Stolki Biełaruś pavinna vydatkavać na padrychtoŭku da čempijanatu śvietu.
Načalnik upraŭleńnia fizičnaj kultury, sportu i turyzmu Minharvykankama Alaksiej Prakapovič paviedamiŭ, što na padrychtoŭku da chatniaha čempijanatu śvietu pa chakiei Biełaruś vydatkuje 11,24 trłn biełaruskich rubloŭ, abo 2 miljardy dalaraŭ. Amal pałova hetych srodkaŭ buduć vydatkavanyja z respublikanskaha i minskaha haradskoha biudžetaŭ.
Takim čynam, raniejšyja zajavy biełaruskich čynoŭnikaŭ ab tym, što da čempijanatu-2014 Minsk budzie rychtavacca, u asnoŭnym, pryciahvajučy srodki zamiežnych inviestaraŭ, apynulisia blefam.
"Vykanańnie mierapryjemstvaŭ raźvićcia transpartnaj i sacyjalnaj infrastruktury Minska da čempijanatu śvietu pa chakiei zapatrabuje 11,24 tryljona rubloŭ, - zajaviŭ Alaksiej Prakapovič u intervju BIEŁTA. - U tym liku ź biudžetu horada - 4,9 tryljona, kredytnych resursaŭ - 1,43 tryljona, respublikanskaha biudžetu - 574 miljardaŭ, srodkaŭ inviestaraŭ - 3,38 tryljona i pazykovych srodkaŭ bankaŭ pad harantyi ŭrada - 877 młrd.
Nahadajem, čempijanat śvietu 2014 hoda projdzie ŭ Minsku z 9 pa 25 maja, adrazu paśla Alimpijady ŭ Sočy. Mienavita tamu śpiecyjalisty miarkujuć, što čempijanat nie pryciahnie vialikaj uvahi, i ŭkładańni ŭ padrychtoŭku da jaho nie akupiacca. Choć biełaruskija ŭłady majuć supraćlehły punkt hledžańnia i navat u kryzis, znachodziačysia ŭ pošukach kredytaŭ pa ŭsim śviecie, zrazajučy sacyjalnyja prahramy, tym nie mienš, hatovyja układać vialikija sumy ŭ chakiej.
Kamientary