Abama pieraduchiliŭ defołt ZŠA

Prezident ZŠA Barak Abama padpisaŭ zakon ab pavyšeńni vierchniaj miažy dziarždoŭhu ZŠA. Hety dakumient dazvoliŭ Złučanym Štatam paźbiehnuć defołtu pa svaich pazykovych abaviazańniach,

Niezadoŭha da hetaha sienat ZŠA (vierchniaja pałata amierykanskaha Kanhresa) prahałasavała za ŭźniaćcie stoli dziarždoŭhu. 74 sienatara prahałasavali za, 26 vykazalisia suprać.

Płan praduhledžvaje pavieličeńnie limitu dziarždoŭhu minimum na 2,1 trłn dalaraŭ i skaračeńnie deficytu biudžetu za 10 hadoŭ na tuju ž sumu. Pry hetym pieršy etap skaračeńniaŭ (na 917 młrd) zakranie tak zvanyja dyskrecyjnyja vydatki, heta značyć tyja biudžetnyja vydatki, jakija padlahajuć štohadovamu ŭchvaleńniu Kanhresa. Asnoŭnuju častku hetych vydatkaŭ składajuć vydatki na abaronu i biaśpieku.

Na druhim etapie śpiecyjalny dvuchpartyjny kamitet Kanhresa pavinien budzie vyznačyć, jak damahčysia dadatkovych skaračeńniaŭ biudžetnaha deficytu na 1,5 trłn dalaraŭ. Pry hetym mohuć paciarpieć dziaržaŭnyja prahramy sacyjalnaha i miedycynskaha zabiaśpiečańnia, takija jak Medicare i Medicaid (na skaračeńni hetych prahram nastojvajuć siabry Respublikanskaj partyi), adnak nie vyklučana, što ŭ intaresach kazny budzie refarmavany Padatkovy kodeks, jak taho chočuć B. Abama i demakraty.

Kali śpieckamitet u nastupnyja miesiacy nie zdoleje damovicca pra toje, jak skaracić biudžetny deficyt jašče na 1,5 trłn dalaraŭ da 2021 (u dadatak da pieršapačatkovaj ekanomii ŭ 917 młrd) abo Kanhres ZŠA nie padtrymaje rekamiendacyi hetaha kamiteta, to budzie aktyvavany śpiecyjalny miechanizm aŭtamatyčnaha skaračeńnia vydatkaŭ na 1,2 trłn dalaraŭ. Heta dazvolić dasiahnuć minimalnaj mety pa skaračeńni biudžetnych deficytaŭ na 2,1 trłn dalaraŭ za 10 hadoŭ.

Adnačasova płan praduhledžvaje try raŭndy pavyšeńnia limitu dziarždoŭhu, tak što ŭ cełym płanka dziarždoŭhu budzie padniataja na 2,1–2,4 trłn dalaraŭ. U ideale limit dziarždoŭhu budzie pavyšany na 2,4 trłn dalaraŭ, što dazvolić administracyi Abamy nie viartacca da hetaha pytańnia da nastupnych prezidenckich vybaraŭ u kancy 2012 hoda, i na hetuju ž sumu buduć skaročanyja biudžetnyja deficyty na praciahu 10 hadoŭ.

Nahadajem, Kanhres ZŠA pavinien byŭ da 2 žniŭnia pavysić płanku dziarždoŭhu, jakaja składaje ciapier 14,3 trłn dalaraŭ, kab Złučanyja Štaty mahli paźbiehnuć defołtu pa svaich pazykovych abaviazańniach. Dapuščalnaja miaža pazyčańniaŭ była piarojdzienaja Ministerstvam finansaŭ ZŠA jašče ŭ traŭni 2011.

• 0
• 0
• 0
• 0
• 0
• 0
• 0
• 0