Praces KiK: advakat zajaviŭ pra ludziej, jakija «dapamahali asobie z sumkaj ruchacca»

11.04

Adnaviŭsia praces Kanavałava-Kavalova.

Vystupaje paciarpieły Tyškievič.

Kaža, što vyžyŭ vypadkova, bo znachodziŭsia nasuprać epicentra vybuchu.

Jon źviarnuŭ uvahu na toje, što, pa zaklučeńni ekśpiertaŭ FSB, pry takoj mocy vybuchu pavinny być baratraŭmy ŭ radyjusie 35 mietraŭ. Ale na abvinavačanym nie było navat śladoŭ vybuchovych rečaŭ, chacia moh i baratraŭmu atrymać.

Bomba — 12,5 kh (skazana ŭ zaklučeńni). Ale chłapiec, jaki siadzieŭ na łavie nad vybuchoŭkaj, zastaŭsia žyvym. Što heta za vybuchoŭka takaja?

Čamu nie byli daśledavanyja ŭsie videa ź mietro?

Tyškievič padavaŭ chadajnictva vyklikać u sud mašynista. Ale jano tak i nie było zabiaśpiečana. Tyškievič maje navyki prajekciroŭščyka. Čamu nie była zabiaśpiečana biaśpieka paśla vybuchu? Chto daŭ kamandu mašynistu jechać praz stancyju paśla vybuchu?

Tyškievič nie razumieje, jakim čynam adbyŭsia vychad na kvateru, u jakoj byli Kanavałava i Kavaloŭ. «Pačyckaja, asnoŭny śviedka, śćviardžaje, što 12 krasavika nichto kvateru nie pakidaŭ. Jak vyjšli na kvateru?» — Tyškievič skazaŭ, što nie maje peŭnaści ŭ tym, što na łavie padsudnych — tyja ludzi, chto ździejśniŭ vybuch. Takaja ŭpeŭnienaść źnikła ŭ jaho paśla vyvučeńnia materyjałaŭ suda.

Paśla vystupleńnia Tyškieviča była sproba apładysmientaŭ. Sudździa vydaliŭ dziaŭčynu z zały.

11.11

Vystupaje advakat Kanavałava Lepretar.

U 2000 hodzie z kastryčnika pa śniežań, pa viersii prakurora, Kanavałaŭ z Kavalovym ździejśniŭ vybuch u padjeździe. Kavaloŭ na miescy pakazvaŭ, što vybuch adbyŭsia ŭ druhim padjeździe, a nie ŭ pieršym, jak pa viersii śledstva. Taksama Lepretar adznačyŭ, što Kanavałaŭ na dopycie kazaŭ pra ździajśnieńnie vybuchu letam, a nie ŭ pieryjad z kastryčnika pa śniežań. Advakat taksama kaža, što heta tolki viersii śledstva, što Kanavałavym było vykarystana samarobnaje vybuchovaje prystasavańnie. Bo jaho ślady zafiksavany nie byli tady. Tamu ličyć niedakazanym ździajśnieńnia supraćpravavoha dziejańnia.

Z sakavika pa listapad 2001 hoda Kanavałaŭ z Kavalovym i Rumiancavym, pa viersii prakurora, ździejśniŭ vybuch u padjeździe (u abvinavačvańni nie paznačany numar padjezda — adznačaje advakat) doma. Vykarystana samarobnaje vybuchovaje prystasavańnie. Advakat źviarnuŭ uvahu na toje, što dapytanyja pa hetym epizodzie śviedki nazyvali inšyja hady — 2002, 2003,2004, 2005. Rumiancaŭ na sudzie nie zmoh skazać, ci znachodziŭsia jon u toj čas u padjeździe, ci stajaŭ na vulicy. Nie moh na miescy i dom dakładna pakazać. Pa słovach advakata, nie pravodziłasia ekśpiertyza pa vyjaŭleńni vykarystańnia samarobnaha vybuchovaha prystasavańnia. Tamu hetamu niama paćviardžeńnia. U 2000–2006 hodzie ŭ hetym domie nie pravodzilisia ramontnyja pracy. Tamu dla advakata nie zrazumieła, jaki ŭron byŭ naniesieny.

