U trecim kancercie ź sieryi «Tuzin. Unplugged» 16 červienia vystupić hurt Dali na čale ź Viktaram Rudenkam i repier Vinsent z žyvym składam muzykaŭ. Kožny z vystupoŭcaŭ rychtuje ekskluziŭny set.
Dali pakažuć prahramu, jakuju rychtujucca prezientavać u Maskvie, a kamanda Vinsenta rychtuje akustyčnyja varyjanty ŭžo viadomych pieśniaŭ, aranžyroŭki niekatorych ź ich źmieniacca karennym čynam.
Pieśni Vinsenta dobra viadomyja naviednikam «Tuzina Hitoŭ». Reper debiutavaŭ u čarcie na pačatku 2008 hoda z trekam «Minsk-Paryž», zajaviŭšy, što źbirajecca źmianić stan spravaŭ u biełaruskim repie. Jaho nastupny chit «Adychodziać karabli» zajmieŭ surjozny pośpiech, trek dvojčy ŭźnimaŭsia na pieršuju prystupku chit-paradu. Za hety čas Vinsent zapisaŭ i prezientavaŭ debiutny albom «Pačatak», zładziŭ pieršy fiestyval biełaruskamoŭnaha repu, a potym ździviŭ usich, zajaviŭšy pra svoj žyvy prajekt. Vinsent z hurtom zahučaŭ dy jašče jak — jaho solny kancert u «Reaktary» vyklikaŭ niemały rozhałas. Na kancercie «Tuzin. Unplugged» 16 červienia Vinsent razam z svaimi muzykami pradstavić admysłovuju prahramu: «My padrychtujem akustyčnyja varyjanty ŭžo viadomych pieśniaŭ. U niekatorych aranžyroŭki značna źmieniacca. Dla mianie i muzykaŭ heta budzie cikavym dośviedam. Budziem rabić ekśpierymienty z hukam», — zajaŭlaje vykanaŭca.
Druhija vystupoŭcy — hurt Dali — taksama mohuć pachvalicca svajoj aryhinalnaściu. Jany debiutavali na «Tuzinie Hitoŭ» na internet-adbory da festu «Basovišča» ŭ 2005 hodzie i vyłučylisia siarod astatnich svajoj pazityŭnaściu i niestandartnaściu. Usie naŭkoł mietał hrajuć dy pra harotnuju staronku piajuć, a tut raptam — «Hraj harmon». Na «Basovišča» Dali tak i nie trapili, ad taho, vidać, vyrašyli pasprabavać svaje siły ŭ adboryščy na «Jeŭrabačańnie». Niekalki hadoŭ zapar jany padavali zajaŭku, ale ŭ finalnuju stadyju adboru trapili tolki ŭ Polščy. U 2009 hodzie Dali realna pretendavaŭ na toje, kab pradstavić hetuju krainu na jeŭrapiejskim feście. Nie chapiła zusim troški, zatoje muzyki pakazalisia ŭ efiry polskaha telebačańnia i dakazali sabie i ludziam, što niama ničoha niemahčymaha. Na «Tuzin. Unplugged» 16 červienia hurt rychtuje akustyčnuju prahramu, jakuju nieŭzabavie prezientuje ŭ Maskvie. Ujaŭleńnie pra žyvoje hučańnie Dali možna skłaści pavodle pieśni «Pachnie čabor», jakaja brała ŭdzieł u čarcie na «Tuzinie Hitoŭ».
Pa tradycyi vieści imprezu budzie lidar hurta «Pałac» Aleh Chamienka, niaźmienny viadoŭca radyjoviersii chit-paradu «Tuzin Hitoŭ», jakaja idzie na chvalach «Radyjo Racyja».
Kancert «Tuzin. Unplugged» padtrymlivaje hramadskaja kampanija «Budźma biełarusami!».
Kancert pačniecca ŭ 19:00 16 červienia ŭ minskim kłubie «Hrafici» (zav. Kalinina, 16). Košt kvitka — 25 000 rub. Nabyć jaho možna ŭ kłubie zahadzia z 18.00 da 22.00 štodnia, akramia suboty i niadzieli. Kolkaść miescaŭ abmiežavanaja!
Infalinija — (029) 638-44-44, (033) 638-44-44, skype, google: Diskoteq, ICQ: 531-07-353
Kamientary