Valer Bułhakaŭ: Stratehična Rasija zacikaŭlena ŭ tarmažeńni biełaruskaha nacyjatvareńnia

15 hadoŭ tam była padpisanaja damova ab stvareńni Supolnaści Biełarusi i Rasiei, jakaja potym pieraŭtvaryłasia ŭ hetak zvanuju «sajuznuju dziaržavu». Jaki šlach za hetyja hady prajšoŭ prajekt biełaruska-rasijskaj intehracyi? Jak źmianiłasia staŭleńnie da Biełarusi rasijskaha kiraŭnictva? Na hetaja pytanini adkazvaje palitołah, hałoŭny redaktar časopisa «Arche» Valer Bułhakaŭ.

Cyhankoŭ: Supolnaść Biełarusi i Rasii, jakaja paźniej pierarasła ŭ hetak zvanuju «Sajuznuju dziaržavu» ŭtvarałasia ŭ siaredzinie 90-ch, kali byli zusim inšych hieapalityčnyja i ŭnutrypalityčnyja ŭmovy. Na vašu dumku, ci adpaviadaje na siońnia hety prajekt intaresam biełaruskich i rasijskich palityčnych elit ci jon zastaŭsia pieravažna ideałahičnym prajektam, i realnaha napaŭnieńnia nie maje?

Bułhakaŭ: Kali jon isnuje to, vidać, niejkim intaresam biełaruskich i rasijskich elit jon adpaviadaje. Prosta ciaham usiaho hetaha času išło pierafarmulavańnie hetych intaresaŭ. Sapraŭdy, 15 hadoŭ nazad isnavała ŭražańnie, što prajekt supolnaj dziaržavy moža być uvasobleny. I ŭ Rasii i ŭ Biełarusi peŭnaj častkaj hramadstva jon usprymaŭsia jak realistyčny.

Ciapier vyjaŭlajecca, što jon ad samoha pačatku byŭ pryrečany na isnavańnie ŭ fantomnym statusie. Tym nie mienš navat farmalnaje jaho isnavańnie, kultyvacyja hetaha terminu «sajuznaja dziaržava», a taksama peŭnych struktur i instytucyjaŭ paćviardžajuć dumku, što jon pa-raniejšamu cikavy peŭnym palitykam jak u Biełarusi, tak i ŭ Rasii.

Cyhankoŭ: Ci nie zdajecca vam, što apošnija hady i asabliva miesiacy Rasija mianiaje svajo staŭleńnie da stasunkaŭ ź biełaruskim kiraŭnictvam? Kali raniej isnavała niejkaje padabienstva adnosinaŭ na roŭnych, to ciapier usio bolš farmujecca staŭleńnie pa schiemie vasała i siuzierena?..

Bułhakaŭ: Kali pačynałasia ŭsia vałtuźnia vakoł «sajuznaj dziaržavy», to ŭ Rasii naziraŭsia paraluš ułady. Heta byŭ čas, kali farmavaŭsia sučasny aliharchičny režym, raskradańnie «narodnaha dabra». I tut treba addać naležnaje Łukašenku, jaki ŭłaviŭ, što ŭ Rasii adbyvajucca pracesy, na jakich možna zdabyvać ekanamičnuju, palityčnuju i inšuju vyhadu.

Što tyčycca ciapierašniaha momantu, to my bačym kansalidacyju aŭtarytarnaj dziaržavy ŭ Rasii, uźniknieńnie bolš efiektyŭnaha palityčnaha režymu. Ale my nie bačym stratehičnaha pieraasensavańnia metaŭ rasijskaj palityki ŭ dačynieńni da Biełarusi.

Farmat zastajecca tym samym, tolki bolš nieprymańnia vyklikaje sam Alaksandr Łukašenka. Stratehična Rasija zacikaŭlena ŭ tarmažeńni biełaruskaha nacyjatvareńnia, u padaŭlajučaj infarmacyjnaj prysutnaści ŭ Biełarusi, u roskvicie rasijskaj movy, u marhinalnym statusie biełaruskaj movy dy inšych padobnych rečaŭ. Taki padychod zastajecca niaźmiennym užo šmat hadoŭ. I ja dumaju, što niezaležna ad asoby biełaruskaha prezidenta jon budzie takim ci inšym sposabam artykulavacca i navat pa miery mahčymaści realizoŭvacca ŭ žyćcio.

• 0
• 0
• 0
• 0
• 0
• 0
• 0
• 0