Maci palitviaźniaŭ

Fota Andreja Lankieviča

Maryja Fińkievič

Spadarynia Fińkievič da zaniatkaŭ Artura palitykaj pryzvyčaiłasia, choć i nie padtrymlivaje metady: «Jany nie dasiahnuć mety».

Syna zatrymali 1 lutaha z farbaj u rukach. Razam z Alaksiejem Janušeŭskim jon pisaŭ na płocie hrafici «Chočam novaha» i «Dastaŭ» (hetaja akcyja nie praduhledžvaje kryminalnaje adkaznaści za psavańnie dziaržmajomaści, płot — nie ściana budynku). 3 lutaha Alaksieja adpuścili pad padpisku ab niavyjeździe, Artura pakinuli ŭ SIZA na Vaładarskaha. Adyhrali ro-lu šmatrazovyja zatrymańni padčas maładafrontaŭskich akcyjaŭ. Siabry jak mohuć padtrymlivajuć Artura: u 21-šy dzień narodzinaŭ, 8 lutaha, zładzili la ścienaŭ turmy pikiet.

Pra svaje pačućci spn. Maryja kaža nieachvotna. Z abureńniem tolki zhadvaje pieratrus u kvatery, naładžany 1 lutaha. Vobysk tryvaŭ hadzinu. «Pieraparoli bializnu. Majoj mamie pahražali: kali vy nam usio nie pakažacie, jašče raz pryjdziem. Ja im kažu: kudy vy pryjdziecie? Ja vas prosta nie pušču! Što, dźviery łamać budziecie?» — narakaje žančyna na chamskija pavodziny milicyjantaŭ. «Imknulisia zapisać na Artura jak maha bolš. Kazali: «Voś hety televizar zapisvajem na jaho». A potym pryjduć i zabiaruć maju majomaść?» Praŭda, u hetym švonderaŭskim pamknieńni chapanuć jak maha bolš Maryja Fińkievič bačyć i nadzieju: mahčyma, usio abydziecca tolki štrafam.

Taciana Kaśpiarovič

Spn.Kaśpiarovič skardzicca, što nie dachodziać listy da syna: «Śpiarša kazali, što cenzaraŭ mała, ciapier zajaŭlajuć — cenzary chvarejuć. Tamu, maŭlaŭ, list dojdzie da Źmitra praz try tydni». Pieršy list ad syna, napisany 1 lutaha, jana atrymała na šosty dzień. Sama spn. Kaśpiarovič za ŭvieś čas Źmitrovaha źniavoleńnia napisała dziesiać listoŭ. U adzinym atrymanym liście Źmicier napisaŭ, što ŭ kamery duža choładna. Maci pieradała jamu dva ciopłyja švedry, niekalki paraŭ škarpetak.

1 lutaha pieradała synu vialiki pakunak, jaki dazvalajuć pieradavać raz u paŭmiesiaca: pradukty, knihi («Historyju Biełarusi», «Novy Zapaviet», raman V.Ipatavaj «Alhierdava dzida»). U kamery, kaža, jość televizar.

Źmicier vyzvaleny ad vojska: u samotnaj maci jon adziny syn. I adziny karmilec u siamji: Taciana Kaśpiarovič — pensijanerka. Adhuknulisia dobryja ludzi. «Mnie šmat telefanavali ludzi, jakim Źmicier arhanizoŭvaŭ pajezdki. Ja im kažu: pakul stajać marazy, pajezdki admianiajucca. Ale ludzi kažuć: my čytajem «Našu Nivu», usio viedajem, avansavyja hrošy za pajezdki viartać nia treba».

Maci spadziajecca, što Źmicier paśla vychadu na volu praciahnie adukacyju: «Jon vielmi dobra vučyŭsia. Pojdzie ŭ aśpiranturu ci mahistraturu».

Taciana narakaje na advakata Paŭła Sapiełku, jaki redka sustrakajecca z synam. Na siońnia advakat — adziny čałaviek, jaki moža bačycca z chłopcam štodnia i prynosić ad jaho viestki. Advakat kaža maci, što nia moža damahčysia sustrečy z prakuroram i maje abmiežavanyja mahčymaści da pieradačy spravy z prakuratury ŭ sud.

