Niamiecki ministr syšoŭ u adstaŭku praz płahijat

Papularny ministar abarony Niamieččyny Karł-Teador cu Hutenberh, padaŭ u adstaŭku ŭ suviazi z abvinavačvańniami, što častka jahonaj doktarskaj dysertacyi źjaŭlajecca plahijatam. Jaho adstaŭka — surjozny ŭdar pa pazycyjach kanclera Anhieły Merkel i jaje partyi, jakaja rychtujecca da miascovych vybaraŭ u troch ziemlach Niamieččyny ŭ sakaviku.

39-hadovy arystakrat i były ministar ekanomiki Karł-Teador cu Hutenberh, jakoha abvinavacili ŭ tym, što častka jahonaj doktarskaj dysertacyi źjaŭlajecca plahijatam, paviedamiŭ siońnia na presavaj kanferencyi, što rašeńnie ab adstaŭcy było «samym balučym rašeńniem u jaho žyćci».

Na minułym tydni ŭniversytet Bajrojta pazbaviŭ Hutenberha zvańnia doktara paśla taho, jak jon pryznaŭsia, što ŭ jaho dysertacyi byli «niedachopy». Pieršapačatkova jon adkidaŭ abvinavačvańni ŭ plahijacie jak «absurdnyja».

Były ministar paprasiŭ prabačeńnia va ŭniversyteta, chacia naŭprost i nie pryznaŭ słušnaść abvinavačvańniaŭ.

Niamieckija ŚMI, adnak, paviedamiŭ, što šmatlikija kavałki dysertacyi Hutenberha pra raźvićcio kanstytucyjnaha prava ŭ Eŭraźviazie i ZŠA, abaronienaj u 2006 hodzie, byli ŭziatyja sa starych hazetnych artykułaŭ i inšych navukovych publikacyj, biez naležnych spasyłak.

Hutenberh siońnia pryznaŭ, što skandał, padčas jakoha presa dała jamu mianuški «baron Cut-And-Paste» (vyrazać i ŭstavić) i «Cu Huhłberh» (ad nazvy pošukavaj systemy Google), dabiŭ jaho: «Ja zaŭsiody byŭ hatovy zmahacca, ale ja dasiahnuŭ miažy svaich siłaŭ».

Były ministar paviedamiŭ, što skandał vakoł jaho dysertacyi zabiraŭ u jaho šmat času i pahražaŭ sarvać plan reformy bundesveru. Hutenberh padkreśliŭ, što vyrašyŭ syści ŭ adstaŭku, kab praduchilić dalejšuju škodu ad skandału: «Jak i ŭsie ludzi, ja pavinien pryznavać maje słabaści i pamyłki».

Pavodle acenak naziralnikaŭ, Karł-Teador, razam sa svajoj žonkaj Stefani — prapraŭnučkaj lehiendarnaha kanclera Niamieččyny Ota fon Bismarka, byŭ hlamurnaj postaćciu ŭ šerym śviecie niamieckaj palityki.

Jaho adstaŭka źjaŭlajecca surjoznym udaram pa kancleru Anhiele Merkel, jakaja padtrymlivała Hutenbierha na praciahu ŭsiaho skandału. Učora byŭ abnarodavany adkryty list 23 tysiač navukoŭcaŭ i hramadzkich dziejačoŭ z asudžeńniem kanclera za jaje sproby abaranić svajho ministra.

Jaho rašeńnie syści ŭ adstaŭku prypała jak raz na momant, kali Chryścijanska-demakratyčny sajuz rychtuje da vybaraŭ u troch ziemlach Niamieččyny ŭ sakaviku, u tym liku ŭ paŭdniova-zachodniaj ziamli Baden-Viurtemberh, bastyjonie kanservatyŭnaj partyi. Apytańni pakazvajuć, što CHDS moža tam atrymać parazu.

Ale adstaŭka Hutenberha nie aznačaje, što jon sychodzić z palityki. Apytańni hramadzkaj dumki pakazvajuć, što skandał nie mocna paškodziŭ jaho papularnaści siarod niemcaŭ, bolšaść ź jakich chacieła b, kab jon zastaŭsia na pasadzie ministra.

• 0
• 0
• 0
• 0
• 0
• 0
• 0
• 0