Pa viersii prakurora, u adzin ź dzion leta 2002 hoda Kanavałaŭ, Kavaloŭ, Rumiancaŭ ździejśnili vybuch na fasadzie Viciebskaj abłasnoj biblijateki. Advakat źviartaje ŭvahu, što, pa pakazańniach śviedkaŭ, roznyja miescy byli paškodžany. Advakat adznačaje, što padletkam nie chaciełasia supraćpastavić siabie hramadstvu, a tolki pahladzieć, ci vybuchnie.

U žniŭni 2003 hoda Kanavałaŭ, pa viersii prakurora, ździejśniŭ vybuch u Viciebsku, u vyniku čaho paciarpieŭ padletak. Zhodna z abvinavačvańniem, było vykarystana samarobnaje vybuchovaje prystasavańnie. Ale jaho vykarystoŭvańnie nie dakazana, pa słovach Lepretara, materyjałami suda. Advakat źviartaje ŭvahu na toje, što śviedki na sudzie pakazali, što bačyli Kanavałava z hrupaj moładzi paśla vybuchu niepadaloku ad taho miesca. Ale nie na tym miescy. Sudom nie vyznačana, ci byŭ tam Kanavałaŭ i z kim byŭ.

10.06.2004 hoda Kanavałaŭ, pa viersii śledstva, ździejśniŭ sprobu padpału hazietnaha šapika ŭ Viciebsku z vykarystańniem samarobnaha vybuchovaha prystasavańnia. Nie ŭstanoŭlena datyčnaść Kanavałava da hetaha epizoda, nie było vyznačana, ci vyrablaŭ tady Kanavałaŭ samarobnaje vybuchovaje prystasavańnie. Ekśpiertyzy niama. Taksama jon źviarnuŭ uvahu na toje, što žančyna, jakaja pracavała ŭ hetym šapiku, znajšła vybuchoŭku ranicaj, kali pryjšła na pracu. Ale inšyja śviedki kazali pra inšaje: znajšoŭ vybuchoŭku ŭnačy mužčyna, jon vyklikaŭ milicyju. I ŭ sudzie nie byli likvidavany supiarečnaści. I niezrazumieła kamu vieryć. Ale ŭ 2004 hodzie pa hetym epizodzie nie była zaviedziena kryminalnaj spravy.

17.06.2004, pa viersii prakurora, Kanavałaŭ padpaliŭ inšy šapik pry vykarystańni samarobnaha zapalvajučaha prystasavańnia. Ale dapytany milicyjant, jaki tady vyjazdžaŭ na miesca pažaru, skazaŭ, što nijakich rečaŭ, što mahli b być častkami samarobnaha zapalvajučaha prystasavańnia, nie znojdzieny. Ale ŭžo ŭ paźniejšych pakazańniach takija rečy byli vyjaŭleny.

U 2004 hodzie, pa viersii prakurora, Kanavałaŭ ździejśniŭ vybuch pry dapamozie «raściažki» kala čyhunačnaj stancyi «Hryšany». Ale niama ŭ materyjałach spravy zaklučeńnia ekśpiertaŭ pra vykarystańnie vybuchovaha prystasavańnia. Prakuror u abvinavačvańni paznačyŭ, što ŭ vybuchoŭcy była vykarystanaja płastykavaja butelka. Ale nijakaj butelki nie było znojdziena pry ahlazie miesca vybuchu ŭ 2004 hodzie. I paciarpieły, jaki sabraŭ usie rečy na miescy vybuchu (batarejku, kołyški i inš.), nie znajšoŭ butelki taksama. Ale śviedka, jaki nibyta bačyŭ miesca vybuchu, pakazaŭ, što bačyŭ batarejku, rahatku i płastykavuju butelku. Jakuju batarejku moh bačyć śviedka, kali paciarpieły ŭsie zabraŭ z saboj? — zadajecca pytańniem advakat.

