15-ja «Rok-karanacyja» projdzie ŭ farmacie hała-kancerta

U kancertnaj zale «Minsk» 18 lutaha projdzie 15-y fiestyval «Rok-karanacyja».

Jak paviedamiŭ na pres-kanfierencyi 3 lutaha ŭ Minsku zasnavalnik fiestyvalu Juryj Cybin, sioleta zamiest tradycyjnaj cyrymonii ŭznaharodžańnia lepšych muzykantaŭ hoda arhanizatary fiestyvalu praviaduć hała-kancert.

Pavodle jaho słoŭ, u im voźmuć udzieł viadomyja biełaruskija rok-hurty, jakija raniej byli adznačanyja na «Rok-karanacyi». Siarod ich — «Niejra Dziubiel», «Krama», N.R.M., «Bieź bileta», Drum Ecstasy, «Pałac», Kriwi, Rasta i inš. Jon adznačyŭ, što hała-kancert z udziełam pieramožcaŭ premii roznych hadoŭ — najlepšy sposab padkreślić značnaść muzyčnaj padziei. Arhanizatary fiestyvalu admovilisia ad zaprašeńnia na «Rok-karanacyju» zamiežnych kalektyvaŭ, bo ličać jaho tolki biełaruskim mierapryjemstvam.

Jak paviedamiŭ suarhanizatar fiestyvalu Pavieł Kašyryn, niahledziačy na źmianieńni, na hała-kancercie«Rok-karanacyi»

buduć vyznačanyja pieramožcy dźviuch naminacyj — «Najlepšy albom» i «Najlepšy hurt».

U śpis pretendentaŭ vyłučanyja ŭładalniki hetych uznaharod za ŭvieś čas isnavańnia fiestyvalu. Vyznačać pieramožcaŭ karystalniki biełaruskaha partała «Tuzin Hitoŭ», na jakim prachodzić hałasavańnie.

Lidar hurtu «Krama» Ihar Varaškievič adznačyŭ, što ŭ Biełarusi, u pryncypie, nie pravodzicca mierapryjemstvaŭ, padobnych da «Rok-karanacyi». «Spadziajusia, što fiestyval stanie śviatam u hety sumny čas», — skazaŭ jon.

Vakalist, hitaryst hurtu N.R.M. Pit Paŭłaŭ paviedamiŭ, što, jak i było zajaŭlena raniej, hurt vystupić na «Rok-karanacyi» bieź Lavona Volskaha. Pavodle jaho słoŭ, N.R.M. vykanaje niekalki novych piesień i šerah kampazicyj sa staroha repiertuaru hurtu. Raniej hurt pryniaŭ rašeńnie praciahvać pracu biez Volskaha, bo jon na praciahu apošnich hadoŭ «nie ŭdzielničaŭ u dziejnaści hurtu, admaŭlaŭsia ad udziełu ŭ kancertach i spasyłaŭsia na zaniataść».

Jak adznačyŭ Paŭłaŭ, hurt nie vystupaŭ na praciahu apošniaha hoda. «U vas jość unikalnaja mahčymaść ubačyć, jak vyhladaje N.R.M. bieź Lavona Volskaha», — skazaŭ jon. «Moža być, paźniej štości źmienicca», — dadaŭ barabanščyk Aleh Dziemidovič.

• 0
• 0
• 0
• 0
• 0
• 0