Praz dva dni paśla hazavaha lamantu Biełaruś pradała «Biełtranshaz»: maŭlaŭ, inšaha vychadu nie było. Praz šeść dzion paśla ŭviadzieńnia naftavych mytaŭ jany admienienyja. Rasieja patrabuje vykanać jašče j akt prynižeńnia -- viarnuć 80 tys. tonaŭ nafty. Faktyčna pryznać fakt kradziažu. Piša Barys Tumar.
Što naściarožvała – što ŭviadzieńnie naftavych mytaŭ adbyłosia demanstratyŭna, u žyvym efiry. Tonkaja palityka tak nia robicca. Heta była bravada, hulnia na biełaruskuju publiku. Hladzicie, Harant kanstytucyi zmahajecca za naša samaje darahoje, za našu nacyjanalnuju niezaležnaść.
Praz dva dni paśla hazavaha lamantu Harant raźvioŭ rukami i pradaŭ «Biełtranshaz»: maŭlaŭ, inšaha vychadu nie było. Tolki nie kažycie mnie, što 29‑ha jon nia viedaŭ, što zrobić 31‑ha.
Praz šeść dzion paśla ŭviadzieńnia naftavych mytaŭ jany admienienyja. Rasieja patrabuje vykanać jašče j akt prynižeńnia -- viarnuć 80 tys. tonaŭ nafty. Faktyčna pryznać fakt kradziažu.
Davajcie pabačym, što budzie zaŭtra. Nia daj Boh «Inšaha vychadu niama» numar dva.
Bo vychad jość! Niama čaho vydumlać rovar, na im užo prajechali našy susiedzi.
Baraćba za niezaležnaść zaklučajecca nia ŭ lamancie i narakańniach na imperskuju Maskvu, a ŭ vybudoŭvańni alternatyvaŭ, vychadzie z zaležnaściaŭ. Dakul na 16‑m hodzie niezaležnaści Biełaruś atrymlivaje 90% enerhanośbitaŭ z adnych ruk, heta nijakaja nie baraćba za niezaležnaść.
Dakul połčyšča sakretnych ahientaŭ adsočvaje maładych niezaležnikaŭ‑Daškievičaŭ, a druhoje połčyšča raźviešvaje hazety «Pravda» ŭ kožnym ŽESie, heta zusim advarotnaje ad baraćby za niezaležnaść.
Pradali movu, pradali ściah, pradali «Biełtranshaz». "U ziamlanki pojdziem, a na šantaž nie paddamosia". I ŭ čym ža naša niepaddača? U čym naša niezaležnaść zastajecca? U najaŭnaści svajho ŭłasnaha prezydenta?
Niezaležnaść Litvy harantavanaja, bo prezydent Litvy nia volny joju rasparadžacca adnaasobna. Jość parlament, hramadzianskaja supolnaść maje prava hołasu, i svabodnyja ŚMI.
Niezaležnaść Biełarusi stanie harantavanaju tolki tady, kali samadziaržaŭja nia budzie.
Ciapier čytajuć
Na Šry-Łancy ŭ 37 hadoŭ pamior biełaruski kinapradziusar Andrej Matałyha3
Kamientary