Daŭhavy kryzis i Iran — na paradku dnia samita ZŠA—ES

28 listapada kiraŭnictva Jeŭrasajuza sustreniecca ŭ Vašynhtonie z prezidentam ZŠA Barakam Abamam i dziaržsakratarom Chiłary Klintan. Hałoŭnyja pytańni pieramovaŭ — daŭhavy kryzis u Jeŭropie i sankcyi adnosna Iranu, jaki abvinavačvajecca ŭ imknieńni stvaryć jadziernuju zbroju.

Sustreča prezidenta Jeŭrakamisii Žaze Manueła Barozu i staršyni Jeŭrapiejskaj Rady Hiermana van Rompieja z prezidentam ZŠA adbyvajecca ŭ čas, kali Vašynhton usio bolš žorstka krytykuje Brusel za miery pa baraćbie z daŭhavym kryzisam. Ad samita ŭ Vašynhtonie nie čakajuć praryŭnych rašeńniaŭ, bo ŭ jeŭrapiejskaj delehacyi niama lidaraŭ jeŭrapiejskich dziaržavaŭ, jakija niasuć na sabie asnoŭny ciažar pryniaćcia składanych rašeńniaŭ. Tym nie mienš, čakajecca, što Abama zrobić cisk na Rompieja i Barozu, kab ES prymaŭ bolš žorstkija i adkaznyja rašeńni.

Ciapier ES sprabuje ŭratavać ekanomiku Hrecyi, bajučysia, kab finansavyja ciažkaści nie raspaŭsiudzilisia na takija krainy, jak Italija, Ispanija i navat Francyja.

ES šukaje dadatkovaje finansavańnie dla stvoranaha Jeŭrapiejskaha fondu stabilnaści. Hety fond užo maje 440 młrd jeŭra, ale hetych srodkaŭ moža nie chapić dla ŭratavańnia takich krainaŭ, jak Italija i Ispanija. Mižnarodny valutny fond (MVF), u jakim Złučanyja Štaty vałodajuć najbolšaj dolaj hałasoŭ, nie choča bolš układać hrošy ŭ Jeŭrapiejski fond stabilnaści.

U toj čas jak ekanamičnyja pytańni źjaŭlajucca krynicaj sprečak pamiž Vašynhtonam i Bruselem, baki zajmajuć blizkija pazicyi adnosna Iranu. Dziaržaŭny sakratar ZŠA Chiłary Klintan sustreniecca zaŭtra z kiraŭnicaj zamiežnaj palityki ES Ketryn Eštan, kab abmierkavać, što pavinien zrabić Zachad, kab sarvać płany Tehieranu stvaryć jadziernuju zbroju.

ZŠA paśla dakładu MAHATE ab iranskaj jadziernaj prahramie, abnarodavanym u pačatku listapadu, užo ŭnieśli ŭ «čorny śpis» 11 arhanizacyj, jakija padazrajucca ŭ spryjańni iranskaj jadziernaj prahramie.

Čakajecca, što ES dadaść u adpaviedny śpis subjektaŭ, na jakich raspaŭsiudžvajucca sankcyi, 191 fizičnuju i jurydyčnuju asobu. ES užo ŭvioŭ sankcyi adnosna 35 asobaŭ i 250 pradpryjemstvaŭ, źviazanych ź jadziernymi prahramami Iranu.

Vialikabrytanija nie vyklučaje, što ŭviadzie zabaronu ŭsim finansavym ustanovam krainy, u tym liku i Centralnamu banku Anhlii, vieści spravy ź Iranam. Francyja prapanavała ŭvieści novyja abmiežavańni na impart iranskaj nafty ŭ Jeŭropu.

Klintan i Eštan taksama abmiarkujuć situacyju ŭ Afhanistanie, biesparadki ŭ Siryi i zajaŭku Sierbii ab ŭstupleńni ŭ ES.

• 0
• 0
• 0
• 0
• 0
• 0
• 0
• 0