U kastryčniku 2004 hoda, pa viersii prakurora, Kanavałaŭ ździejśniŭ jašče adzin vybuch kala stancyi «Hryšany». Advakat źviartaje ŭvahu na supiarečnaści ŭ pakazańniach śviedkaŭ.

Adzinym dokazam datyčnaści Kanavałava, pa słovach Lepretara, źjaŭlajucca pakazańni Kavalova, ad jakich toj u vyniku admoviŭsia.

Kanavałaŭ abvinavačvajecca ŭ padpale aŭtamabila «Raf» (1984 hoda vypusku) u sakaviku 2005 hoda. Ekśpiert pryjšoŭ da vysnovy, što najbolš vierahodnaja pryčyna pažaru — ad zapałki albo padobnaj krynicy pa mocy. A pa viersii prakurora, była vykarystana butelka z zapalvajučajsia sumiaśsiu. Chacia nijakaja butelka nie była znojdziena pry dahladzie paśla pažaru. Sa słoŭ uładalnicy aŭtamabila, jana bačyła za dzień da pažaru ŭ aŭto padletkaŭ, jakim zrabiła zaŭvahu. A na nastupny dzień ubačyła spaleny «RAF». Advakat ličyć, što niama materyjałaŭ, jakija dakazvali b datyčnaść da hetaha epizoda Kanavałava.

Pa viersii prakurora, Kanavałaŭ 14.09.2005 hoda ździejśniŭ vybuch na prypynku hramadskaha transpartu ŭ Viciebsku i 22.09.2005 ździejśniŭ paŭtorny vybuch u Viciebsku. Kanavałaŭ daŭ pakazańni pra svaju datyčnaść da hetych epizodaŭ 13.04.2011 (pieršy dopyt paśla zatrymańnia). Advakat ličyć, što hetyja pakazańni byli atrymany z parušeńniem zakanadaŭstva. A tamu jany nie mohuć być pryniatyja pad uvahu. Z dalejšych pakazańniaŭ Kanavałava vynikaje, što jon vykarystoŭvaŭ adno rečyva (trypierakisu acetonu) pry vybuchu, a ekśpierty ŭstanavili inšaje vybuchovaje rečyva (Kavaloŭ na dopytach kazaŭ pra dzipierakis acetonu, jak rečyva, jakoje nibyta vykarystoŭvaŭ Kanavałaŭ). Trypierakisu acetonu nie vyjaŭlena na vybuchocy. Ale na miescy vybuchu 22.09.2005 była znojdziena batarejka, što śviedčyć pra ździajśnieńnie vybuchu pa srodkach elektroniki, a nie vatnaha ficila, jak ličyć prakuror. Advakat ličyć niedakazanym vinu Kanavałava pa hetych epizodach. I prosić apraŭdać.

12.44

Epizod lipienia 2008 hoda.

Advakat začytvaje vyvady ekśpiertaŭ. Vybuchoŭka, vyjaŭlenaja kala steły na 3 Lipienia, źjaŭlajecca adnatypnaj toj, što vybuchnuła. Pavodle ekśpiertaŭ, samarobnaje vybuchovaje prystasavańnie mahło być vyrablena roznymi ludźmi. Ale nie vyklučajecca, što i adnym. Kanavałaŭ vybraŭ adzin pamier hajek, kali jamu na śledčym ekśpierymiencie pranavali vybrać detali, jakija byli ŭ vybuchoŭcy. Ale advakat zaŭvažaje, što ŭ vybuchoŭcy byli vyjaŭleny hajki roznych pamieraŭ.

