paśla ŭnutryviennaha ŭviadzieńnia adnosna vyšejšaja, čym padčas užyvańnia va ŭnutr. U chvorych na atapičnuju branchijalnuju astmu i palinozy pavyšanaja ryzyka raźvićcia alerhičnych reakcyj. Na fonie pryjomu mietamizołu mahčymaje raźvićcio ahranułacytozu, tamu pry źjaŭleńni niematyvavanaha ŭzdymu tempieratury, dryžykaŭ, bolaŭ u horle, ciažkaści z hłytańniem, stamatytu, a taksama pry raźvićci źjaŭ vahinitu abo praktytu nieabchodna terminova admianić preparat. Pry praciahłym užyvańni nieabchodna kantralavać karcinu pieryfieryčnaj kryvi. Niedapuščalna vykarystoŭvać mietamizoł dla źniaćcia vostrych bolaŭ u žyvacie da vyśviatleńnia pryčyny. Na fonie lačeńnia mahčyma afarboŭvańnie mačy ŭ čyrvony koler, što nie maje značeńnia.

— Jakija sučasnyja, palepšanyja anałahi prychodziać na źmienu analhinu?

— U Biełarusi zarehistravanaja dosyć vialikaja kolkaść lekavych srodkaŭ, jakija vałodajuć haračkapanižalnym, analhiezujučym i supraćzapalenčym dziejańniem. Vybar efiektyŭnaha i biaśpiečnaha lekavaha srodku ŭ kankretnaj kliničnaj situacyi — lačeńnie chraničnaha zachvorvańnia abo kupiravańnie sindromu, lačeńnie darosłaha pacyjenta abo dziciaci, pacyjenta z abciažaranym alerhałahičnym abo farmakałahičnym anamniezam, spadarožnymi zachvorvańniami i inš. — za ŭračom.

• 0
• 0
• 0
• 0
• 0
• 0
• 0
• 0