Załataja burbałka Prakapoviča

Zołatavalutny zapas Biełarusi ŭ pracentach da VUP — najmienšy ŭ rehijonie.

Mižnarodnyja reziervovyja aktyvy Biełarusi, raźličanyja pa standartach MVF, za apošni miesiac minułaha hoda źmienšylisia ažno na $621,8 miljona. Takim čynam, na pačatak hoda kolkaść zapasaŭ źmienšyłasia da $5,03 miljarda. Zaŭvažym, što voś hetaje «0,03» vyklikaje sumnievy. Moža być, ich trochi padciahnuli da simvaličnaj ličby. Ale pakiniem sumnievy. 5 miljardaŭ — heta mnoha ci mała?

Usie maładyja niezaležnyja dziaržavy źbirali ŭłasnyja valutnyja reziervy. Heta — kašel krainy, jaje skarbnica, zaruka stabilnaści ekanomiki i finansavaj sistemy, a taksama padstrachoŭka na vypadak nadzvyčajnych situacyj.

Tvary kiraŭnika dziaržavy Alaksandra Łukašenki i staršyni praŭleńnia Nacbanka, Hieroja Biełarusi Piatra Prakapoviča prosta śviacilisia ad ščaścia padčas pieradvybarčaj fotasiesii. Napiaredadni vybaraŭ Łukašenka ŭłasnaručna abmacvaŭ załatyja źlitki ŭ schoviščy Nacyjanalnaj biblijateki. Prakapovič tym časam chvaliŭsia, što siarod krainaŭ SND Biełaruś zajmaje adno ź pieršych miescaŭ pa abjomie reziervaŭ.

Što, praŭda?

«Naša Niva» źviała ŭ adnu tablicu mižnarodnyja reziervovyja aktyvy i ahulny abjom VUP Biełarusi i jašče dziesiaci dziaržaŭ SND i Prybałtyki.

Załaty zapas impieryi

Kali analizavać ahulny abjom reziervaŭ, to zrazumieła, što Rasija budzie pa-za kankurencyjaj. Amal paŭtryljona dalaraŭ — heta nie žarciki.

Vialikija pa płoščy Ukraina z Kazachstanam majuć na paradak nižejšyja pakazčyki.

Siarod astatnich krainaŭ vyłučajecca Azierbajdžan. Naftavaja žyła dazvoliła nazapasić nievialikaj kaŭkazskaj krainie $28 miljardaŭ.

Astatnija krainy, u tym liku i Biełaruś, znachodziacca prykładna ŭ adnoj vahavaj katehoryi. Bahaciejšymi za biełarusaŭ źjaŭlajucca bałtyjskija susiedzi — i łatvijcy, i litoŭcy. Samyja maleńkija zapasy ŭ nievialikaj Małdovy — mienš za $2 miljardy.

Azierbajdžan jak Biełaruś

Ciapier što datyčna pamieru ekanomik — ahulnaha vałavaha pradukta. Pry ich aceńvańni vykarystoŭvalisia dadzienyja CRU ZŠA. U hetym rejtynhu miescy, zaniatyja krainami, padobnyja na tyja, što byli ŭ papiarednim. Rasija znoŭ daloka napieradzie — amal paŭtara tryljona dalaraŭ, dalej Ukraina z Kazachstanam… A za imi naha ŭ nahu kročać… Biełaruś i Azierbajdžan! Źvierniem uvahu, što pry roŭnych pa pamieru ekanomikach Alijevy adkłali ŭ piać razoŭ bolš reziervaŭ za Łukašenku.

Vynikovaje apošniaje miesca

Urešcie, hałoŭnaja ličba — suadnosiny ahulnaha VUP krainy i reziervaŭ. Čym bolšy pracent, tym biaśpiečniejšaja ekanomika krainy. Ličycca, što minimalna biaśpiečny pamier reziervaŭ — abjom trochmiesiačnaha ekspartu krainy.

Lidary ŭ hetaj naminacyi — Azierbajdžan z Kazachstanam. Ahromnistaja Rasija adkładvaje hrošy nastolki ž plonna, jak maleńkaja Małdova. Prybałtyka i Kaŭkaz trymajucca pryblizna na adnym i tym ža ŭzroŭni, a voś Biełaruś katastrafična pravalvajecca. Usiaho 9,5%! Heta značycca, što kraina zdoleła adkłaści na čorny dzień tolki adnu dziasiatuju ad pamieru ekanomiki za hod. Kali ž uličyć, što ŭžo ŭ bližejšym hodzie Biełarusi daviadziecca addavać daŭhi Mižnarodnamu valutnamu fondu i Rasii, to załataja žyła padajecca nadzvyčaj tonkaj.

Dyk pra jakoje ŭdałaje nazapašvańnie zołata viadzie havorku Prakapovič?

• 0
• 0
• 0
• 0
• 0
• 0
• 0
• 0