Ekśpierty pakazali, što ŭ vybuchoŭkach byŭ vykarystany tracił. Kanavałaŭ ža na dopytach śviedčyŭ, što na toj čas u jaho ŭžo nie było traciłu.

Na vybuchoŭcy byli znojdzieny dziesiać adbitkaŭ palcaŭ. Čatyry naležać Kanavałavu, Zajcavu (hrupa raźminiravańnia). Ale nie ŭsie adbitki palcaŭ identyfikavany.

Epizod 2011 hoda.

Pavodle prakurora, asnoŭnaja dokaznaja baza — videa ź mietro. Ale advakat źviartaje ŭvahu, što niama infarmacyi, jak adbyvałasia vyjmańnie videa.

Videa — narezanaje z roznych kamier frahmienty. Pra heta havaryŭ i prakuror. Ale pakiet, u jakim znachodziŭsia dysk ź videa, nie byŭ apiačatany.

Lepretar źviartajecca da suda z pytańniem, što budzie pryniataje ŭ jakaść dokazaŭ — frahmienty videa ci cełaje videa. I adznačaje, što narezanaje videje nie moža być dokazam. Advakat kaža, što ŭ sudzie byli prahledzienyja kopii kopij (videa kapijavali na siervier, mantažavali, a paśla na dysk).

Advakat kaža pra śledčy ekśpierymient, kali Kanavałava vadzili pa stancyjach mietro i havaryli, dzie jamu stać. Pa materyjałach spravy, ekśpierty spasyłajucca na ekśpierymient ad 25.05.2011, ale ŭ hety dzień pravodzilisia inšyja dziejańni, a nie śledčy ekśpierymient.

Lepretar taksama źviartaje ŭvahu, što na Kanavałavu nie było vyjaŭlena śladoŭ vybuchu. Chacia na videa navat było zaŭvažna z tunela pamiž Kastryčnickaj i Kupałaŭskaj šmat pyłu. Pra vopratku Kanavałava, jakuju dahladali ŭ sudzie, taksama nielha skazać, što jana brudnaja.

Advakat źviartaje ŭvahu na supiarečnaści ŭ pakazańni Kanavałava i Kavalova nakont vybuchoŭki ŭ sumcy. Časta jany razychodziacca. Kali Kavaloŭ kazaŭ, što bačyŭ draty, jakija išli da kožnaj butelki. Kanavałaŭ ža zajaŭlaŭ, što vykarystoŭvaŭ adzin detanatar (to bok drot išoŭ u adnu butelku). Pry hetym, u šerahu vypadkaŭ, Kavaloŭ raskazvaŭ pra momanty, pra jakija nie kazaŭ na dopytach Kanavałaŭ.

Lepretar źviartaje ŭvahu, što ŭ śviecie akty teraryzmu adbyvajucca z peŭnaj metaj. Kanavałava ŭ presie paraŭnoŭvajuć z Brejvikam. I kaža, što ŭ narviežca była meta — voś adroźnieńnie. Advakat źviartaje ŭvahu na toje, što vyraznych matyvaŭ ad Kanavałava nie prahučała — tolki «dla destabilizacyi abstanoŭki», jak u Kryminalnym kodeksie.

«Nie vyklučany varyjant, što nikoli i nie stanie viadoma» — pra matyvacyju Kanavałava.

13.12.

Vystupaje advakat Kavalova Abraziej.

Advakat ličyć, što śledčy (Varonin), jaki na papiarednim śledstvie pahražaŭ Kavalovu ŭ vyniku źmieny im pakazańniaŭ pahavaryć z prakuroram, — pahavaryŭ. Takuju vysnovu Abraziej robić z zapatrabavanaj prakuroram miery pakarańnia.

Advakat ličyć, što dakazanyja tolki fakty vybuchaŭ.