Taciana Sieviaryniec

Taciana Sieviaryniec pra syna kaža z honaram. Zhadvaje adčuvańni ŭ momant, kali daviedałasia pra prysud Paŭłu: «My nia toje, što źmirylisia... Heta było abureńnie!» I paraŭnoŭvaje praces z trahiedyjaj na Niamizie ŭ 1999 hodzie. «Statkievič i Paša zrabili ŭsio, kab nivodzin čałaviek nie atrymaŭ drapiny ci huzaka. I ich zasudzili. A za śmierć ludziej na Niamizie nikoha nie pakarali, vinavatych nie znajšli — niby jany sami tudy kinulisia pamirać».

Niadaŭna, u mocnyja marazy, Pavał pryjaždžaŭ «u adpačynak». «Badziora vyhladaŭ. Schudnieŭ, praŭda. Nia raj ža tam, a ciažkaja fizyčnaja praca». Dziejnaść Paŭła na «chimii» ŭžo prynosić plon: «Da syna iduć, kali adčuvajuć niespraviadlivaść. Kali stajali marazy, dyk ludzi ŭžo sami, biaz Paŭła, skazali, što nia buduć pracavać u lesie».

Jak i kožnaja maci, Taciana Sieviaryniec pieražyvaje: «Biehaju pa rynku, kuplaju valonki, rukavicy. Ale Paša ścipła da ŭsiaho stavicca, kaža, što jamu ničoha nia treba. Jon viedaje, jakija vydatki iduć na ŭsie hetyja zakupki, tamu admaŭlajecca». Ad adnaje zhadki pra syna na tvary źjaŭlajecca ŭśmieška: «Pryvioz Paša štany, kab zašyła. Jon i sam umieje trymać ihołku ŭ rukach, ale tut pryvioz: zašyj tak, kab nia drałasia».

Maci zhadvaje, što padčas «adsiedki» ŭ izalatary na Akreścina ŭ Miensku Pavał dzialiŭsia vopratkaj i ježaj z sukamernikami. Hetki ž jon i ŭ ssyłcy. Praŭda, nie abychodzicca biaz prykrych vypadkaŭ. «Paša budzie svarycca, što ja heta raspaviadaju, ale... Paša pryjechaŭ dadomu ŭ tonkim švedry, tonkich štanach. Ja pytajusia: «My ž tabie kupili ciopłuju vopratku, čamu nia nosiš?» A jon kaža, što pasialili da jaho chłopca z Novałukomlu, toj hoły pryjechaŭ. Dyk Paša jamu ŭsio i addaŭ. A toj chłopiec jaho i ababraŭ: pakul Pašy nie było, źjeŭ jahonyja prypasy, zabraŭ rečy...»

Maci suciašajecca tym, što da Paŭła jeździać siabry j znajomyja: «Jon prykład dla mnohich, dla tych, chto jašče nie navažvajecca vykazać svaje dumki ŭhołas». Kaža, što na pracy da «maci palitviaźnia» staviacca z razumieńniem: «Usie viedajuć, što ja zdatnaja na rašučyja kroki i ŭ nastaŭnickim žyćci zaŭždy krytyčna staŭlusia da rašeńniaŭ načalstva. Tamu pavažajuć».

Napišy palitviaźniam:

220050 Miensk, vuł.Vaładarskaha, 2, SIZA №1, kamera 146. Kaśpiaroviču Źmitru.

220050 Miensk, vuł.Vaładarskaha, 2, SIZA №1. Fińkieviču Arturu.

211652 Połacki rajon. p.a. Małoje Sitna, Da zapatrabavańnia Sieviaryncu Paŭłu.

225416 Baranavičy, vuł.Žukava 12a, kv.5, Statkieviču Mikałaju.

• 0
• 0
• 0
• 0
• 0
• 0
• 0
• 0