Navukoŭcy «zamachnulisia» na zavajavańnie inšych hałaktyk

Amierykanskaje Upraŭleńnie pierśpiektyŭnych daśledčych prahram u halinie abarony (DARPA) vystupiła ź nievierahodnym prahnozam — u najbližejšyja sto hadoŭ čałaviectva moža arhanizavać pieršy etap mižhałaktyčnaha padarožža,

Varta zaŭvažyć, što DARPA niaredka nazyvajuć «departamientam navukoŭcaŭ-varjataŭ» pry Pientahonie. Raniej jany ŭžo ździŭlali navukovy śviet idejami vykarystańnia niaŭłoŭnaha antyrečyva ŭ jakaści zbroi abo padarožžaŭ u časie skroź hipatetyčnyja «čarviatočyny» ŭ kaśmičnaj prastory, jak u navukovaj fantastycy.

Voś i hetuju ideju DARPA niekatoryja navukoŭcy sustreli skieptyčna. I adna z hałoŭnych pryčyn sumnievaŭ — niemahčymaść seksu ŭ kosmasie.

Padarožža da najbližejšych zornych sistemaŭ navat na samych vysokich chutkaściach, jakija čałaviek zdolny stvaryć i vytrymać, zojmie mnohija sotni hadoŭ. Heta značyć, na kaśmičnym karabli pavinna pamierci i naradzicca niekalki pakaleńniaŭ ludziej,

«Zajmacca seksam i naradžać dziaciej va ŭmovach adsutnaści hravitacyi — heta ž sapraŭdnaje piekła», — kaža bijołah Afina Andreadzis z univiersiteta Masačusetsa. Da taho ž vaha dziciaci — heta adzin z najvažniejšych pakazčykaŭ jaho narmalnaha raźvićcia jak u maciarynskim ułońni, tak i paśla źjaŭleńnia na śviet. Mnohija navukoŭcy sumniajucca, što začaćcie naohuł mahčymaje pry adsutnaści ziamnoha pryciahnieńnia.

Va ŭsialakim vypadku dakładna viadoma adno: navat miesiacy znachodžańnia va ŭmovach, jak, naprykład, na Mižnarodnaj kaśmičnaj stancyi, nanosiać surjoznuju škodu čałaviečamu arhanizmu. Atrafujucca nie tolki ciahlicy — zhubnyja źmieny adbyvajucca ŭ škilecie. Viadoma, možna vykazać zdahadku, što za 100 hadoŭ čałaviectva vynajdzie «štučnuju hravitacyju», ale pakul heta technałohii vielmi i vielmi dalokaj budučyni.

Akramia taho, niebiaśpieku dla čałavieka ŭjaŭlaje mižzorkavaja radyjacyja — nastupstvy jaje praciahłaha ŭździejańnia na arhanizm pakul niemahčyma navat ujavić, nie toje što dakładna apisać.

Tolki paśla vyrašeńnia ŭsich hetych prablem varta było b zadacca pytańniem, jak, ułasna, čałavieku dabracca da inšych hałaktyk. Rakiety, zdolnyja «padkinuć» nas da Miesiaca, u dadzienym vypadku zusim nie padychodziać. Dla takoha padarožža «spatrebicca bolš paliva, čym jość u spaścihnutym nami suśviecie», zajaviŭ na kanfierencyi DARPA fizik Ryčard Abozi. Jon uznačalvaje prajekt «Ikar», jaki vyvučaje mahčymaść stvareńnia mižzorkavaha kaśmičnaha karabla z termajadziernym ruchavikom z metaj prajektavańnia niepiłatavanaj misii.

Kali ž kazać pra alternatyvu, to na dadzieny momant možna razhladać tolki fantastyčnyja ruchaviki na asnovie termajadziernaj reakcyi, jakuju čałaviectva nie tolki nie navučyłasia «ŭtajmoŭvać», ale i naohuł vyvučyła daloka nie kančatkova. Albo možna tearetyzavać na temu ruchavikoŭ na asnovie antymateryi, ale heta pakul zusim za ramkami surjoznych navukovych daśledavańniaŭ.

Samyja skieptyčnyja navukoŭcy kažuć, što čałaviectvu dla pačatku niadrenna było b choć by źlotać na Mars — najbližejšuju da Ziamli i pa šerahu paramietraŭ padobnuju da jaje płanietu.

Uśviadomić, na što mienavita «zamachnulisia» amierykanskija navukoŭcy, dapamoža nastupny fakt. Samy chutkasny abjekt z kaliści stvoranych čałaviekam — kaśmičny zond Voyager-1, jaki lacić za miežy Soniečnaj sistemy, znachodzicca ŭ darozie ŭžo 34 hady. Za hety čas jon pieraadoleŭ usiaho tolki 1% adlehłaści da Proksimy Centaŭra — najbližejšaj da Ziamli zorki paśla Sonca.

• 0
• 0
• 0
• 0
• 0
• 0
• 0
• 0