Pakolki videa — asnoŭny dokaz na sudzie, to mienavita vyvučeńniu jaho treba było vydatkavać bolš času. Ź videa, jakoje hladzieli ŭ sudzie, u 17.39 (11.04.2011) — asoba z sumkaj uvachodzić na «Frunzienskuju». U 17.40 — asoba ŭvachodzić u ciahnik (pa kamientaryjach prakurora). Ale kamiera staić tak, što nie zachoplivaje pieršyja vahony. I tamu nielha skazać, što asoba zajšła ŭ pieršy vahon.

Advakat kaža, što ŭbačyŭ niekalki asob, jakija dapamahali asobie z sumkaj ruchacca.

17.45–17.50 — U pryvatnaści, advakat źviarnuŭ uvahu na toje, što čałaviek z torbaj staić u pierachodzie, byccam kahości čakaje, potym pačynaje iści za mužčynam, jaki niekalki razoŭ na jaho azirajecca. Advakat źviarnuŭ uvahu na čałavieka «z zatušavanym tvaram», jaki, pabačyŭšy mužčynu z sumkaj, jak miarkujecca, Kanavałava, raźviartajecca pierad im na 180 hradusaŭ i niby «viadzie» jaho.

17.46 — u centry, nasustreč čałavieku z sumkaj, idzie małady čałaviek u biełaj bajcy. Nastupny — čałaviek z daŭhimi vałasami. A za im — mužčyna, jaki, kali ŭbačyŭ čałavieka z sumkaj, razvaročvajecca pierad im, i čałaviek z sumkaj idzie za hetym mužčynkam. Advakat kaža, što ŭ mužčyny zatušavany tvar.

17.54.36 — źleva ŭnizie staić brunietka ŭ ciomnaj vopratcy, da jaje padychodzić błandzinka. I na inšym videa ŭ 17.58 vychodziać na Kupałaŭskaj. Jany padymalisia ŭ pierachod z Kastryčnickaj na Kupałaŭskaj razam z čałaviekam, jaki prynios sumku ŭ mietro. I vyjšli razam ź im ź mietro.

Na inšym videa, sivy mužčyna idzie za padazravanym. Mužčyna adnačasova z padazravanym idzie na Kupałaŭskuju.

17.54.56 — u centry idzie dziaŭčyna ŭ čyrvonaj kurtcy. Pobač ź joj — dziaŭčyna ŭ ciomnym. Jany iduć razam na Kupałaŭskuju adnačasova z padazravanym.

Advakat Abraziej źviartaje ŭvahu, što razam z padazravanym na peŭnych adrezkach pobač išli roznyja ludzi.

Abraziej zaŭvažaje, što kala pierachodu z Kastryčnickaj na Kupałaŭskuju stajali niekalki mužčyn pobač z padazravanym. Pry pieršaj uspyšcy ad vybuchu tyja ludzi, jak i padazravany, adsutničajuć na stop-kadry ź videa.

Abraziej kaža, što na adnym z frahmientaŭ u čałavieka adsutničajuć nohi. Što śviedčyć pra mantaž. Čałaviek idzie, ale jaho noh nie vidać.

U inšym miescy videa, pa słovach Abrazieja, źjaŭlajecca mantažnaja plama.

U 17.55.21 u pravaj častcy kadra raźmiaščajecca žančyna. Mienavita ŭ hety čas adbyvajecca «zalipańnie» kadra. I dalej videa pačynajecca z 17.55.23 (a nie 22 siekundy). I žančyna ŭžo idzie pa tuneli. Adsutničaje adna siekunda. Heta taksama śviedčyć pra mantaž, pa słovach advakata.

Na inšym frahmiencie videa asoba čałavieka ŭ čornym «zacirajecca» na kadry. Advakat razhledzieŭ mazki «zacirańnia». To bok čałavieka «prybrali» ź videa techničnymi srodkami.

