Chto zbankrutavaŭ motavelazavod?

Na pradpryjemstvie ŭviedzienaja «załataja akcyja», dziaržava zablakavała prychod na zavod japonskaha investara z kancernu «Kadžyva». Ciapier prablemnamu pradpryjemstvu prapanujuć «pakłaści akcyi na stoł».

Mienski matacykletny i velasypedny zavod pracuje z 1945, z 1999 pieraŭtvorany ŭ AAT. Asnoŭnyja rynki — Rasieja, Ukraina, Tadžykistan, Kyrhyzstan, Aŭhanistan, Nihieryja.

Spravy pradpryjemstva stali švach, kali ŭ 2003 hodzie Vijetnam, kudy, zhodna ź miždziaržaŭnymi damovami, dasiahnutymi padčas vizytu A.Łukašenki, musiła ekspartavacca pradukcyja AAT, uvioŭ 40-adsotkavaje myta na pradukcyju biełaruskaha zavodu. Da taho ž uzmacniłasia kankurencyja z boku kitajskich vytvorcaŭ. Z 2003 h. pradpryjemstva pracuje sa stratami. Razavyja pośpiechi — hetak, 500 rovaraŭ u «Motavela» nabyła mienskaja milicyja dla vuličnych patruloŭ — nie ratujuć spravy.

«BDH. Diełovaja hazieta» piša, što ŭ 2003 hodzie kantrolny pakiet akcyjaŭ pradpryjemstva prapanoŭvaŭ nabyć japonski kancern «Kadžyva». Ale ŭ vyniku pieramovy pradstaŭnikoŭ biełaruskaj dziaržavy j nahladalnaj rady pradpryjemstva ŭhoda nie adbyłasia. Nie žadajučy puskać na zavod zamiežnaha investara, dziaržava abiacała vydzielić srodki pradpryjemstvu na techničnaje pieraŭzbrajeńnie. Dziaržava paabiacała i nabyć 2,5 tysiačy matacykłaŭ dla pryzoŭ udarnikam bitvy za ŭradžaj-2004, ale svajho słova nie strymała.

Kab uratavać pradpryjemstva, akcyjanery AAT 18 listapada 2004 h., hod tamu, dali zhodu na restrukturyzacyju zapazyčanaści AAT pierad dziaržavaj u pamiery 11 miljardaŭ rubloŭ šlacham vypusku j pieradačy dziaržavie dadatkovaj emisii akcyjaŭ, u vyniku čaho dola dziaržavy ŭ AAT musiła b skłaści 97% (ciapier ža dziaržavie nie naležyć nivodnaj akcyi, bo ŭsie jany byli nabytyja pracoŭnymi pradpryjemstva ŭ 1999 h.).

Tady ž pazbyŭsia pasady Anatol Jaźvinski — hiendyrektar pradpryjemstva (i, jak ni dziŭna, pajšoŭ na padvyšeńnie, u Ministerstva pramysłovaści). U planach było, što dziaržaŭny pakiet akcyj AAT budzie znachodzicca ŭ aperatyŭnym kiravańni ministerstva pramysłovaści. Da taho ž dziaržava pavinna była dać zavodu kredyt na zaviaršeńnie techničnaha pieraŭzbrajeńnia ŭ pamiery 20 miljardaŭ rubloŭ.

Adnak za hetaje rašeńnie na schodzie akcyjaneraŭ u žniŭni 2005 hodu prahałasavali tolki 50% akcyjaneraŭ zamiest patrebnych pa statucie 75%. I — «pytańnie zavisła». A Mienharvykankam tymčasam uvodzić na pradpryjemstvie «załatuju akcyju», to bok robić jaho de-fakta dziaržaŭnym.

U chodzie narady ŭ sakaviku 2005 prezydent zajaviŭ pra nieabchodnaść pravieści pravierku dziejnaści pryvatnych pradpryjemstvaŭ. «Kali jany razvalvajucca i pracavać nia mohuć, ale patrebny dziaržavie, jany pavinny być viernuty narodu. Pryčym u dobraachvotnym paradku, biez nacyjanalizacyi, kab nas potym nie dakarali», — padkreśliŭ A.Łukašenka.

U jakaści prykładu A.Łukašenka pryvioŭ AAT «Motavela». Dla vychadu z kryzisu kiraŭnictva pradpryjemstva pry padtrymcy ŭradu prapanavała dziaržavie vykupić akcyi. Prezydent kateharyčna adchiliŭ prapanovu ab pakupcy akcyj: «Jany niekali dziaržaŭnyja akcyi zabrali faktyčna biaspłatna. Chočuć padtrymki — akcyi na stoł, pradpryjemstva całkam viartajecca dziaržavie. I my im, moža, pazyčym niekatoruju sumu hrošaj».

• 0
• 0
• 0
• 0
• 0
• 0
• 0
• 0