Moładź Narodnaha Frontu: Na vulicy, a nie na ŭčastki

Vybary pieratvarylisia ŭ farmalnaść, i iści na ich varta tolki dziela taho, kab patłumačyć heta vybarcam, havorycca ŭ Adkrytym zvarocie maładych siabraŭ HA BNF "Adradžeńnie" da kaardynataraŭ kampanii "Raspluščy vočy".

Razumiejučy ŭsiu składanaść siońniašniaha stanovišča na Biełarusi, turbujučysia za budučyniu Ajčyny, vymušanyja padać hołas.

U siońniašnich umovach na Biełarusi, kali źmienienaje vybarčaje zakanadaŭstva (ahitacyju narmalna pravieści stała niemahčyma), kali vybarčyja kamisii całkam farmujucca ŭładaj, na praciahu 12 hod daskanała adpracavanaja falsyfikacyjnaja mašyna, kali niezaležnyja naziralniki i pradstaŭniki apazycyjnych płyniaŭ nia majuć mahčymaści navat nazirać za vybarčym pracesam na ŭsich jahonych etapach, nia kažučy pra adsutnaść mahčymaści davieści sam fakt falsyfikacyi, idzie padrychtoŭka da vybaraŭ u miascovyja saviety deputataŭ. Na minułych prezydenckich vybarach my čarhovy raz ŭpeŭnilisia, što demakratyčnyja vybary pry sučasnym režymie niemahčymyja, a sproby raskryć falsyfikacyju z dapamohaj naziralnikaŭ pravalilisia (zamiest abiacanych ličbaŭ "sumlennych ludziej" z kožnaha ŭčastku my mieli vielmi roznyja vyniki niekalkich ekzyt-połaŭ). U hetych umovach, pry adsutnaści kardynalna novaha padychodu baraćby z falsyfikacyjami, udzieł u vybarach – heta samahubstva. Na bolš čym 20 000 miescaŭ abjadnanaja apazycyja vyłučaje 800 kandydataŭ, astatnija 19 000 miescaŭ zojmuć praŭładnyja funkcyjanery. Z hetych 800 apazycyjnych kandydataŭ u lepšym vypadku ŭłada prapuścić niekalki dziasiatkaŭ (jak heta było ŭ minuły raz). Kali takoje adbudziecca, pry siońniašnim padychodzie davieści masavyja falsyfikacyi, jak heta było padčas prezydenckich vybaraŭ, nia ŭdasca. Ale vybary z udziełam apazycyi buduć pryznanyja lehitymnymi.

My, pradstaŭniki biełaruskaj moładzi, prapanujem źviarnucca da vybarcaŭ z zaklikam nie iści na falšyvyja vybary ŭ dzień hałasavańnia, a vychodzić na vulicy; da kandydataŭ – z patrabavańniem źniać svaje kandydatury za dzień da hałasavańnia, paśla taho jak infarmacyjnaja kampanija budzie praviedzienaja.

Hałoŭnaj metaj kampanii "Raspluščy vočy" jość akreślenaje infarmavańnie nasielnictva ab sytuacyi ŭ Biełarusi. Vybary ŭ miascovyja rady deputataŭ, a dakładniej, ahitacyjnaja kampanija kožnaha kandydata, – tolki srodak danieści infarmacyju da nasielnictva, a nie samameta. Pra heta nielha zabyvacca. Udzielničać u vybarach treba tak, kab mieć najvialikšy stanoŭčy vynik dla siabie, a nie dapamahać tym samym režymu, idučy pa dobra prataptanaj darozie. Možna vykarystać ahitacyjnuju kampaniju kandydataŭ dla tłumačeńnia sytuacyi biełarusam, ale abaviazkovaj umovaj jość zaklik da niaŭdziełu ŭ "vybarach" nasielnictva i źniaćcia svaich kandydatur apazycyjnymi kandydatami za dzień da hałasavańnia. U dzień hałasavańnia treba zaklikać ludziej masava vychodzić na vulicy i płoščy, a nie da vybarčych skryniaŭ.

Dla apazycyi sapraŭdy pryjšoŭ čas pierastać užo lić vadu na młyn režymu.

Žyvie Biełaruś!

Maładyja siabry Hramadzkaha abjadnańnia BNF "Adradžeńnie"

❏

Staršynia «Moładzi BNF»: Zajava nakont źniaćcia kandydataŭ zaŭčasnaja

Na vašym sajcie była raźmieščanaja zajava ad imia «Moładzi BNF», pad zahałoŭkam: «Moładź Narodnaha Frontu: Na vulicy, a nie na ŭčastki». Chaču paviedamić što moładź BNF nie maje da jaje anijakaha dačynieńnia, tamu što my ŭdzielničajem u hetaj vybarčaj kampanii ŭ jakaści kandydataŭ, siabry Moładzi BNF źbirajuć podpisy pad manifiestam Abjadnanych Demakratyčnych Siłaŭ. Moładź BNF, biezumoŭna, razhladaje hetuju kampaniju tolki jak infarmacyjnuju, i my nieadnarazova zajaŭlali, što situacyju ŭ Biełarusi mahčyma źmianić tolki praz płoščy, vyklučna mirnymi strajkami, pa ŭsioj krainie. Što datyčyć dnia hałasavańnia, to na siońniašni momant adzinaha rašeńnia ADS pa dniu hałasavańnia niama, bo jano było b paśpiešnaje pa niekalkich pryčynach:

1. užo zaraz my bačym, jak ułady nie rehistrujuć inicyjatyŭnyja hrupy našych kandydataŭ pa śmiechu vartych pryčynach.

2. nieviadoma, kolki kandydataŭ budzie zarehistravana paśla skančeńnia etapu zboru podpisaŭ. Moža być, što nivodnaha nie zarehistrujuć. Tamu zaraz prymać rašeńnie pa dniu hałasavańnia niesvoječasova. Ale my abmiarkoŭvajem roznyja varyjanty, u tym liku i źniaćcio kandydataŭ za 1 dzień da vybaraŭ.

Pavažanaja redakcyja «Našaj Nivy»! Pry nahodzie chaču adrazu pavinšavać vas z stahodździem vychadu pieršaha numaru hazety. 23 listapada – vialiki dzień dla ŭsioj Biełaruskaj nacyi.

Aleś Kalita

Staršynia Moładzi BNF

• 0
• 0
• 0
• 0
• 0
• 0
• 0
• 0