Vystava kalihrafii Hienadzia Macura adkryvajecca siońnia ŭ Minsku

29 listapada ŭ 17.00 u małoj zale Muzieja sučasnaha vyjaŭlenčaha mastactva (Minsk, pr. Niezaležnaści, 47, st. mietro «Płošča Jakuba Kołasa) adbudziecca adkryćcio vystavy viadomaha biełaruskaha kalihrafa Hienadzia Macura «Rukatvory».

Što takoje kalihrafija — ramiastvo, mastactva, fiłasofija, duch?..

Čym roźnicca pryhožaja linija ad prosta linii, pryhožaja litara ad prosta litary?.. Čamu adzin namalavany tekst zachaplaje, a inšy pakidaje abyjakavym?..

Kab zrazumieć, treba pasprabavać choć niešta stvaryć na čystym arkušy papiery. Heta adzin z samych prostych i składanych testaŭ u śviecie.

Kalihrafija nie tryvaje padmanu, tut usio navidavoku. Bačny nastroj, dumki, pamknieńni, pamyłki. Niemahčyma ničoha schavać, jak niemahčyma schavacca ad siabie. Kalihrafičny tvor nielha stvaryć, kali niama ŭnutranaj svabody. Tolki poŭnaje suładździe z samim saboj daje čystuju liniju i zavieršany vobraz.

Usie «Rukatvory» iduć «ad ruki», choć i z dapamohaj roznych pryładaŭ, ad tradycyjnych piara, pendzala i papiery da kampjutarnaj hrafiki. Ale ŭ kožnaj pracy rukatvornaja asnova.

Vystava dzielicca na try častki. Pieršaja — rosčarki, malunki-linii, jakija ŭjaŭlajuć asacyjacyi i vobrazy.

Druhaja — kankretnyja litary ci ałfavity, u asnovu jakich pakładzieny biełaruski skorapis — piśmo, jakoje było raspaŭsiudžana na biełaruskich ziemlach u XVI stahodździ i źjaŭlałasia arhaničnym raźvićciom kirylicy.

Treciaja — słovy i teksty, tvory z radkami Śviatoha Pisańnia, cytatami znakamitych ludziej, asobnyja nazvy i paniaćci.

Kali niešta z tvoraŭ spynić, zasiarodzić ci ŭschvaluje hledača, i jamu zachočacca pasprabavać siabie ŭ pryhožym piśmie — zadača vystavy budzie vykanana. I my dałučymsia da adnaho z samych pryhožych, staražytnych i viečnych vidaŭ mastactva — kalihrafii.

Pasprabujcie — i ŭbačycie, što ŭ vas atrymajecca.

Vystava praciahniecca pa 10 śniežnia 2011 hoda.

***

Hienadź Macur — dyzajnier knihi, kalihraf. Naradziŭsia ŭ 1960 hodzie ŭ horadzie Čašniki. Skončyŭ Minskaje mastackaje vučylišča im. A. K. Hlebava (1979), Biełaruski dziaržaŭny teatralna-mastacki instytut (1984).

Łaŭreat biełaruskich i mižnarodnych konkursaŭ mastactva knihi.

U mastackich vystavach udzielničaje z 1980 hoda. Adzin z arhanizataraŭ tvorčaj supołki i vystavačnaha prajektu «Lit-Art». Udzielnik prajektu «Mieždunarodnaja vystavka kallihrafii» u Sankt-Pieciarburzie, Maskvie, Noŭharadzie Vialikim. Zaprošany siabra Rasijskaha Nacyjanalnaha Sajuza Kalihrafaŭ.

• 0
• 0
• 0
• 0
• 0
• 0
• 0
• 0