U 17.43 čałaviek z sumkaj vychodzić ź ciahnika na «Kupałaŭskaj». Na sumcy (prakuror kazaŭ pra biełuju emblemu) adsutničaje malunak. Na inšym frahmiencie, kali čałaviek pierakładaje sumku z adnoj ruki ŭ inšuju i pavaročvaje sumku inšym bokam, tam taksama niama nijakaha biełaha malunka ci nadpisu.

Abraziej kaža, što kurtka na Kanavałavym pry śledčym ekśpierymiencie źvisaje ź jaho, adčuvańnie, što jon apranuju čužuju, vialikuju pa pamierach kurtku. A na videa ź mietro kurtka na čałavieka ledź nalezła, to bok jana maleńkaja dla jaho.

Advakat zajaviŭ pra nakładańnie vobraza čałavieka z sumkaj ź videa ź mietro na fota, zroblenyja padčas śledčaha ekśpierymienta ŭ mietro.

13.44

Abraziej źviartajecca da pratakołaŭ vyjmańnia videa ź mietro. U ich nie ŭkazana, u kaho, pa jakim adrasie adbyłosia vyjmańnie, ź jakoj kolkaści fajłaŭ składałasia videa.

Pierapynak da 14.45

14.50

Abraziej jašče raz padkreślivaje, što ŭ pratakole niama daty videa. Jon adznačaje, što hetyja videa nie mohuć być dokazam, bo atrymanyja pry parušeńni KPK. Taksama nie była vyniata pieršakrynica ź videa ź mietro, što patrabuje zakanadaŭstva. Na ekśpiertyzu ŭ FSB byli pradstaŭleny dva dyski, na jakija było skapijavana videa, a nie pieršakrynicy.

28.05.2011 tolki ŭpieršyniu byli prahledžany hetyja videa na śledstvie. A tolki 29.06.2011 videa było pryznana ŭlikaj. A Kavaloŭ śviedčyŭ, što hetyja videa jamu pakazvalisia našmat raniej.

Śledčy nie prysutničaŭ pry kapijavańni videa ź vinčestara mietrapalitena na kampjutar, kaža Abraziej. Bo jość razychodžańnie ŭ časie stvareńnia videa (pierapisvańnia ź vinčestara mietrapalitena) i pratakoła apisańnia videa.

Ekśpiertyza FSB nie ŭstanaviła padabienstva tvaraŭ Kanavałava i čałavieka ź mietro.

Na štanach Kanavałava majecca śvietłaja emblema, heta bačyli pry nadhladzie ŭ sudzie, a na videa biełaj emblemy ŭ čałavieka z sumkaj na štanach niama.

Abraziej zaŭvažaje, što na čornaj voprtacy dobra zaŭvažny ślady brudu, kali jany jość. I kali Kanavałaŭ sapraŭdy byŭ u mietro padčas vybuchu, to jon pavinien być brudnym. Tamu advakat robić vysnovu, što Kanavałava padčas vybuchu ŭ mietro nie było. A na videa ź mietro znachodzicca inšy čałaviek.

Ekśpiertyza nie vyjaviła śladoŭ vybuchovaha rečyva ŭ zmyvach z tvara i nosa Kanavałava, ni ŭ jaho vałasach.

Na videa z 17.50 ad 17.54 nie vidać, dzie znachodzicca čałaviek i jaho sumka. Tamu pa słovach advakata, nie vidać, dzie čałaviek pastaviŭ sumku. Nie dakazana taksama, što ŭzarvałasia mienavita sumka. Taksama nie znajšli pult, pry dapamozie jakoha, pa viersii prakurora, byŭ ździejśnieny vybuch.

Na papiarednim śledstvie Kanavałaŭ sabraŭ nie tuju vybuchoŭku, jakaja ŭzarvałasia ŭ minskim mietro.

«Destabilizacyja abstanoŭki» — termin, jaki ŭpieršyniu fihuruje ŭ pastanovie na aryšt. I Abraziej ličyć, što hetuju frazu Kanavałaŭ uziaŭ z hetaha dakumienta, bo paśla nie moh patłumačyć, što heta značyć.

