Bierazoŭski: Łukašenka nie čakaŭ, što śviet nadaść takoje značeńnie padziejam 19 śniežnia

Miljanier-machlar imkniecca vyharadzić Łukašenku, zvalić vinu na KDB.

Apalny ŭ Rasiei aliharch Barys Bierazoŭski abvinavaciŭ staršyniu biełaruskaha KDB Vadzima Zajcava i rasiejskija śpiecsłužby ŭ arhanizacyi pravakacyi 19 śniežnia ŭ Minsku. Pra heta jon zajaviŭ u intervju ŭkrainskaj haziecie «Siehodnia»: «Toje, što adbyłosia ŭ Biełarusi, biezumoŭna, vyhadna Rasiei. I kateharyčna nie vyhadna ni Biełarusi, ni Zachadu. Rasieja atrymała nieabmiežavany ŭpłyŭ u hetaj krainie i, pa sutnaści, zahnała biełaruskija ŭłady ŭ kut. Ja liču, što biesparadki paśla vybaraŭ — heta śpiecapieracyja rasiejskich śpiecsłužbaŭ. Vy viedajecie, što pierad hetym Łukašenka try hady vielmi paśladoŭna ruchaŭsia ŭ bok demakratyčnych pieraŭtvareńniaŭ. Ažyćciaŭlaŭ demakratyčnyja reformy na biełaruski ład. Ale ŭ noč paśla vybaraŭ było pierakreślena ŭsio, što rabiłasia try hady. I ja liču, što heta, biezumoŭna, paśpiachovaja apieracyja rasiejskich śpiecsłužbaŭ, jakija, vykarystoŭvajučy svaju piatuju kałonu ŭ Biełarusi, zmahli pieraviarnuć situacyju. Hałoŭnaje, što treba było zrabić — heta vystavić achovu dla kandydataŭ u prezidenty, jakija pryjšli na hety mitynh. Śpiecsłužby Łukašenki pavinnyja byli ich achoŭvać, a nie bić pa hałavie. Heta i była b pieramoha Łukašenki».

A dalej Bierazoŭski, jakoha abvinavačvajuć u raskradańni dziaržaŭnaj majomaści na sotni miljonaŭ dalaraŭ i vykarystańnie bandyckich mietadaŭ pry zmahańni za ŭłasnaść vinavacić… Jeŭropu. «Ciapier adbyvajecca intelektualnaja dehradacyja palityčnaj elity Zachadu. Jana praciahvajecca ŭžo jak minimum 10 hadoŭ. Samy hałoŭny vynik pracy pucinskaha režymu na suśvietnaj arenie — heta stvareńnie tatalnaj sistemy karupcyi na Zachadzie. Vaźmicie toj ža „Nord Strym“. Heta biessensoŭnaja, razburalnaja dla ekanomiki Ukrainy i Biełarusi truba fantastyčnaha koštu, ekałahična niebiaśpiečnaja, ŭraźlivaja dla terarystaŭ — jaskravy prykład karumpavanaści Zachadu. Nu, i, viadoma, rašeńni pa futbole: 2022 i 2018 hadoŭ ŭ Katary i ŭ Rasiei. Heta ž śmiech. Siońnia hałoŭnaja prablema — heta navat nie Rasieja. Heta prosta tatalnaje prastytujavańnie palityčnaj elity Zachadu».

A voś što dumaje Bierazoŭski pra łohiku myśleńnia Łukašenki: «U mianie takoje ŭražańnie, što Łukašenka sam nie čakaŭ, što śviet nadaść takoje značeńnie tamu, što adbyłosia 19 śniežnia. Ja navat bolš-mienš ŭjaŭlaju, chto heta rabiŭ — jaho ŭłasnyja śpiecsłužby, jakija davali jamu iłžyvuju infarmacyju pra padziei, jakija adbyvalisia na płoščy 19 śniežnia. I hetyja supracoŭniki — biezumoŭna, supracoŭniki adnačasova rasiejskich śpiecsłužbaŭ. I ŭ pieršuju čarhu, havorka idzie ab staršyni KDB Biełarusi».

• 0
• 0
• 0
• 0
• 0
• 0
• 0
• 0