Zbroja niepahody

Nadvorje źmianiajecca. Ciopłaja zima, nijakaje leta… Padajecca, što na śviecie zastalisia tolki viasna i vosień, jakija biaskonca ciahnucca, sastupajučy adna adnoj.

Staraja ŭ aŭtobusie hołasna tłumačyła niejkaj ciotcy pra hlabalnaje paciapleńnie. Nia ludzi dy pramysłovaść vinavatyja ŭ tym, što zima ciopłaja, prosta niechta prydumaŭ novuju zbroju, jakoj i kiruje nadvorjem. Dobra abaznanaja ŭ sakretnych viedach, babcia nastojliva zapeŭnivała, što letaś novuju zbroju vykarystali la bierahoŭ Azii. Ale nie raźličyli — u vyniku žachlivaja chvala zmyła kala 300 tysiač čałaviek. Ziamla ž spyniła navat svoj ruch na kolki tysiačnych sekundy. Babcia ščyra vieryć, što pryroda sama źmianicca nia moža — usio jaje śviadomaje žyćcio nadvorje «pracavała» pa zaviadzioncy, biaz zbojaŭ i značnych chibaŭ. Usie pryzvyčailisia žyć dy karystacca vyhodami cyvilizacyi. Žyć jak najlepš… Navat krychu radujemsia toj źmienie nadvorja, bo stalisia bližejšymi da Eŭropy klimatyčna. Dyj za haz z naftaj mienš zapłacim, a nia jak za marazami…

Vinavatych my zaŭsiody šukajem u niečym nadzvyčajnym. Niečym najsakretnym, niečym dalokim ad nas i našaha ładu žyćcia.

Zrešty, što zaležyć ad nas? Ci mahu ja stacca vinavatym u tym, što paciapleła na ŭsioj planecie? Ci niešta źmienicca, kali ja pamyju mašynu la rečki, spalu na Kupalle kolki humovych kołaŭ ci vykinu celafanavy pakiet u lesie? U źmienie klimatu my vinavacim uralskija zavody, brazylskija lesasieki j žydamasonaŭ. Zvalvajem na niešta niedasiažnaje. Navat tatalnaja melijaracyja paleskich bałotaŭ nie padajecca hetkaj užo strašnaj — daŭno ž było. Čamu, narešcie, źmieny pryrody musiać chvalavać mianie. Chaj pierajmajucca «zialonyja», dziaržava, AAN. Ludzi za toj nahlad atrymlivajuć hrošy. Heta ichnaja praca. Chaj lamantujuć, kab vyratavać planetu.

Dziaržaŭnyja ž ekolahi zapluščvajuć vočy na pracu pradpryjemstvaŭ, pišučy patrebnyja dla ich statystyki, ale nie sapraŭdnyja ličby škodnych vykidaŭ. Pradpryjemstvy ž musiać vyrablać pradukcyju, kab naša dziaržava mieła patrebnyja ličby ŭ suśvietnych rejtynhach.

A pakul toje, zamiest kaladnych marazoŭ lje zaleva i złosna pranosicca pa Eŭropie ŭrahan.

Sapraŭdnaja zbroja, jakoj kirujuć nadvorjem, usio ž isnuje. My ŭsie vykanaŭčyja adzinki toj žachlivaj zbroi.

P.S. Ličycca, što 2007 hod budzie samym ciopłym (siaredniaja temperatura +14,56°S) za ŭsiu historyju nazirańnia za nadvorjem. Dasiul samym śpiakotnym na planecie ličyŭsia 1998 hod (+14,52°S). Normaj u 1960 — 1990 h. była +14°S. Krychu bolej za pałovu hradusa, drobiaź.

Fota z sajtu Vriemiena hoda

• 0
• 0
• 0
• 0
• 0
• 0
• 0
• 0