Pačyckaja na dopycie kazała, što Kanavałaŭ viarnuŭsia 11.04.2011, a 18.00. A heta praź niekalki chvlin paśla vybuchu.

Śledčy, jaki braŭ adbitki palcaŭ u Kanavałava, na dopycie zajaviŭ, što Kanavałaŭ padčas daktyłaskapii pavodziŭ siabie spakojna.

Advakat kaža pra supiarečnaści ŭ pakazańniach śviedkaŭ nakont kolery sumki. To šeraja, to siniaja, to čornaja.

Abraziej kaža, što tolki adzin śviedka skazaŭ, što bačyŭ u Kanavałava chimičnuju łabaratoryju. Ale heta čałaviek, jaki ciapier znachodzicca ŭ turmie i jaho pryvozili na pratest pad kanvojem. Abraziej adznačaje, što dla łabaratoryi patreba była być vyciažka, vada ŭ padvale. Ale hetaha nie było.

Advakat ździŭleny, čamu vymańnie videa adbyvałasia tolki na troch stancyjach mietro. Pa jaho słovach, śledstva nibyta ŭžo zahadzia viedała, na jakim videa budzie padazravany.

Abraziej kaža, što pieršy dopyt Kanavałava prachodziŭ z parušeńniami. A dalej jon davaŭ śviedčańni, hruntujučysia na svaich pieršych pakazańniach. A tamu, pa słovach advakata, usie pakazańni Kanavałava nie mohuć ličycca dokazami, zhodna z zakanadaŭstvam.

Epizod 2008 hoda ŭ Minsku

Horad Viciebsk nie ŭvachodzić u rehijon vyrabu vybuchoŭki ŭ 2008 hodzie, pa zaklučeńni ekśpiertaŭ. Taksama ekśpierty pakazali, što abiedźvie vybuchoŭki (jakaja ŭzarvałasia i jakaja nie) byli pa-roznamu zrobleny. Ekśpiert u sudzie skazaŭ, što ličyć, što vybuchoŭki byli vyrableny hrupaj asobaŭ, jakim patrabujucca śpiecyjalnyja viedy. A kali čałaviek nie mieŭ patrebnych viedaŭ pry lićci tołu, to ekśpiert paličyŭ taki varyjant jak naŭmysny, kab zabłytać. Admysłovyja viedy možna było b atrymać u vojsku. Ale na toj čas Kanavałaŭ jašče nie słužyŭ u armii. Ekśpiert Klimovič pryniaŭ rašeńnie ŭ 2008 hodzie abiasškodzić vybuchoŭku na miescy. Bo navat pieranosić jaje było niebiaśpiečna.

U vybuchoŭcy 2008 hody ekśpiertami FSB byŭ vyjaŭleny bijałahičny materyjał pry pasłojnym nasłajeńni klejkaj lenty (to bok trapiŭ tudy tolki pry zbory vybuchoŭki? — pytajecca jon). Heta adbitak palca ekśpierta Klimoviča.

15.45

Advakat Abraziej kaža, što ŭ vypadku, kali padajecca chadajnictva, usim bakam, zhodna z zakanadaŭstvam, dajuć vykazacca. Ale ŭ niekatorych chadajnictvach sud u adnabakovym paradku prymaŭ admoŭnaje rašeńnie.

Pieršyja razmovy z Kavalovym paśla zatrymańnia adbyvalisia biez advakata, biez afarmleńnia dakumientaŭ.

Abraziej kaža, što nie była daśledavana sim-karta rasijskaha apieratara «Miehafon», znojdzienaja na kvatery, jakuju zdymaŭ Kanavałaŭ u Minsku ŭ krasaviku 2011-ha.

