Akcyja salidarnaści z «Lapisam Trubiackim»

Amatary hurtu zaklikali ludziej sabracca 2 krasavika kala minskaha kłuba «Reaktar» a 19.00.

Kab zdać kvitki i praśpiavać razam niekalki piesień lubimaj kamandy. I takim čynam vykazać salidarnaść z muzykami.

28 sakavika stała viadoma ab admienie dvuch kancertaŭ hurtu ŭ stalicy.

«Lapis Trubiackoj» musiŭ vystupić u staličnym kłubie «Reaktar» 1 i 2 krasavika.

U «Lapisa Trubiackoha» ŭ tury pa Biełarusi płanavalisia jašče kancerty ŭ Maładziečnie (raskuplenyja ŭsie kvitki), Žłobinie (400 kvitkoŭ kupili) i Salihorsku (u prodaž kvitki jašče nie pastupali). Adnak šancaŭ mała: u Homieli, Mahilovie i Minsku vystupy sarvalisia.

Pradziusar adznačaje, što biełaruski tur kamandy padzialili na dźvie častki: da źjaŭleńnia «čornaha śpisu» i paśla.

Fakt stvareńnia śpisu ministr infarmacyi Pralaskoŭski nazvaŭ «hniusnaj falšyŭkaj», ale paśla taho hurtu nie dali pravieści nivodzin kancert u Biełarusi. Paśla zabarony vystupu ŭ «Reaktary» muzyki zrazumieli, što isnuje tatalnaja zabarona.

U novym «čornym śpisie», niadaŭna razasłanym pa dziaržSMI, — bolš za 60 asobaŭ ź Biełarusi, Rasii, Vialikabrytanii, ZŠA. Muzyčnyja hurty «Lapis Trubiackoj», «Krama», «NRM», «Pałac», «Niejra Dziubiel», «DDT», «Naiŭ», «Tarakany», dramaturhi Andrej Kurejčyk, Tom Stopard, Uładzimir Chalip, kalektyŭ «Svabodnaha teatra», piśmieńniki Hienadź Buraŭkin, Viktar Jerafiejeŭ, mastak Alaksiej Maračkin, kinaakciory Džud Łoŭ, Kievin Spejsi dy inšyja.

Paśla źjaŭleńnia śpisu raptam admianilisia i vystupy ŭ «Niejra Dziubiela», «Krambambuli», Źmitra Vajciuškieviča.

Pieršy čorny śpis dziejničaŭ ad 2004 da 2007 hadoŭ. Jon byŭ mienšy. Paśla ŭdziełu ŭ mitynhu apazicyi 21 lipienia 2004 hoda pačalisia prablemy ŭ N.R.M., «Pałac», Drum Ecstasy, «Niejra Dziubiel», Pomidor/OFF, ZET, Vajciuškieviča.

Jak bačym, za siem hadoŭ kolkaść «artystaŭ-vorahaŭ» Łukašenki vyrasła.

Artystam z čornaha śpisu dapamohuć vystupy na «Biełsacie» i zamiežnych radyjo, a taksama na kancertach «Salidarnyja ź Biełaruśsiu». Heta kampiensuje stratu hanararaŭ unutry krainy.

Salist «Lapisaŭ» na admienu kancertaŭ adreahavaŭ rezka: «Sučasnuju Biełaruś apisaŭ Orueł».

— Słova «apalityčny» u situacyi siońniašniaj Biełarusi stračvaje sens, — skazaŭ Siarhiej Michałok. — Čałaviek, jaki siabie tak nazyvaje, apryjory stanovicca ŭ adzin šerah z pasłuhačami sučasnaha biełaruskaha režymu. Ja bačyŭ časopis z top-50 samych paśpiachovych ludziej Biełarusi. Siarod ich nie znajšoŭ nivodnaha mastaka, dramaturha, paeta, historyka, vučonaha, myślara, kasmanaŭta, hieroja pracy. Usia «elita» i «bahiema» sučasnaj Biełarusi składajecca ź niejkich uładalnic viasielnych sałonaŭ i kaśmietałahičnych kabinietaŭ, dyrektaraŭ bucikoŭ i dvuch-troch papuhajaŭ ź biełaruskaha telebačańnia. Vychodzić, naša elita — heta biazdumny mažorny natoŭp, jaki tančyć na rejvach i šansonnych kancertach. Usio, što źviazana sa śviežymi idejami, adkryćciami, sapraŭdnym mastactvam — usio heta znachodzicca ŭ hłybokim andehraŭndzie.

U Biełarusi idzie kulturny hienacyd. Kožny razvažlivy, prystojny, intelihientny čałaviek luboj prafiesii moža ŭnosić siabie ŭ čorny śpis.

Takich, jak my, prosta vyžyvajuć z krainy. Na nie dazvalajuć śpiavać, inšym nie dajuć zajmacca mastactvam, navukaj, biznesam. I kali raniej ad nas patrabavałasia maŭčańnie, to ciapier nas adsiul prosta vyhaniajuć.

Ja chaču parekamiendavać usim biełarusam pračytać samuju hałoŭnuju dla sučasnaj Biełarusi knihu. Jana napisana 50 hadoŭ tamu čałaviekam, jaki nikoli nie byŭ u našaj krainie, ale jon padrabiazna jaje apisaŭ. Kniha nazyvajecca «1984», aŭtar — Džordž Orueł.

Zaklik da fłeš-mobu la «Reaktara» raspaŭsiudžvajecca ŭ błohach i Fejsbuku.

• 0
• 0
• 0
• 0
• 0
• 0