Minskija milicyjanty raskryli kradziež mašyny pa mietadzie Šerłaka Chołmsa
17-hadovy navučeniec adnaho ź minskich PTV zachacieŭ pakatacca na pryjacielskim aŭtamabili bieź viedama haspadara. Ściahnuŭ klučy, trapiŭ u avaryju, paśla čaho aŭtamabil i klučy viarnuŭ na miesca.
Siabroŭskaja kampanija adznačała subotni viečar u kvatery pa vulicy Kabuškina. Adzin z haściej zahadzia prykmieciŭ, što haspadar kvatery pakłaŭ klučy ad svaich «Žyhuloŭ» u kišeniu štanoŭ. Paśla taho jak haścinny haspadar zasnuŭ, junak ściahnuŭ klučy i spuściŭsia na dvor.
Žadańnie zrabić načnuju aŭtaprahułku prajšło paśla taho, jak, adjechaŭšy litaralna na 500 mietraŭ, kiroŭca ŭrezaŭsia ŭ płot. Chłopiec vyrašyŭ pra incydent zmaŭčać, a aŭto i klučy viarnuć na raniejšaje miesca.
Ubačyŭšy nazaŭtra paškodžany aŭtamabil, haspadar źviarnuŭsia ŭ milicyju. Pra toje, što da zdareńnia maje niepasrednaje dačynieńnie adzin ź jaho tavaryšaŭ, jon na toj momant nie dumaŭ.
Supracoŭniki milicyi, praanalizavaŭšy papiarednija padziei, vyvieli złamyśnika na čystuju vadu. Adpraŭnym punktam padčas pabudovy vysnovaŭ stała akaličnaść, na jakuju navat haspadar pieršapačatkova nie źviarnuŭ uvahi. Sprava ŭ tym, što z ranicy jon znajšoŭ klučy ad svajho aŭtamabila ŭ pravaj kišeni štanoŭ, choć zvyčajna zachoŭvaŭ ich u levaj.
Ciapier niadobranadziejny hość zatrymany, u dačynieńni da jaho śledčym adździełam papiaredniaha rasśledavańnia Zavodskaha RUUS raspačataja kryminalnaja sprava pa č.1 art. 214 Kryminalnaha kodeksa Respubliki Biełaruś («Zhon»). Aŭtaamataru pahražaje da 5 hadoŭ pazbaŭleńnia voli.
Ciapier čytajuć
Siarhiej Cichanoŭski pierabraŭsia žyć u Łos-Andželes72
Kamientary