U 2008 hodzie na niespracavanaj vybuchoŭcy znajšli abvitki palcaŭ Kanavałava, Krukoŭskaha («Ałmaz»), Zajcava (inžynier-piratechnik). Apošnija dva brali ŭdzieł pry raźminiravańni.

Pa epizodach 2000-ch hadoŭ Abraziej prosić Kavalova apraŭdać, pa niedakazanaści prynaležnaści da vybuchu ŭ biblijatecy taksama apraŭdać, pa 2011 hodzie taksama apraŭdać. Pa inšych abvinavačvańniach — niedaniasieńnie — jon taksama nie bačyć dokazaŭ.

I Abraziej ličyć, što Kanavałaŭ nie byŭ u mietro padčas vybuchu.

16.02

Słova dla tłumačeńniaŭ uziaŭ prakuror Stuk.

Na Kanavałavu niama śladoŭ vybuchovych rečavaŭ. Stuk kaža, što jany i nie mahli być vyjaŭleny. Kaža, što takija rečyvy nie mohuć raspaŭsiudžavacca praź ścianu, za jakoj znachodziŭsia Kanavałaŭ na videa.

16.10

Słova ŭziaŭ advakat Kanavałava Lepretar.

Kaža, što Kanavałaŭ kantaktavaŭ z vybuchovym rečavam 11 krasavika 2011 hoda nie tolki ŭ čas vybuchu, ale i źbiraŭ jaho (to bok u lubym vypadku ślady vybuchovaha rečyva pavinny byli b być).

16.15

Kanavałaŭ admoviŭsia ad apošniaha słova. «Nie treba», — pramoviŭ jon.

16.15

Apošniaje słova Kavalova.

Źviartaje ŭvahi na supiarečnaści ŭ materyjałach spravy pa vybuchu ŭ padjeździe ŭ Viciebsku ŭ pačatku 2000-ch hadoŭ. Pryznaje fakt ustanoŭki pietardy na aknie, a nie vybuchoŭki.

Na škle biblijateki taksama była ŭstanoŭlena pietarda. Kaža, što nie supadaje čas, pra jaki kazaŭ jon i jaki ŭkazvali śviedki.

Kaža, što ŭ jaho nie było žadańnia supraćpastavić siabie hramadstvu, pra što havaryŭ prakuror. A tolki było cikava jak padletku.

U niedaniasieńni ŭ vybuchach siabie nie ličyć vinavatym. Kaža, što daviedaŭsia ŭsie pałrabiaznaści ad supracoŭnikaŭ pravaachoŭnych orhanach. Pakazańni suprać Kanavałava davaŭ pad psichałahičnym ciskam.

Kavaloŭ kaža pra supiarečnaści ŭ pakazańniach Kanavałava i inšych materyjałach śledstva. Faktyčna, jon paŭtaraje skazanaje advakatami.

«Da vybuchu 11 krasavika 2011 hoda nijakaha dačynieńnia nie maju», — zajaviŭ Kavaloŭ.

Viersija pra čałavieka, jaki ŭ adzin dzień źbiraje vybuchoŭku — niepraŭdapadobnaja. A kali čałaviek pačynaŭ z drobnych hadstvaŭ, to ŭsio stanovicca na svaje miescy. Tak dla siabie Kavaloŭ patłumačyŭ toje, što Kanavałava abvinavačvajuć i ŭ vybuchach u 2000-ch hadach.

Ličyć, što Kanavałaŭ nie maje dačynieńnia da vybuchu ŭ minskim mietro.

«Mnie soramna pierad saboj i Dzimam, što akazaŭsia słabavolnym i daŭ pakazańni suprać jaho», — skazaŭ Kavaloŭ. Kali ja znachodžusia ŭ hetaj kletcy, heta jašče nie značyć, što ja vinavaty»,

Abviaščeńnie prysudu adbudziecca 30.11.2011.

• 0
• 0
• 0
• 0
• 0
• 0